¹ Ngeng'eki losio lo Ntuku Bitano loyie, baliki boangumela esuku ndiemo. ² Longilima loyime oko Liko emo ngonga longilima loka lokuli lo wembu, Lonyotiake lowulu longumela oko ndieko eki bo baliki. ³ Ndemi ngonga twe biyenele ok'etetei le bo, bikakape, lomo la lomo bisangeme oko liko li betu beka boto la boto. ⁴ Boangumela banyote la Elimo le Tee pe babangake nzokayoka oko bayiyi bankina kweli ngonga oki Elimo aakapalake bayoyi ⁵ Bayuda baliki ako Yelusalema, bele bekoyekasanaka la ntelie Wangi, bato ba babotwa bankumala yima biteni binguma bi nse bi bolongo. ⁶ Eki boyoka boko bosoyokana, wuke bo bato bakakosie esuku la nkabakaba, ibango baayokake batepela, bato la bato oko iyoyi li nde li nza. ⁷ Bakakatanake pe bakabake, batepele pe boe, Bosolenda! Bane bankuna ba yokanasa, bo ntaange basi Galilaya? ⁸ Ngako so toayoka oko bayoyi ba so ba nza, boto la boto oko iyoyi li nde nkika ngamoni? ⁹ Tole ane bamo Bapalatiya, la Bamadayi, la Baelama; bankina balamba oko Mesopotamiya, la Yuda, la Kapadokiya, la Ponto, la Asia, ¹⁰ La Fulugiya, la Panfuliya, la Ezipeto, la yeti le Libwe oko ntundu le Kulene; bankina ngendia bi Baloma, la Bayuda, la bane basakokayima Bayuda, ¹¹ La basi Kelete, la Baalaba, Yaaka so toayo oko bayoyi ba so la ntepele bisali bika Wangi biinene. ¹² Boankumela bakapake pe badingatanake oko bebonda, bakatepelake boe, Lobo lone lole itina be? ¹³ Bato bankina baatweke boe, Basonyota vinyo le peeli-peeli. ¹⁴ Yaaka Petelo ayemale ok'etetei eka ba diomu l'omo, anangole iyoyi li nde pe aalakake ndee, Bele be Bayuda, la nyoankumela balamba oni Yelusalema, bopaaka loboene loyetatane ok'ole nyo, pe boyokitie bayoyi ba mi. ¹⁵ Ibango bane ba yene nyo, ntaasoyotwa vinyo nga otangela nyo ye, ibango lelo ekili nko lopoma lo bisato lo wane. ¹⁶ Yaaka lone ele loba lokotefwa la bobambi Yoele ndee. ¹⁷ Wangi atepele ndee, Oko nsio bi bokuma engoyala ngane, Mi mie ngoyitomola bato batubankunela Elimo le Mi Bana ba nyo ba bale, la bana ba nyo ba beto bangolaka, pe bilenge bi nyo bangoyene bimwenge, Pe bingambi bi nyo bangoloto nzoli. ¹⁸ Pe la bentamba be mi, la bele la beto oko bio nsio biko ngoayitomola Elimo le Mi, pe bangolaka. ¹⁹ Ngolakia bimwenge oko liko, pe bilimbetelo oni nse la balongo, la twe, la ngondi le bolinga. ²⁰ Wane bongokalomwa mpitano pe weli bongokalomoa balongo, oko ntondo le loya loka Lisio loka Nkolo, losio loko loenene, losio lo binkemwa. ²¹ Pe onkeni longobesia lina lika Nkolo, Angobika. ²² Bele be Yisalaele, boyokitia mbo bine, Yesu le bosi Nazaleta aliki wele bone, bonki Wangi alakie oko etetei le nyo la bisali nguya, la bimwenge, la bilimbetelo, biki Wangi akelake oko babo bande oko etetei le nyo, la nkonga oyeba nyo nyonkika. ²³ Nde apawuake la wango boki Wangi ayangake pe la dianya liki nde ayebake ntondo, pe nyo bosobakia ok'ingengola, pe bosodiaka oko baba baka bato ba kamba Bokengo. ²⁴ Wangi pe asotungola oko mbabali le iwa, pe