¹ Saula pe anyiminyake iwa li nde. Oko losio loko bonyoko bo wuke bobelele ekinda le Yelusalema, pe boankumela bapanganyale oko be nse be Yuda la Salomono, yimia nko ntomwa. ² Yaaka bele bekolamemaka oko mbotitia bakunde Setepano pe baobele la bilelo bi wuke. ³ Yaaka Saula anyokoloke ekinda. Ayotwake oko lowulu la lowulu pe akuyake bele la beto, pe aabokake oko lowulu lo ikamba. ⁴ Ngako, bane bakopanganyala basakokende ntundu la ntundu nsango dilo ndakalaka. ⁵ Pilipo pe akitele oko nza bi Solomono, pe aalakake mbo bika Masiya. ⁶ Wuke bo bato bayambe mbo biki Pilipo atepelake la bobonda bomo ako oki baolendake pe oki bo boyeneke bilimbetelo biki nde akelake. ⁷ Ibango bolimo bi bonzumba bipaswe ok'ole bato la iyoyi li bopami bo wembu, pe bakatatali la bikoko babike, ⁸ pe nyinga le wuke eyalake oko kio nza eko. ⁹ Wele bomo aliki, lina li nde Simona, nde akelake benkanga ntondo oko kio nza eko pe, pe bato ba Somolono bakabake wuke la nde, pe akabesiake ndee, nde ale boto lonene. ¹⁰ Bato bankumela baoyokitiake, la bato ba nionio, la bato banene, pe batepelake boe, Boto one alia nguya eka Wangi bototolwa bonene. ¹¹ Baototiake, ibango yima edie lenene aakelake bimwenge la bokanga bo nde. ¹² Yaaka ako oki bo basoyamba ilako lika Pilipo li nsango dilo le Bonkumu boka Wangi pe lina lika Yesu Masiya, la bele la beto bayinwe. ¹³ Simona nde nkika pe ayambake, pe ngeng'eki nde asoseya nyinwa, ayale edie ndiemo ndia Pilipo, pe oki nde ayeneke bilimbetelo la bisali bi nguya bikokelwa, akabe. ¹⁴ Eki ntomwa basoyoka boe basi Solomono basoyamba nsango dilo eka Wangi, baatomiake Petelo ndia Yoani. ¹⁵ boapele batulue oko pe babotitie l'itina li bo boe babaeElimo le Tee. ¹⁶ Ibango lelo Elimo ntakiteli nkia ok'ole boto omo ye, yaaka basakosia nyinwa oko lina lika Nkolo Yesu nko nyinwa ntontoo. ¹⁷ Ngako ntomwa baasangie babo, Elimo le Tee. ¹⁸ Eki Simona lekoliki nkanga asoyene ndee Elimo esopasua la bosangie bo babo baka ntomwa, ayangake mpae bo bensongo (faanga), ¹⁹ pe atepele ndee, bompaake la mi nguya l'itina mie boto onkeni onga mi nsangia babo abae Elimo le Tee. ²⁰ Yaaka Petelo aotepele ndee, Paaka bensongo (faanga) be wu beponde ndiemo la wu! Ibango otangela wue obongo mbae ikapo lika Wangi la bensongo (faanga). ²¹ Ntombia yeti, la pe eteni le lobo lone ye, ibango bobonda bo wu ntabonge kweli oko beso baka Wangi ye. ²² Ngako kalomolaka bobonda bo wu boyime oko lobo lone lo bobe, pe botitiaka ok'ole Nkolo laape itangeli line lil'oko bobonda bo wu lingokosawuela. ²³ Ibango nyene mie awu ol'oko bololo boka lonyongu pe oko balalo baka bobe. ²⁵ Ngako eki ntomwa basoseya botato pe ndakalaka iyoyi lika nkolo, bayitie oko Yelusalema pe balakake nsango dilo oko nza wuke bi Solomono. ²⁶ Ntomwa eka nkolo atepele Pilipo ndee, Yumwaka pe lekaka la lowu oko ntundu le ngele oko mboka etulwa oko Yelusalema la nse oko Gaza, oko ndieko le polele. ²⁷ Ayumwe pe ase la londe. Wele bomo bosi Etiopia l'okoliki ekobe, boto lonene botii boka Kandake nkumu le weto le Etiopia, boto lokokosiaka bensongo (faanga) be nde benkuma, asake oko Yelusalema la mbotitia; ²⁸ pe aliki oko mboka le bayitielo. Aliki anse oko liko li ikalo li nde pe atangake bokanda boka bobambi yesaya. ²⁹ Elimo atepele Pilipo ndee, leka osoyetwe oko ikalo liko. ³⁰ Ngako Pilipo ase oko la lobango, pe aoyoke mbo bika bobambi Yesaya, pe atepele ndee, Owuta mbo bi tanga wu itina? ³¹ Atepele ndee, Laa boto ntandibweli bio itina ye, ngoyosono la nzeba-yeba ngamoni? Ngako abesie PIlipo ndee asangeme anse ndia nde ndiemo. ³² Elamoli le bokanda boki nde ayakotange eliki ngane, Abelwe oko ndie le bodiakelo nkonga mbata, nkonga wana lo mbata aliki totolo oko ntondo eka bokololi bo nde bo bioso, ngako ntalipola munya bo nde ye. ³³ L'itina lika bototie bo nde, botendi bo kweli boboyuake ok'ole nde boyo nani longolimbola l'itina lika ibotwa li nde? Ibango losio lo nde lososia oni nse. ³⁴ Lo lokengi atepele Pilipo ndee, Ontepelake, bobambi bone atepela ngane l'itina lika nani, l'itina li nde nkika la pe l'itina lika boto onkina? ³⁵ Pilipo alipole munya bo nde, pe abange la lio isono liko, pe aolakake nsango le dilo eka Yesu. ³⁶ Eki bo basakokende oko mboka, bayie oko losi lomo, pe lokengi atepele ndee, Sondenda mi! Lobo lina be lo nkambia mi nyinwa? ³⁷ Pilipo aotepele ndee, Laa osoyamba la bobonda bonkuma, obongo. Aokalole ndee, nzamba mie Yesu Masiya ale wana oka Wangi. ³⁸ Ayemie ikalo, pe bo banswapele bakitele oko losi, la Pilipo, la lokengi, pe aoyine. ³⁹ Eki bo basoduwua oko losi, Elimo eka nkolo apose Pilipo, pe lokengi ntaoyitia nyene-yene ye, yaaka ase nza le nde la nyinga. ⁴⁰ Yaaka pilipo ayenele oko Azoto, pe asakokende oko nza binkuma la ndaka-laka nsango dilo kuu nko oki nde ayie oko Kaisalia.