¹ Ngeng'eki bo basobeke lobo boe tokende la baswa oko Italia, basembole Paolo, ndia bawutwe bankina namia, oko babo baka Kapiteni emo le poloto le baloi baka Auguseto nkumu lenene, lina li nde Yulio. ² Toyotwake swe oko baswa ba Adulamutiona bakoliki kosanu la sa oko nza bile oko babongo ba benkili be Asia, pe tosekwake. Alisitaluko, bosi Makedonia oko nza le Tesalonike aliki ndiemo la so. ³ Oko losio lo mbisa tosekemeke oko Sidona, oe Yuli akelake Paolo bo boto wuke. Aopake mboka le nde nde nde bambale ba nde, la mbae bosungi oko babo baabo. ⁴ Tosekwake ako pe tolekake oko mbise KUpulio ibango beembo betoyisenake mbisa. ⁵ Tobekeke nzale la mpenda losi lo Kilikia la Pampulia, pe toyiake oko Mula oko mbotu bi Lukia. ⁶ Kapiteni eka baloi atane baswa ba Alesandulia ako, bakoliki la nsa oko Italia, pe atoyotie soankuma oko bo. ⁷ Tosenamake bolu-bolu nsio wuke pe toyiake oko Kinido la bonyuku, ibango weembo ntabotopaake ngengo ye, tolekake oko mbise Kulete songaa la Salamona; ⁸ akope nko la wembu toyiake oko ndie emo mpika la nza lina Lesea, lina li kio Babongo ba dilo. ⁹ Ngengo le wuke elekake nk'oko lokendo, pe lokendo loko lo losi loliki la bomo, ibango ileno li biemba nkina-kina lisoleka, ngako Paolo aanywetiake nde ndee, ¹⁰ Bapapa, nyene mimie lokendo lone longoyala la bolingatano pe la ibomi li wuke, ntenge nko l'itina lika biemba pe baswa ye, yaaka la l'itina li so nkika. ¹¹ Yaaka kapiteni eka baloi ayambake munya boka kapiteni le baswa la pe munya boka bondwa baswa, pe aboyake munya boka Paolo. ¹² Ibongo liko ntaliliki ndie le dilo le nsekeme oko ngengo le mpio nsio wuke ye, ngako bato wuke bakayoke boe bayime ako, laa bangoyosono la nzie oko Poinike la ndendela nsio bi mpio ako, ibango ibongo liko li Kulete liyete liyelele Esete-Nodo la pe Sudu-Esete. ¹³ Wembo bo bolu-bolu bofumpake yima ngele, pe batangelake boe bongoasunga, ngako banangole lokongo lo baswa pe basenamake mpika la bonkili bo Kulete. ¹⁴ Oko mbiseko wembo bo wembu wuke lina Eulakulo boyimake oko engenza, ¹⁵ bofumpake oko baswa la nguya wuke, pe ntabayosonoko lonkina la mpae wembo botu ye; ngako totwenyake nkeka-keka pe tosukwake nko ngako nsukwa-skwa la wembo. ¹⁶ Yaaka toyiake oko mbise esika emo lina li kio Kaudam pe nko la bonzenze tobaake nguya le mbute ebeye, ¹⁷ pe bakenangole, baketike oko nse le baswa la ndala-lala. Yaaka bayokake bomo boe laa pe bangosa nko ngako nsukwa la wembo kuu nko Suluti, pe ngeng'eki bo basotulola biemba bikosondaka nkomba oko liko li baswa, basakosukwe la wembo nko ngako. ¹⁸ Ako ngeng'eki so toloke la wembo bo wembu, oko losio lo mbisa babangake nsapola biemba, ¹⁹ pe oko losio lo bisato, la babo baabo nkika baboke biemba wuke oko losi. ²⁰ Oko nsio wuke, laa wane ntabopaswe ye, pe laa bioto ntaboyeneli ye, wembo oko bofumpake nta wembu ntwenya pe ye, ngako elikia enkumela ekoliki la so le mbikia bienge biso ebangake nsia-sia. ²¹ Edie lenene bakambake ile, ngako Paolo ayemale ok'etetei le bo la ntepela ndee, Ba papa, ebongoke boyoke mbo bi mi, pe ntebongoko toyime oko Kulete. Bokanokela ngako ntumbe ntabokanobaa bodingatano bone pe la ibomi line ye. ²² Yaaka akoboko mebotitia mie bokande lomo, ibango nkia boto omo ok'etetei le so longa boboto bopitana ye, yaaka nko baswa bangopitana. ²³ Ibango oko botio bone bosoleka, ntomwa eka Wangi bone bole mi boto lo nde, bone pe bo tiela mi, amoyemale ok'ole mi, ²⁴ la ntepela ndee, Ntolotake ye Paolo! Ekolama la wu nko oyemale oko beso baka Kaisala, pe Wangi akosokopaa lobiko l'itina lika lika bane bankumela ba leka la wu oni baswa bane. ²⁵ Kio kieko ngako, ba papa, bokandaka lomo, ibango nzambela Wangi mie engoyala nko ngako, nga oki nde asoonzebia mi. ²⁶ Yaaka ekolama la so tobokwe oko ensokoloko emo. ²⁷ La botio bo losio lo diomu la binei, tokoswake nko nsukwa-sukwa oko losi lo Adulia; pe la etetei le botio bato ba baswa batangelake boe toya mpika la mbongo. ²⁸ Ngeng'eki bo basoboka boliko la nkela-kela, bayene noe bolindo boliki meko nzombale, balendake nio, la mbisa bayitie mboke boliko oko losi mbala ekina, babae bolindo bo meka diomu la bitano. ²⁹ Bayokake bomo boe laa pe wembo bongoasukomola oko bawe, ngako baboke nkonga binei oko losi bikoliki oko mbisa le baswa, pe balendelake loyekelo lo mpendu la mposa lenene. ³⁰ Yaaka bato bakoliki oko baswa bapaswake, balotake baswa ndota-lota; batulole ebeye oko losi, bayengisake boe bakana baboke lokongo lonkina oko ntondo le baswa. ³¹ Yaaka Paolo atepele kapitani la pe baloi nde ndee, soo nko bane batikake oni baswa, laa ye, nyo ntaboyosono mbika-bika ye. ³² La mbisa baloi babeke beliko be ebeye, pe bakekisene. ³³ Yaaka ngeng'eki mpendu eya mpika la nzombwa, Paolo apake ilako ok'ole bankumela ndee bale biemba. Atepele ndee, Lane ele losio lo diomu la binei, yemba ndeke-leke ye, bosokina biemba la elikia. ³⁴ Kio kieko ngako, mepa ilako akoboko mi mie bolekeke efula, ibango lobo lone lole l'itina li lobiko lo nyo. Nkia booso bomo bo lobo lo ntabongoyima ye. ³⁵ Ngeng'eki nde asoseya ntepele ngako, apose efula, apake Wangi bitelia oko beso ba boankumela, akeyatole, pe abangake ndeke-leke. ³⁶ Boankumela pe ba bae nkusa, bapose bifula pe babangake ndeke-leke bo nkika. ³⁷ Soankumela oko baswa toliki bato benkama bepele la bosambiale la bato basamalo. ³⁸ Ngeng'eki bo basonyota la ile, babokake basangu oko losi la nkisena bolito boka baswa. ³⁹ Ngeng'eki mpendu esoyombwa wee, batii ba baswa ntaadimbetelaka nse lesobeleme la ye, yaaka bayeleke ikumba limo oko mbongo le bekongo, ngako balangake nzotia baswa ako kio ndieko, laa pe bangoyosono. ⁴⁰ Ngako babeke nkamba bi nkongo binkumela, balaliake nkia la nkongo nk'oko losi, pe oko kio ngengo eko basotole biamba benkuma be yeeenda. La mbisa banangole esenda oko ntondo le baswa la ndala wemba, ngako pe babengake kio mbongo eko. ⁴¹ Yaaka bayiake oko ndie lepomala ndosi bipele, pe baswa bakakema. Ndumbu le ntondo le baswa ekakeme nta wembu wuke, pe ntekekalake nkia mfukasana ye, yaaka nsoli le mbisa le baswa ebangake nsukwa la nguya eka boketi. ⁴² Baloi baliki la mposa boe badiake bawute, ibango bayokake bomo boe nkanga bamo baabo ntaasolota oko losi. ⁴³ Yaaka Kapiteni le bo aliki la mposa le mbikie Paolo, ngako aboye waango boobo, pe apake munya nde ndee, ntondo, bane ba yeba nyanya-nyanya bakaboke oko losi babenge mbongo, ⁴⁴ pe la mbisa bane bangotikala, bamo bawute babaya, bamo pe bawute biemba bi baswa. Ngako boankumela bayiake oko mbongo.