¹ Ndo ebu biuu eki lite yana yana mu okiu, biuu leki ya miko me vii ala Nziami mu nzii e Nziami ebiuu yesu - christo. ² Mundo nde biuu likiki mpe ani kaba le biuu munzi e okiu mu likunu le soli liki biuu. biuu lika ya ise lesa muku mu bise be Nziami. ³ Yana tsée, biuu lika ya ise mu nkari mpari, liyaba yana ni mpari eki ewa ndemi. ⁴ Ndemi eki iwa bilo bibibue, mpe ilo ki ibue mu ma esisa me muko. ⁵ Ma esisa me muko ma ntuturu we, ndo ebu likunu le Nziami eki babamu munkara miku me biuu mu mutini e itsui e Nziami ki oliwi nde. ⁶ Ndo ki ina likiki biuu ebu biyawe yesu anti, mu ntôo eyana ndo bara bababi. ⁷ Kuobu muli enta mundo muru eyana muru mumo wa kiu onta ndo muru eyana. ⁸ Muli Nziami esuo likunu le nde ala biuu, kuobu christo anti ndo biuu ndu ebu biuu leki turu bara ba masamu. ⁹ Mu isa ki inene muli biuu eki balita mu maki ma nde, biuu leki libio mawama mu liknu le Nziami. ¹⁰ Kuobu, bu lekiki biuu ya babali yu, biuu leki le vunu ya Nziami mu mutini e lintu le muana nde, kue babaluri kunzue uvunu, biuu le bo mawama mu bumuru bo nde. ¹¹ Ka mamana we, muli biuu leki lituono mpe Nziami mu mutini e mtumu ebiuu yesu - christo, mu nde wu leki biuu muli ovunu eso wu. ¹² Ndo ebu, mpi lisumu ya lisome mu mukili mu muru mumo, ndo ebu lintu ya lisome mu lisumu. mpe kiri lintu eki litsamu ala muru nde eso, ala bobaso bake amasu mu. ¹³ Kuobu tii mu maluo, lisumu leki mu mukili. muli lisumu leki kayana we aku e nde. ¹⁴ Ndo nki, lintu eki lekiu ala Adam ya Moise, mpe mumubo, babaki ebu lisumu we oka mabi mamamu nu tana ya ma Adam. mabu eki busu bo yuebu akuini oya. ¹⁵ Muli nde akiki likabu le loalo we mpi we esi ya embi. Kiri mu ma esi ma mabi ma muru mumo. Ba ntumu babanti, mu kue oluru mawama ma Nziami mpe makaba ma mayi mu mawama ma muru mumo, yesu - christo bo eki babati bi ntini baba dimu. ¹⁶ Ba baki makaba we mutini iya to ala muru mumo eki amasumu. Ndonki kaba lime, eki kio masumu ma muru mumo ebu mufunu eki miyo miki, mpe babake ya bawini, makaba na mpama ma mayi ota yana yana mpe mambi mantnu mu masumu. ¹⁷ Kiri mu masumu ma mumo ebo, lintu likuu ala nde ngako, mukue oluru ba bawu mawama ma tsée mpe makaba mayana maku ku munkara muru yesu - christo nde ngako. ¹⁸ Kiri ebu, mutini oki masumu ma mumo ebo bobaso baki bayu bara ba masumu mutini ebu aya mu ma asisi nde mayana mu ota yana yana ma ma wuwa lama mu muru ndeso. ¹⁹ Mpi mu owene liziri le muru mumo bobaso ya bayu bara ba masumu mubo mu liziri le muru mumo loleso bale ta yana yana. ²⁰ Muene muki ayi ayiolu mambi momaso, mawama maluiri tsée. ²¹ Mama mayi kuobu ndo masumu. Makuu mu litu, mpe mawama makuu mu mutini eyana yana ndo mawama impini ma yesu - christo mtumu e biuu.