¹ Paolo alende ekokayolo, pe atepele ndee, bambale bele, mi nsokende oko lianya li dilo wuke oko ntondo eka Wangi kuu la losio lo lene. ² