¹ Ngeng'eki so tososia, tolimbetelake soe mbongo eko eliki mbongo le Melita. ² Bato baka kio ndieko batokelake boboto wuke. Bakatiake twe, pe batosaangale soankumela la dilo wuke ibango eliki pe la mbula pe la mpio wuke. ³ Paolo akosiake ebolo le nkini, pe akeboke oko twe, yaaka eliki la nzo lina itupa lekofunzoa yima oko nkoni biko ibango la twe, pe elameme oko lobo lo nde nke-nkee. ⁴ Eki bato bako basoyene kio nzo eko ndanema oko lobo lo nde, bakatepele boe, Nko solo boto one ale ediaka bato! Nkia asobika oko losi, yaaka bakolami ntabongoyosono la ndalie nde la bokolo ye. ⁵ Yaaka nde afukise nzo oko twe, pe ntatolo wale ye. ⁶ Yaaka bo balendake boe laape bienge bingoyama, laape angowa nkanyomola. Ngeng'eki bo basolendela edie, bayeneke boe ntengia nkia lobo lomo lo bobe longokelwa ye, bakalomole bebonda la ntepela boe, Nde ale wangi. ⁷ Mpika la kio ndie eko, eliki la itia lika bondwa kio esanga eko lina li nde Pubelio. Nde pe atoyambe oko lowulu lo nde, pe Atotamie ako la boboto wuke nsio bisato. ⁸ Papa eka Pubelio akononoke isakema pe wale oko ibale. Paolo ayotwe swe oko lowulu lo nde, abotitie, aosangie babo, pe aobikie. ⁹ Oko mbisa eka lobo loko, bato bankina bakokonoko oko nza eko bayake ok'ole nde pe babikake boankumela. ¹⁰ Batoteliake la bitelia bi wuke, pe ngeng'eki so toyimake ako, bayotiake biemba biki so tokambake oko baswa. ¹¹ Oko mbise benzali besato toyimake ako la baswa ba Alesandulia lina Mboo ndia Mpia, baswa bako baliki ako edie wuke la ndendela bonzali bo mpio. ¹² Tosekeme oko Salakusa pe toliki ako nsio bisato. ¹³ Toyime ako pe tose oko Legio, pe oko mbise losio wembo bokoyimaka ngele bobangake mfumpa-mfumpa, pe oko losio lo bipele toyiake oko Puteoli. ¹⁴ Topomalake soa bambale ako, pe batobesie bose toyale soa bo nsio bisambiale, la mbis'eko toyiake oko Loma. ¹⁵ Bambale bakoliki ako bayoke nsango biso, pe baye kuu nko Yango le Apio, pe kuu mko Betumba-Besato la mpomala la so. Ngeng'eki Paolo asoyene, ateliake Wangi wuke akandake lomo. ¹⁶ Ngeng'eki so tosoyia oko Loma, bapake Paolo ndie le nzala-yala le nde-nkika, la pe boloi bomo la nkenge nde. ¹⁷ Oko mbise nsio bisato abesiake bingambi bi Bayuda mpomala la nde. Eki bo basa kosama, aatepele ndee, Bambale, mi nkia ntikelili lobo lomo lo bobe oni ibotwa liso, laa pe bekengo beka bankaka ba so mpita ye, nsakopawua bowute oko babo baka Baloma ba Yelusalema. ¹⁸ Oko mbise nzubole mi, bakanake boe bantungole, ibango ntabayeneke nkia lobo lomo lokolama la iwa ok'ole mi ye. ¹⁹ Yaaka Bayuda baboye, ngako ekolamake la mi nko nse ok'ole Kaisala, yaaka ntingia nkia lobo lomo lo funda mi ibotwa limi ye. ²⁰ Kio kieko, nsoebesia nyo l'itina mie meyene nyo, pe tosimole mia nyo, ibango bankokoso bone bo tungi la mi, bole l'itina lika ilikia eka Bayisalaele. ²¹ Yaaka bo baokalole boe, So ntatobali bekanda be yima oko Yuda lama la wu ye. Nkia la pe omo lo bambale ba so ntayili nsangele so bontika la pe ntepele so lomo lo bobe l'itina li wu ye. ²² Yaaka so tolia mposa le nzokitie batangeli ba wu oko munya bo wu nkika, ibango l'itina lika ekinda ene, loyebana ok'ole so loe, eboywa oko ndie binkumela. ²³ Bakolimiake isilo li mpomala boa nde, pe oko lo losio loko bo bakolimiake ileno, bato wuke bayake oko lowulu lo nde. Aalimbolake nta itina lika Bonkumu boka Wangi, yima nko mpendu kuu nko botio, pe aatepelake polele dweli lo lami mbo bika Yesu la Bekengo beka Mose, la pe mbo bika babambi. ²⁴ Bankina bayambake mbo biki nde atepelake, bamo pe baboyake nzamba-yamba. ²⁵ Oki bo ntababongoko nzokana, bakalamole. Yaaka Paolo atepele lobo lone lonkina nde ndee, nko solo Elimo le Tee atepelake ok'ole bankaka ba nyo oko munya boka babambi Yesaya nde ndee, ²⁶ leka osotepele bato bako wue, bongoyoka oko batoyi yaaka ntabongowuta itina ye. Bongolenda la beso yaaka ntabongoyene ye. ²⁷ Ibango bebonda beka bato bane besakoyenza la wembu, bayokili la batoyi ba bodito, pe basolipa beso ba bo, l'itina boe nkanga ntaasoyene, pe nkanga ntaasoyoka la batoyi, pe nkanga ntaasowuta itina oko bebonda, nkanga pe ntaasoyitia boe mabikie. ²⁸ Ngako ekolama la nyo nzeba-yeba nyoe lobiko lone loka Wangi losakotomwa ok'ole ngendia, ngako bo pe bangoyoka. ²⁹ Eki nde asoseya ntepele mbo biko, Bayuda bakayalomole, pe bakelake biango be wembu ok'etetei le bo. ³⁰ Paolo aliki edie lenene mpela bipele bombondo oko lowulu lo nde nkika lo mfutela, pe ayambake bato bankumela bakoyaka ok'ole nde nko la dilo, ³¹ alakake bato mbo bi bonkumu boka Wangi pe asangelake bato bentika beka Yesu Masiya nta polele, pe nteliki nkia la boto lokoopekela ye.