¹ Pelelo ndia Yoani basake oko lowulu lo Bowangi oko ngengo le mbotitia, oko lopoma lo liwa. ² Wele bomo bokoliki ekoko yima nk'oko ibale lika nyango le nde, abelwake ako, Baetikake losio la losio oko munya bo mboka bo lowulu lo Bowangi bokotolwaka Dilo, boe ayubolake bakapo ba isei ok'ole bato bakoyotwaka oko luwulu lo Bowangi. ³ Ayene Petelo ndia Yoani oki bo bayotwake oko lowulu lo Bowangi, pe ayugolo ikapo li isei. ⁴ Yaaka Petelo, la Yoani oki nde aolendake pe atepele nde, Otolendake so! ⁵ Ngako aatikele lomo, nde ndee angoba ikapo oko babo ba bo. ⁶ Yaaka Petelo atepela ndee, Falanga la palata la wolo ntimbia, yaaka kio l'edia mi, nkopa kio ako boko. Oko lina lika Yesu Masiya le bosi Nazaleta, kendeke! ⁷ Aowute oko lobo lo ndeli, pe aonangole. Nkako nkako bikata bi nde la baseke ba nde babae nguya pe ⁸ asotwe, ayumwe, akendeke, pe ayotwe ndiemo ndia bo oko lowulu lo Bowangi nde nkika nkendekende, mfumpwa mfumpwa, Wangi nko nsangola. ⁹ Boankumela baoyene eki nde asakokende pe oki nde asakosangole Wangi, ¹⁰ baolimbetele boe ele nko nde lomoyakake ok'ekuke dilo le lowulu lo Bowangi, bakapo mbondela, pe bakabake lama la lobo losoo kelwela. ¹¹ Nkako oki nde lelo awuta Petelo ndia Yoani, bato bankumela bakosame nko la nta isali oko mbalasa eka Solomo, nkaba-kaba nta wuke. ¹² Ngeng'eki Petelo asoyene ngako, aatepele ndee, Bele be Yisalaele, bokaba l'itina lika boto one bokobo be? Pe bototikela so beso itina be? Nkonga wue la nguya le so nkika laa pe la bokolami boso nkika tosokendia boto one. ¹³ Wangi boka abalayama la Yisaka la Yakobo, Wangi boka bankaka ba so, asotelia Botii bo nde Yesu, nde nd'oko loki nyo bokapake booboyake oko beso baka Pilato ngeng'eki nde asobeke lobo ndee aotungola. ¹⁴ Nyo pe boboye Bososwe pe Bokolami, pe bobotitiakie nyoe wele bo ediaka bato aetungwele, ¹⁵ pe bodiake Nkumu le bokolo, yaaka Wangi aokundole yima oko bawi. So pe tole batati baka lo loboeko. ¹⁶ Ele l'itina li nzambele lina li nde, kio kieko lina li nde lisokembia boto one lo yene nyo, one pe lo yeba nyo; ele bayambi bo pali Yesu boto one bienge wembu, oko beso ba nyoankumela. ¹⁷ Pe akoboko, bambale, nzeba mie bokelake ngako ibango bokambake dianya, nkonga pe oki bingambi bi nyo bakelake. ¹⁸ Yaaka Wangi asolakia ngako lobo loki nde atepelake oko minya beka babambi bankuma ntondo, ndee Masiya le nde angoto wale. ¹⁹ Ngako, bokalomolaka bebonda, pe bo yitia, bososwe sosoo oko bobe pe ngengo le iyolia eyima ok'ole Nkolo, ²⁰ pe atome Masiya one losakoesolwela, nde Yesu ²¹ Ebongo nko ayale edie oko Liko, kuu la ngengo enga mbo binkumela bikolame, biko biki Wangi atepelake oko minya beka babambi ba nde ba bakolami yima nko kalakala. ²² Mose nde nkika atepelake ndee, Nkolo Wangi bonyo angoeyimiela bobambi dweli nga mi oko etetei eka bambale ba nyo, booyokaka oko mbo binkumela binga nde aetepela. ²³ Boto onkeni lompatongoyoka bobambi boko ye, angodiakwa bongolo oko beso baka bato. ²⁴ Babambi bankuma pe yima nko Samwele, la bane pe bakolakaka mbisa, batepelake l'itina lika mbo bine bi nsio bine. ²⁵ Nyo bole bana baka babambi pe la nyimi eki Wangi asimbake ok'ole bankaka ba nyo, ngeng'eki nde atepelake Abalayama ndee, Oko etetei le ibotwa li wu babotwa bankuma bangoswakwa. ²⁶ Ngeng'eki Wangi asoseya nkundole Botii bo nde, aotome oko ntondo le nyo, la nswakole nyo oko bakalomoli boto la boto yima oko bobe bo nde.