¹ Agulipa atepele Paolo nde ndee, Odia ngengo le ntepela lama la wu nkika. La mbisa Paolo asembole lobo lo nde, pe akalole ndee, ² Nkumu Agulipa, nkatolo boto lo nyinga, ibango nsoba ngengo lene le nkalola oko ntondo le wu lama la mbo binkumela bine bi mfunda Bayuda la bio, ³ ibango awu oyeba biyali la biango beka Bayuda nta dilo. Kio kieko lekobotitia mi mie onzokitake la bokandi bo lomo. ⁴ Lama la eyali le mi yima nko bolenge bo mi, ngeng'eki mi ndiki ntondo-ntondo, ok'etetei le ibotwa li mi pe oko Yelusalema, Bayuda bankumela bayeba. ⁵ Ba nzebake mi yima nko kala-kala, bakanoyala la mposa lentepela, boe ndiki Bofalisai oko dweli loka ekinda le sonda bolito ok'etetei le boyambi boso. ⁶ Akoboko nsoyemala ane l'itina li nsambwa l'itina lika elikia le ileno liki Wangi apaake ok'ole bankaka ba so. ⁷ Babotwa ba so diomu la bapele balia elikia le mbae dilo ileno liko, ibango babotitia ok'ole Wangi la wane la botio. Ele nko l'itina li kio elikia ene, Bayuda ba mfunda mi, oo nkumu. ⁸ Nyo botolo lobo eko nyoe ntalokolame la nzamba-yamba, nyoe te Wangi akundola bawi itina be? ⁹ MI nkika ntangelake mie ekolama la mi nkele mbo bi ndoisa etumba esongo la Yesu le bosi Nazaleta. ¹⁰ Nkelake ngako oko Yelusalema. Mposoke pe bokanda ok'ole bingambi bi bankanga, ngako pe mbutake bakolami wuke oko mbulu bi bakamba, pe oko ngengo eki bo baakiakake, mi nkika mpaake munya mie soo nko bawe. ¹¹ Mbale wuke, nsakokende oko mbulu bi bowangi, pe manyokoloke l'itina mie nsokeka mpekele bo mbo bika Wangi. Ndiki la lumu wuke ngako pe nsakoabenge kuu nk'oko bise binkika bi ngendia. ¹² Ngeng'eki mi nkelake ngako, nsake oko Damaseke la bonkumu pe la lotomo loka bingambi bi bankanga. ¹³ OKo mboka, oko lopoma lo diomu la bipele lo wane, nkumu, mi nyeneke nsasi bi twe oko ekeselo le wembu biyima oko liko, losondake lokosa loka wane, pe lotokosele soankumela bakoliki oko loselele lo lokendo. ¹⁴ Soankumela tokitake oko nse, pe nzokake iyoyi litepela oko munya bo liela lioe, Saula, Saula, l'itina be li nyokolo wu? Okatoisa wale la nyemala esongo, nkonga nyate le kamba bototie ok'ole nkolo le nde. ¹⁵ Mi ntepelake mie, Te awu nani, Nkolo? Ngako Nkolo akalole ndee, mi Yesu le nyokolo wu. ¹⁶ Yaaka, yemalaka oko bakolo ba wu, ibango nsokalakia ok'ole wu l'itina mie nkoyalie wu botii bo mi, pe bosoni boka mbo bisa wu oyene oni ole mi, pe boka mbo bi nga wu oyene oko ntondo'ekendo. ¹⁷ Ngokobikia wu oko babo baka bato bane pe oko babo baka ngendia biinga mi nkotome ok'ole bo la ndipole bo beso, ¹⁸ l'itina mie bayime oko mpitamo baye oko tee, pe bayime ok'ole Satana baye ok'ole Wangi, l'itina mie ba bae bosawue bo bobe pe ikonda ok'ole bakolami bane basako nzambela mi. ¹⁹ Ngako, nkumu Agulipa, ntiyosonoko nsenge bototie oko boyenelo bo liko ye, ²⁰ yaaka ndambake mia bo oko Damaseke ntondo, la pe ok'ole basi Yelusalema, la pe oko nse enkumela le Yuda, la pe oko ngendia mie bakalomole bebonda, baye ok'ole Wangi, bakele pe bisali bi kolama la bokalomoli bo bebonda. ²¹ Lama la bio mbo biko, Bayuda bayombuta oko lowulu loka Wangi, pe bakakotake la ndiake mi. ²² Ngako ngeng'eki mi nsobaa bosungi yima ok'ole Wangi, nyemalake kuu la wane bo lene ndaka-laka ok'ole bato ba nio-nio la pe ok'ole bato ba nene, pe ntilokopele lobo lonkina ye, nko mbo biki babambi la pe Mose batepelake boe bingopaswa, ²³ bo boe ekolamake la Masiya nko ato wale, lonkina bo be nde boto lo ntondobokundwi yima oko bawi, aliki la mposa ndee alake lama la tee oni ibotwa line pe ok'ole ngendia. ²⁴ Ngeng'eki Paolo akalolake lama la bio mbo bine, Peseto atepele la iyoyi li wembu ndee, Paolo, osokono lokeye! Loyeka wuke lowu lo bekanda losokokonia lokeye. Yaaka Paolo atepele ndee, Peseto, boto lo lumu, ntimbia lokeye ye. ²⁵ Yaaka ntepela mbo bi kweli pe bi bososolo. ²⁶ Ibango nkumu ayeba itina lika bio mbo biko, ngako motepele polele, ibango nzebe mie ntembia nkia lobo lomo lokamba nde nzeba-yeba ye, ibango mbo bine ntabikelwa oko nkuku ye. ²⁷ Nkumu Agulipa, oyamba mbo bika babambi? Nzeba mi mie oyamba. ²⁸ Agulipa atepele Paolo nde ndee, olanga wue o nkele mi boyambi bo nsukomola oni wano ngengo nio l'itina wue mi nkele basali bika Boyambi boka Masiya? ²⁹ Paolo akalole ndee, Mbotitia Wangi mi mie, nkia akoboko, nkia pe ngengo leyaka, awu nkika ye, yaaka la bane ba yokili bi tepeli mi lene, bayale nkonga mi, yaaka oko balalo nga bami ye. ³⁰ Ngako nkumu ayemale wema, la pe bondwa nse, la Belukike, la bankina bakoliki anse, ³¹ pe ngeng'eki bo basoyima ako, bakatepele boe, boto one ntakelili nkia lomo lokolama la iwa laa pe la ikamba ye. ³² Agulipa atepele Peseto ndee, Laa boto one ntayubola mboka le nse ok'ole Kaisala ye, ntumbe akanotungwa.