¹ Ngeng'eki Petelo ndia Yoani basangake mbali boa bato, bankanga, la kapiteni eka nkengi bi lowulu loka Wangi, la Basadukayi, baabelele, ² bakaswake ibango balakake bato pe balimbolake mbo bi lami la bakundwelo l'itina lika Yesu. ³ Baawute, pe baatike oko lowulu lo ikamba kuu nko la mbise losio, ibango eliki ngengo le ikolo. ⁴ Yaaka wuke bo bato bakoyoka ilako, bayembe, bosio boka bele boyiake mpika la nkoto bitano. ⁵ Oki mbise losio, ba nkumu la bingambi bi nza, la basoneli bakosame oko Yelusalema, ⁶ pe Ana, engambi e nkanga, la Kayapa, la Yoani, la Alesandala, la bankina yima oko ibotwa lika engambi e nkanga. ⁷ Bayemie ntomwa oko etetei pe baayubole boe, nyo bokela bine oko nguya le ngamoni laape oko lina lika nani? ⁸ Ngako Petelo anyote la Elimo le Tee, pe aatepele ndee, Nkumu bika bato, la bingambi bi nza! ⁹ Laa botoyubola so lene lama la esali le dilo l'itina lika ekoko eko, laape asobika ngamoni, ¹⁰ bopaaka eyebane ok'ole nyoankumela pe ok'ole bato bankuma ba Yelusame nyoe oko lina lika Yesu Masiya le bosi Nazaleta, one oki nyo bokakiake ok'ingengola, yaaka Wangi asookundole yima oko bawi, l'itina li nde, boto one asoyemala oko ntondo le nyo la bienge wembu. ¹¹ Nde Yesu ale iwe likoboywa la nyo balwi, nde pe asoyala iwe li ikono. ¹² Lobiko pe ntaloyime ok'ole boto onkina ye, ibango ntembia lina linkina ye lisakopawua oni nse ok'eteti eka bato l'itina boe toyosone mbika-bika la lio. ¹³ Ngeng'eki bo basisiake nkusa eka Petelo ndia Yoani, pe eki bo bayebake boe ntaambe bato ba yekasana la bekanda ye, pe bato bampatoyeka mbo ye, bakabake pe baalimbetele boe bayalake boa Yesu ndiemo. ¹⁴ Yaaka oki bo balendake boto oko losobika, nyemala ndia bo ndiemo, ntaayosonoko nkalola ye. ¹⁵ Batepele boe bapaswe oko bosale bo Ekokayolo, pe bakatepele boe, ¹⁶ Tokele ngamoni lama la bato bane? Ibango esoyebana ok'ole bato bankuma ba lamba oni Yelusalema boe, elimbetelo esokelwa oko babo ba bo. Ntangoyosono ntonatona ye, ¹⁷ yaaka toapekele nsoe bayale nkoyitia ntepela lama la lina line lonkina ye, nkanga lobo lone ntesosonda mpanganyala. ¹⁸ Ngako baabesie pe baapekele boe bayale nkoyitia ntepela pe ndakalaka oko lina lika Yesu lonkina nkia nio ye. ¹⁹ Yaaka Petelo ndia Yoani baakalole boe, laa lokolama oko beso baka Wangi loe toetotie nyo ntondo eka notie Wangi, bobekeke loboeko. ²⁰ Yaaka l'itina lika mbo bi yeba so pe bi yoka so, ntatoyosone ntwenye ntepele bio ye. ²¹ Yaaka baakanele lonkina pe baatungole, ibango ntayeneke dweli longa bo baatika oko ikamba, ibango la wuke bo bato; ibango bato bankumela bateliake Wangi l'itina lika mbo bisokelwa. ²² Ibango boto oko losokelwela elimbetelo eko le lobiko asakosonda mpela ntuku binei. ²³ Ngeng'eki bo basoba mboka, base ok'ole bato ba bo nkika, pe baasangele bonkika bo mbo binkuma biki bingambi bi bankanga la bingambi bi nza baatepele. ²⁴ ngeng'eki bo basoyoka ngako, banangole bayoyi ok'ole Wangi la bobonda bomo, pe batepele boe, Nkumu lenene; awu okelake Liko, la nse, la losi, la biemba binkumela bil'oko eteyi le bio. ²⁵ Otepelake oko munya boka Dawidi botii bo wu, papa le so, la nguya eka Elimo le Tee wue, Bakini basokayumola pe bato basoyalola boyeli bo ntontoo itina be? ²⁷ Ibango basokakosia oni nza ene ok'ole Yesu Botii bo wu bo bokolami, bone boki wu osoloke la losole nzitomola. Elode ndia Pilato la bakini, ndamia la bato ba Yelusalema ²⁸ Baokakosia la nkele binkuma biki lobo lo wu lolangake la wango bo wu ntondo wue bingokelwa. ²⁹ Pe akoboko, Nkolo, solendaka biango bebo, pe paaka bantamba ba wu mboka wue bayosone ntepele Nsango le wu la nkusa le wuke, ³⁰ lelo oni ngeng'ene esembola wu lobo lo wu la mbikie bato pe la nkele bilimbetelo bi nkabakaba oko lina lika botii bo wu bo bokolami Yesu. ³¹ Nkako oki bo babotitiake, ndieko eki bo bakosamake esuku esukasane. Boankumela banyotake la Elimo le Tee, pe la bonzenze balakake nsango eka Wangi. ³² Wuke bo bayambi baliki la bobonda bomo la pe itangeli limo. Laa omo lo bo asoba biemba, ntaitole biemba bi nde nkika ye, yaaka biemba binkumela biliki nko ndiemo. ³³ Ntomwa pe balakake la nguya wuke lobo lo bokundwelo baka nkolo Yesu, pe iyangi liinene liliki ndiemo la boankumela. ³⁴ Oko etetei le bo nkia boto omo ntaliki la bokamba, ibanmgo bane bankumela bakoliki la itia, laa pe lowulu, baiteke, pe bayake la bensongo bekokolamaka la bosio boka biemba bikotekwa, ³⁵ pe baisembole oko bakolo baka ba ntomwa. Ngako baikapake ok'ole boto la boto kweli nga oki nde aliki la bokamba. ³⁶ Yosepa, lokotolwaka la ba ntomwa Balanaba, (lole kalomo loe Wana lo bonzenze), Bo-Lewi, bosiKupulu, ³⁷ aliki la itia, pe aiteke, pe aye la bensongo (faanga) oko ntondo le bakolo baka ntomwa.