¹ Yaaka wele bomo lina Anania, ndia ilaka li nde Sapila, bateke itia, ² yaaka amonye yeti le bensongo (faanga) beki nde abae. Ilaka pe ayambe nko ngako. Aye la yeti le bensongo (faanga), pe aetike oko ntondo le bakolo baka ba ntomwa. ³ Yaaka Petelo aotepele ndee, Anania, Satana asoyotia bobonda bo wu wue odimbe Elimo le Tee pe omonye yeti le bosio bo bensongo (faanga) be itia bokobo be? ⁴ Ngengo eki lio lelo ntaitekwe, ntailiki li wu? pe ngengo eki lio litekwe, ntailiki oko babo ba wu? Osotangela oko bobonda bo wu nkele ngako itina be? Ntokelili bongala ok'ole bato ye, yaaka ok'ole Wangi. ⁵ Eki Anania asoyoka bayoyi bako, akite oko nse pe awe. Bomo bo wuke bowute bankumela bakoyoka loboeko, ⁶ yaaka bilenge bayemale, pe baolinge oko bisenda, baopasole oko bosale pe baokunde. ⁷ Ilaka li nde pe ayotwe swe, mpika oko mbise mpoma bisato, yaaka ntayebaka lobo losokelwa ye. ⁸ Petelo aoyubole ndee, ontepelake, botekili li nyo oko bosio bone? Nde pe akalole ndee, Oo, la bosio nko bo. ⁹ Petelo aotepele ndee, Bokayoke la nzengise Elimo eka nkolo itina be? Solenda bakolo baka bakundi bak'ilaka li wu bal'oko munya bo lowulu, pe bangokobela oko bosale dweli nko lo. ¹⁰ Akite ta-taa oko bakolo ba nde pe awe. Bilenge bayotwe swe, pe batane boe akosowa, pe baobele oko bosale, pe baokunde ndiemo ndia ilaka li nde. ¹¹ Bamo bo wuke bowute ekinda enkumela, la pe bato bankuma bakoyoka loboeko. ¹² Bilimbetelo wuke la bimwenge bikelwake oko babo baka ntomwa ok'etetei eka bato pe baliki boankumela la bobonda bomo oko mbalasa eka Solomo. ¹³ Ok'etetei eka bato bankina nteliki nkia la boto omo lokokakasanaka la ndamem'oko esuku le bo ye, yaaka bato baateliake wuke; ¹⁴ pe Nkolo asangiake bosio ba bayambi nsonde ba ntonda, wuke bo bele pe wuke bo beto. ¹⁵ Ngako basampiake bakoni oko mboka le bo oki bayakoleke, pe baatikake okontange pe oko nkalanga l'itina boe nkia elimo eka Petelo eleke oko liko lika bamo baabo ngeng'eki nde ayakokende. ¹⁶ Wuke bo bato ba nza, la ba ntundu le Yelusalema bakosame, pe bayake la bakoni, la bato bakoliki la bilimo bi be, pe boankumela babikake. ¹⁷ Ngako engambi e nkanga ayemale, ndia bankumela bakoliki ndiemo la nde bane ba ekinda le, Basadukayi , pe banyotake baa la ikeke, ¹⁸ pe bawute ntomwa, baayotie oko lowulu lo ikamba. ¹⁹ Yaaka la botio ntomwa eka Nkolo alipole bikuke bi lowulu lo ikamba, pe aapasole, pe aatepele ndee, ²⁰ boyemalaka, bolekaka la ndake bato mbo bine bi bokolo oko lowulu loka Wangi. ²¹ Eki bo basoyoka ngako, bayotwe swe oko lowulu loka Wangi la loyekelo lo mpendu, pe balakake bato. Ngako engambi e nkanga aye, ndiemo ndia bakoliki la nde, pe abesie Ekokayolo enkuma, la bingambi bika basi Yelusalema, pe batome nkenge basopose ntomwa oko lowulu lo ikamba. ²² Yaaka oki nkengi base, ntaatana ntomwa oko lowulu