¹ Yaaka Saula lelo ayangelake bayeki baka nkolo nko biango be iwa. Asake ok'ole engambi e nkanga, ² pe aoyubole bekanda l'itina lika bikinda bi Damaseke, l'itina ndee onkeni longa nde aba oko bikinda biko eyale weto, eyale wele, ayosono mbute bo pe aabele oko Yelusalema. ³ Oki nde asakokende, ayie mpika la Damaseke, pe nsasi bi yima oko liko biokesele mbala emo. ⁴ Akite oko nse pe ayoke iyoyi liotepela lioe, Saula! Saula! Te onyokolo mi bokobo be? ⁵ Saula atepele ndee, Te awu nani, Nkolo? Nde pe akalole ndee, mi Yesu ene le nyokolo wu; ⁶ yaaka yumwaka, yotwaka oko nza, pe bangokotepele lobo lobongo wu la nkela-kela. ⁷ Yaaka bele bene bekosakokende la nde bayemalake nko minya nsinama. Bayoke lio iyoyi liko yaaka ntayene kia boto ye. ⁸ Saula ayemale, oki nde asolipola beso, ntayene nkia yemba ye, baowute oko lobo, pe baobele kuu nko Damaseke. ⁹ Aliki ako nsio bisato nyene-yene ye, ndekeleke ye, mina-mina pe ye. ¹⁰ Boyambi bomo aliki ako Damaseke lina li nde Anania. Nkolo aotepele yima oko boyenelo ndee, Anania! Nde pe atepele ndee, mi mione, Nkolo. ¹¹ Nkolo aotepele ndee, Yumuaka, lekaka oko bongala botolwa lina Alima, osoyalole boto lo Talasia lina li nde Saula, oko lowulu loka Yuda, ibango abotitia, ¹² pe akosoyene wele bomo, lina Anania ayaka mbute nde oko beso l'itina ndee ayene lonkina. ¹³ Yaaka Anania akalole ndee, Nkolo nsakoyoka mbo l'itina lika wele boko, oko minya beka bato wuke, mbo wuke bi bobe bisa nde akela ok'ole bakolami ba wu oko Yelusalema . ¹⁴ Ane pe alia bonkumu bo yima ok'ole bingambi bi bankanga la mbute bankumela bane babesia lina li wu. ¹⁵ Yaaka Nkolo aotepele ndee, leka la lowu, ibango nsakoosolo ndee la mbele lina li mi ok'ole biwumo, la pe oko bankumu, pe ok'ole bana ba Yisalaele. ¹⁶ Ibango mi ngoolakia nde mbo wuke bibongo nde nzoke mbabali la bio, oko lina li mi. ¹⁷ Anania ayumwe pe ayotwe oko lowulu loko, asangie Saula babo, pe atepele ndee, mbale Saula! Nkolo, nde Yesu l'ekoyenele la wu oko mboka eki wu oyake, antomili nde ndee oyene lonkina pe onyote la Elimo le Tee. ¹⁸ Biemba nkonga mposo bi nsi bikite tataa yima oko beso ba nde, pe ayene lonkina. Ayumwe pe ayinwe, ¹⁹ ale pe ile, abae wembu. Ayale bana nsio ndia bayambi ba Damaseke, ²⁰ pe ayotwe oko bekosamelo tataa la ndake bato ndee Yesu, nde ale wana oka Wangi. ²¹ Bato bankumela bakooyokitiaka bakabake pe batepele boe, Te one mbali bonyokoli boka bankumela bakotoloko lina line oko yelusalema? Asoya pe ane nko la wango bo mbute bo pe la mbele bo ok'ole bingambi bi bankanga? ²² Yaaka Saula anyote la nguya, pe alakiake polele ndee Yesu, nde ale Masiya, ngako Bayuda bane bakoliki oko Damaseke ntaayosonoko nkalola ye. ²³ Eki nsio wuke bisoleka, Bayuda bakakosie la wango bo ndiake nde, ²⁴ yaaka boyeli bobo boyebane ok'ole Saula. Bakengeke bikuke bi nza la botio la wane, la wango boe baodiake, ²⁵ yaaka bayambi baotulole oko botete la botio oko ikusu li bipele bi nza. ²⁶ La mbis'eko, ase oko Yelusalema, pe akekake nkosama ndia bayambi, yaaka boankumela baomangake ibango ntabayambake boe ale boyambi. ²⁷ Yaaka Balanaba aopose pe ase nde ok'ole ntomwa pe aatepele nde Saula ayeneleke ndia Nkolo oko mboka, pe ndee Nkolo aotepele pe lonkina ndee Saula alakake lina lika Yesu la nguya wuke oko Damaseke. ²⁸ Ngako aliki ndia bo ndiemo oko Yelusalema, nzotwa pe la mpaswa, ²⁹ pe alakake lina lika Nkolo la nguya wuke. Ayokake pe akelake biango ndia Bayuda bane bakotepelake iyoyi lika Ba-Ela. Yaaka bakekake nko la ndiake nde. ³⁰ Eki bambale basoyeba ngako, baobele oko Kaisalia, base la nde kuu nko Talasia. ³¹ Ngako totolo eyoyalaka oko Ekinda ntundu binkuma bi Yuda, la Galilaya, la Samalia. Bakembake pe bakendeke la bomo ok'ole Nkolo pe la bosungi boka Elimo le Tee, pe bafulake. ³² Petelo asakokende oko nza binkumela, la mbisa ayie ok'ole Bakolami bakoyalaka oko nza lina Luda. ³³ Atane boto omo ako, lina li nde Enea, bokatatali bokolambaka nk'oko ntange mpela mwambi. ³⁴ Petelo aotepele ndee, Enea! Yesu Masiya akobikia wu! Yumwaka oyite lokalanga lo wu. Ayumwe tataa. ³⁵ Bankumela bakolambaka oko Luda pe oko Salono baoyene pe bakalomole bebonda ok'ole nkolo. ³⁶ Boyambi bomo ayalake oko Yapo, lina li nde Tabita, kalomo loe Doluka. Nde aliki boto lo bisali bi dilo pe apake bakapo ba isei wuke. ³⁷ Oko bio nsio biko akone wale pe awe. Baosose pe baotamie oko nsamba le liko le lowulu. ³⁸ Yaaka Luda eliki mpika la Yapo, ngako eki bayambi basoyoka boe Petelo ale oko Luda, baotomie bele bepele la mbotitie nde boe, Ntoyalake edie, yaka oni ole so! ³⁹ Petelo ayumwe pe ase ndia bo loselele. Eki nde asoyia, baobele oko etei le nsamba le liko le lowulu. Beto bankuma basakolela balaka baliki ndiemo boa nde balelake, pe baolakiake benkto, la bakasaka, la bisenda binkumela biki Doluka akekake ngeng'eki nde aliki ndia bo. ⁴⁰ Yaaka Petelo aapasole baonkumela oko bosale, akukeme la babolongo pe abotitie. La mbise ayelele ebembe pe atepele ndee, Tabita! KUndwa! Weto alipole beso ba nde pe eki asoyene Petelo, akatike anse. ⁴¹ Petelo aopa ikanzo, aoyimie pe abesie Bakolami, la beto basakolela balaka, pe aayambie weto la lokeno komoso. ⁴² Lobo lone loyebatanake oko Yapo enkuma, pe bato wuke bayambele Nkolo. ⁴³ Petelo pe ayale yembe ngengo le wuke oko Yabo oko lowulu loka Simona bo mposo bi nyama. (bikoto).