¹ Oko Kaisalia wele bomo, lina li nde Kolonelio aliki; nde kapiteni le poloto le basoda bakobeswaka Baitalia. ² Aliki boto lo mbotitia pe alotake Wangi, la nde la bato ba nde bankumela. Apake bato bakapo ba isei wuke, pe abotitiake ok'ole Wangi ngengo binkumela. ³ Losio lomo, laape oko lopoma lo liwua, ntomwa eka Wangi eobelele oko boyenelo, la ntepele nde ndee, Kolonelio! ⁴ Aolende pe ayoke bomo wuke, pe atepele ndee, lobo lina be Nkolo! Aokalole ndee, mbotitia bi wu la ba isei, bisoyilela ok'ole Wangi nkonga elimbetelo. ⁵ Akoboko tomaka bele oko Yopo la mbesie boto omo lina Simona one lotolwa Petelo, ⁶ nde ale ngendia oko lowulu loka Simona enkina bokandi bo mposo bi nyama, lowulu lo nde lobe oko bonkili bo losi. ⁷ Eki ntomwa ene ekotepelaka asie nyimayima la londe, abesie batii ba lowulu lo nde bapele, la soda emo, boto lo mbotitia, omo lo bane bakoliki la nde ngengo binkuma. ⁸ Aatepele mbo biko binkumela, pe aatome oko Yapo. ⁹ Oko mbise losio, nko lelo baliki oko mboka, oki bo bayosia mpika la nza, Petelo ayilele oko nsamba le liko le lowulu la mbotitia mpika la lopoma lo bisamalo. ¹⁰ Ayoke nzala, pe ayokake mposa le ndeke-leke. Yaaka eki bo balondake biemba, ase nkayi, ¹¹ pe ayene liko likalipola, pe yamba emo ekitela oni nse nkonga esenda lenene lekoliki la basulu nkandema oko bakono bankumela banei. ¹² Oko kio esenda eko eliki la nzeli binkumela bi nyama bi bakolo banei, la pe nyama bine bi landa oko mbotu, la mfulu bi dia. ¹³ Iyoyi liotepele lioe, Petelo! Yumwaka, diaka pe lekeke! ¹⁴ Yaaka Petelo atepele ndee, Nkia losio lomo ye, Nkolo! Ibango mi nkia mbala emo lelo ntileli yemba le mbindo lape yemba le nyoti ye. ¹⁵ Iyoyi liyitie nzokana mbala le bipele lioe, lama la biemba bisa Wangi atendolo, awu ntoibesiake biemba bi mbindo ye! ¹⁶ Ekelwake ngako mbala bisato, pe esenda eyitiake oko liko wayi. ¹⁷ Ngeng'eki Petelo akakatanake la nzebe itina lika boyenelo boko, bele bene bekotomwaka la Kolonelio bakososeya nzubole lowulu lole Simona, pe bayemalake oko munya bo lowulu. ¹⁸ Babesie boto nzubola laape Simona l'etolwa Petelo aliki ako. ¹⁹ Lelo ngeng'eki Petelo akayubolake itina lika boyenelo, Elimo le Tee aotepele ndee, bele besato bakoyalola. ²⁰ Yaaka yumwaka pe kitela, leka wua bo loselele ntokelake biango ye, ibango mi nkosoatoma. ²¹ Petelo akitele ok'ole bele beko bepele, atepele ndee, mi nde boto oko loyalola nyo! Lokendo lo nyo lole itina be? ²² Bakalole boe, Kolonelio, Kapiteni eka basoda , wele bo kweli pe bolota Wangi, boto lo lumu lo dilo ok'eteti eka ibotwa lika Bayuda linkuma, nde alakame la ntomwa le piepie ndee akobesie oko lowulu lo nde pe ayoke mbo bitepela wu. ²³ Ngako Petelo aayotie oko lowulu pe aayambe. Oko mbise losio apaswe, pe ase ndia bo loselele. Bamo bambale bato ba Yapo, base boa nde. ²⁴ Oko mbise losio bayie oko Kaisalia. Kolonelio akosie besangema be nde la bambale bakolambaka la nde mpika. ²⁵ Eki Petelo asoyia, Kolenelio aopominye