lo ikamba ye, yaaka bayitie la nsango boe, ²³ Toyenili lowulu lo ikamba lokandi nko nta kwekwe, pe nkengi bayemi oko munya bo mboka, yaaka ngeng'elipoli so lowulu, ntatotanili nkia boto ok'etei ye. ²⁴ Eki kapiteni eka nkengi bi lowulu loka Wangi ndia bingambi bi bankanga bayoke ngako, balingatanake lama la lobekelo, la dweli longa lo loboeko lokuma. ²⁵ Yaaka boto omo aye la ntepele bo ndee, Bololenda! Bele beko beki nyo boyitiake oko lowulu lo ikamba, bayemi oko lowulu lo Wangi bato ndakalaka. ²⁶ Oki mbis'eko, Kapiteni eka nkengi ase ndia bapolisi mpose ntomwa, yaaka la wembu ye; ibango balotake bato nkanga ntaasoabola bawe. ²⁷ Yaaka baye la bo pe baayemie oko etetei eka Ekokayolo. Engambi e nkanga aayubole ndee, ²⁸ Toepekelake ntondo wembu soe boyale nkolaka oko lina line lonkina ye, pe bosonyotia Yelusalema enkumela la balako ba nyo, pe bakana botoyimbe so l'itina lika balongo baka boto one. ²⁹ Yaaka Petelo ndia ntomwa binkina, batepele boe, Ebongo nko tototie Wangi ntondo eka ntotie bato. ³⁰ Wangi boka bapapa ba so asakokundola Yesu one oki nyo bodiakake la nkakie nde oko bote. ³¹ Wangi asoosangia sangaa oko lobo lo nde lo ndeli nga Nkumu pe bobikie la mpae Yisalaele mboka le bokalomoli bo bebonda pe bosawue bo bobe. ³² So tole batati baka bio mbo biko, ndiemo soa Elimo le tee one losaka Wangi ayitomola ok'ole bane bao baototia. ³³ Eki bo basoyoka ngako, bakaswe oko bebonda, pe balangake boe baadiake. ³⁴ Yaaka Bapalosi bomo lina Gamaliele, lokoliki bolaki bo bekengo, boto lo lumu lo dilo oko beso aka bato bankumela, atepele ndee bapasole ntomwa yembe nio oko bosale. ³⁵ Aatepele ndee, bele be Yisalaele, bobaaka nkepo lama la mbo binkuma bi yanga nyo nkelakela ok'ole bato bane. ³⁶ Ibango yembe ngengo edie wuke ye Teuda apaswake la ntepele ndee, nde boto lo mpipa, pe bana bele wuke balamemake boa nde, mpika-mpika la bato benkama beneyi. Nde adiakwake, pe bako bankumela bakoobengaka bapanganyale tia-tia, pe bayoyalaka binsonsele. ³⁷ Oko mbisa le nde, oko nsio bi basonelo ba bena, Yuda le bosi Galilaya apaswe, akuye bato oko loselele lo nde. Nde pe awe, pe bako bankumela bakoobengake bapanganyale. ³⁸ Akoboko metepela mie bokalamolaka bienge ok'ole bato bane, boalakiake totolo, ibango laa boyeli bone, laa pe esali ene eyima ok'ole bato engolimoa pie. ³⁹ yaaka laa eyima ok'ole Wangi, nyo ntabongoyosono nkumie bato bane ye, bobaaka nkepo nkanga ntoosoyemala esongo la Wangi. ⁴⁰ Baoyambele, pe ngeng'eki bo basobesia ntomwa, baapioke bemiekwa, pe baalake boe bayale nkolaka oko lina lika Yesu, ngako pe baatungole. ⁴¹ Ngako bapaswe oko Ekokayolo, bayokake nyinga ibango basotolwa bandwa bonyoko lama la lina li nde. ⁴² Yaaka ntaatwenya ndakalaka oko lowulu lo Bowangi pe oko mbulu bi bo nkika ye, balakake nsango dilo boe Yesu ale Masiya.