¹ Ntomwa pe bambale bakoliki oko Yuda bayokake boe ngendia baoyamba ilako lika Wangi. ² Pe ngeng'eki Petelo asoyilela oko Yelusalema, bane basakobekwa besuti bayiake biango boa nde boe, ³ osoyotwa oko mbulu bika bele bempatobekwe besuti, pe osole biemba ndiemo wua bo. ⁴ Yaaka Petelo abange pe alimbetele mbo binkumela bonsongili nde ndee, ⁵ Mi mbotitiake ngeng'eki mi ndiki oko nza lina Yapo, pe nyeneke boyenelo oko nkai eki mi nse. Nyene yemba eyima oko liko ekitela oni nse nkonga esenda lenene, eliki ndalema la besinga oko bakono bankumela banei, pe ebelemeke mpika la mi. ⁶ Nsisiake oko etei le kio pe nyeneke nyama bi bolongo bi bakolo banei, la nyama bi klia waangi, la nyama bi landa ndala-landa, la mfulu bi dia. ⁷ Nzokake pe iyoyi li ntepela lioe, Petelo! Yumwa! Diaka pe lekele! ⁸ Yaaka mi nkalole mie, Nkia ngeng'ene emo ye, Nkolo! Ibango lelo nkia yemba le nyoti lape yemba le mbindo nteyotwe oko munya bo mi ye, ⁹ iyoyi oko liko litepele mbale le bipele lioe , lama la biemba bisa Wangi atendolo, awu ntoibesiake biemba bi nyoti ye! ¹⁰ Ekelwake ngako mbala bisato, la mbisa pe ekuywe oko liko lonkina. ¹¹ Tataa bele besato babele oko lowulu loki mi ndiki, batomwake ok;ole mi yima oko Kaisalia. ¹² Elimo pe atepele ndee nse mia bo loselele ntikelake biango ye. Bambale bane basamalo base la mi loselele, pe toyotwake oko lowulu loka wele boko. ¹³ Atolimbole dweli loki nde ayene ntomwa eka Wangi wema oko lowulu lo nde pe atepele ndee, Tomaka boto oko Yapo asobesie Simona l'etolwa Petelo, ¹⁴ nde angokotela mbo bingokobikia la wu la bato ba lowulu lo wu lonkumela. ¹⁵ Eki mi nsobanga ntepela, Elimo le Tee atulwe ok'ole bo nkonga oki so ok'ibangelo. ¹⁶ Nzitiake ntangela, baboyi baka Nkolo baki nde atepelake ndee, Yoani ayinake oko losi, yaaka nyo bongoyinwa la Elimo le tee. ¹⁷ Ngako laa Wangi asoapa ikapo kweli nkonga oki nde atopake so ngeng'eki so toyambelake Nkolo Yesu Masiya, mi nde be, l'itina mie mpekele Wangi? ¹⁸ Eki bo basoyoka mbo bikio, bayalake totolo, pe bateliake Wangi boe, laa ngako nkane Wangi asakopa ngendia bokalomoli bo bobonda kuu nko bokolo. ¹⁹ Bane bakopanganyalake oko mbisa eka bonyoko boka Setepano, base kuu nko Foinike, la Kupulio, la Antiokiya. Ntaba lakake nsango eka Wangi ok'ole bato bankina ye, nk'okole Bayuda. ²⁰ Bele benkina bekoliki la bo ndiemo, bato ba Kupulio la Kulene; eki bo basoyia oko Antiokiya batepelake pe la Ba-Ela nsango eka Nkolo Yesu ndakalaka. ²¹ Lobo loka Nkolo loliki ndiemo la bo, pe bosio bo bato wuke bayambe, bakalomoe ok'ole Nkolo. ²² Lumu lo bo loyokane kuu oko batoyi baka ekinda ekoliki oko Yelusalema, pe batome Balanaba oko Antiokiya. ²³ Eki nde asoyia pe asoyene mbo bikokelwa la iyangi lika Wangi, ayoke nyinga pe aapa boankumela ilako ndee batike bebonda bebo bakaa nk'oko lo Nkolo; ²⁴ ibango nde Balanaba aliki wele bo dilo pe anyotake la Elimo le Tee pe la boyambi. Esuku lenene le bato bakosame oko Nkolo. ²⁵ Balanaba ase oko Talasia nzalole Saula. ²⁶ Aobae pe aobele oko Antiokiya. Mpela enkuma bombondo bakosamake boa ekinda la mpae ilako ok'ole esuku lenene le bato. Bayambi batolwake lina, Baka-Masiya, ntondo oko Antiokiya. ²⁷ Oki bio nsio biko balakake oko Yelusalema, bakitele oko Antiokiya. ²⁸ Omo lo bo, lina li nde Agaba, alakake ntondo lama la Elimo ndee nzala lenene eyaka oko nse binkumela. Nzala eko eyopaswaka oko nsio bika Kalaudio. ²⁹ Bayeki bayange wango bo ntome biemba bi nsunge bambale bakoliki oko Yuda, boto la boto nkonga oki nde ayosonoke. ³⁰ Bakele ngako pe baitomie bingambi bi ekinda oko babo baka Balanaba ndia Saula.