pe akukame oko bakolo ba nde pe aotelie. ²⁶ Yaaka Petelo aoyemie pe atepele ndee, Yemala! La mi nkika nde nko boto. ²⁷ Ngeng'eki bo batepelake, ayotwe oko lowulu pe atane bato wuke bakokosamaka esuku. ²⁸ Aatepele pe ndee, Nyo boyeba nyoe ntekolame la wele Boyuda ndamema lape mbeleme ndia bato ibotwa linkina ye. Yaaka Wangi asakondakia ndee ntibesiake boto onkina boto lo mbindo lape yemba le ntontoo ye. ²⁹ Kio kieko ngako, eki mi nsobeswa, nsoya la loya lokamba biango. Ngako meyubola mie, Bombesie mi la lobo nga be? ³⁰ Kolonelio atepele ndee, esoleka lene nsio binei nk'oni ngeng'ene, mi ndiki oko lobotitia oni lowulu lo mi oko lopoma lo diwua, nkolenda mi ngane, nyene nko wele ayemi oko ntondo le mi la bisenda bi ngeli-ngeli. ³¹ Atepele ndee, Kolonelio! Mbotitia bi wu bisoyokana pe bakapo ba wu ba isei basoyambema oko beso baka Wangi. ³² Ngako tomaka boto oko Yapo la mbesie Simona l'etolwa Petelo. Nde ale ngendia oko lowulu loka Simona enkina, le bokandi bo mposo bi nyamba, oko bonkili bo losi. ³³ Ngako ntome bato ok'ole wu tataa, awu pe osokela dilo ane osa wu oya. Ngako soankumela akoboko tole oko beso beka Wangi la nzokitia mbo binkumela bisa nkolo akolaka. ³⁴ Petelo abange ntepela ndee, Nko solo nsoyene mie Wangi ntalamole bato ye; ³⁵ yaaka oko etetei eka babotwa bankumela, onkeni loolota pe lokela bokolami, ayambema la nde. ³⁶ Nde asakotoma lotomo ok'ole bato ba Yisalaele, pe asopa totolo oko lina lika Yesu Masiya. Oko lole Nkolo eka bankumela. ³⁷ Nyo boyeba bontika bone bosoleka oni etetei le Yuda enkumela, yima Galilaya oko mbise boyini boki Yoani alakake, ³⁸ pe Wangi anyotie Yesu le bosi Nazaleta la Elimo le Tee pe la nguya. Nde pe akendeke ntundu la ntundu la nkele bisali bi dilo pe mbikie bankumela bakokandemaka la Satana, ibango Wangi aliki la nde ndiemo. ³⁹ So pe tole batati baka mbo binkumela bi kelili nde oni nse le Yuda pe oko Yelusalema. Baodiake, baokakie oko bote. ⁴⁰ Yaaka Wangi aokundole oko losio lo bisato, pe aolakie polele, ⁴¹ ntembe ok'ole bato bankumela ye, yaaka ok'ole batati bakosolwaka la Wangi ntondo. so tole batati bako, toleke pe tominake ndiemo soa nde oko mbisa eki nde asokundwa yima oko bawi. ⁴² Atolakake ndee totepele bato pe tolakake soe nde ale Basolwe boka Wangi nkonga Ntendi eka bato balia lokeno pe la bawi. ⁴³ Balaki bankumela balokotate l'itina li nde boe bayambi ba nde bankumela bangoba bosawue bo bobe lama la lina li nde. ⁴⁴ Lelo ngengo eki Petelo atepelake mbo biko, Elimo le Tee akitele ok'ole boankumela bakoyokitiake ilako. ⁴⁵ Bayambi bako base boa Petelo mbok'emo, bo baliki bato ba beke besuti, bakabe boe, Elimo le Tee asokita la ok'ole ngendia. ⁴⁶ Ibango baayokake batepela oko bayoyi bankina, pe bateliake Wangi. Oko kio ngengo eko Petelo akalole ndee, ⁴⁷ Edia boto lopeka losi l'itina li nyine bane basoba Elimo le tee nga so? ⁴⁸ Aalakake ndee bayinwe oko lina lika Yesu Masiya. Baobotitie boe asoyala ndia bo yembe ngengo.