akokundola , ibango iwa ntailiki la nguya le nkuke nde ye. ²⁵ Ibango Dawidi atepela la itina li nde ndee, Nyeneke Nkolo oko ntondo le mi ngengo binkuma, ibango ale oko lobo lo mi lo ndeli nkanga ntisosukasana. ²⁶ Kio kieko bobonda bo mi boyoka nyinga, pe lolemi lomi loso tandwa, pe bienge bi mi lelo bilendela la elikia. ²⁷ Ibango ntongolalia boboto bo mi oko ndie eka bawi ye, pe ntongolialia Bokolami bo wu bopondu nyeneyene pe ye, ²⁸ Osondakia mi mboka le bokolo, pe ongonyotia mi la nyinga oko ndie le wu. ²⁹ Bambale, mbongo la ntepele nyo polele lama la nkaka Dawidi mie, asakowa pe akundame, pe ebomba le nde el'oni etetei le so kuu la wane bo lene. ³⁰ Nde pe bobambi, pe ayetake ndee Wangi asakoosimbela nyimi ndendee bato omo lo ibotwa, li bienge bi nde angoyala anse oko mata le bonkumu bo nde. ³¹ Atalelake ngako ntondo, pe atepele l'itina lika bakundwelo baka Masiya ndee, ntatwenyawa oko ndie eka bwi ye, pe bienge bi nde ntaipondo ye. ³² L'itina lika Yesu ene, Wingi asookundolo, pe soankuma tole batati baka loboene. ³³ Ngako eki nde asosia nangwa oko loka Wangi lo ndeli pe eki nde asosia mbae ileno li Elimo le Tee eka Papa, asoyitolola kio l'eyene nyo pe l'eyoka nyo. ³⁴ Ibango Dawidi ntanangwa oko Liko ye, nde atepele ndee, Nkolo atepele Nkolo le mi ndende, yalaka anse oko lobo lo mi lo ndeli, ³⁵ Kuu la ngengo enga mi ntike bempendo be wu nkonga enangielo le bakolo ba wu. ³⁶ Ngako paaka ibotwa linkuma li Yisalaele bayebe sosolobae Wangi asakooyilia Nkolo pe Masiya, nde Yesu eko eki nyo bobakiake ok'ingengola. ³⁷ Ngang'eki bo basoyoka ngako, bebonda bebo besukwe, pe batepele Petelo la ntomwa binkina boe, Toleke ngamoni, bambale? ³⁸ Telelo aakalole ndee, Bokalomola bebonda, pe boyinwe omo la omo oko lina lika Yesu, Masiya l'itana bosawue bo bobe bo nyo, pe bongaba ikapo li Elimo le tee. ³⁹ Ibango ileno liko lile la intina li nyo, la bana ba nyo, la bako bankumela ba lamba botale, bako bankumela ba lamba botale, boka bankumela bango Nkolo Wangi abesie. ⁴⁰ Pe oko ntepela binkina boe, Tokele binkina wuke aatepela, la mpae bo ilako ndee, Bokalamolaka la ibotwe line li bonfunda! ⁴¹ Ngako bane bakoyamba balako ba nde bayinwe, pe oko lo losio loko bato nkonga nkoto bisato balameme la ba. ⁴² Ngengo binguma baliki balako baka ntomwa nzokitia, oko esuku, la oko ngengo le efulu nsukona, pe oko mbotitia. ⁴³ Bomo botikele bato bankumela, pe bimwenge wuke, la bilimbotele bikokelwa oko baba baka ntomwa, ⁴⁴ Bayambi bankumela balamenake ndeimo, pe biemba bi bo binkumela biliki nko ndiemo. ⁴⁵ Batekeke batia ba bo la biemba binkina pe baikapake kweli ok'ole bato bankuma ngonga eki bokamba boliki. ⁴⁶ Losio la losio bakosamake la bobonda bomo oko lowulu lo Bowangi pe basukonake efula oko lowulu la lowulu pe bakapake biemba bi ndekeleke la nyinga pe la bokolami oko bebonda, ⁴⁷ Wangi nsangola, pe la ntelie bato bankumela, Nkolo pe anangiake bane, bakobikaka losio oko liko li bosio boobo.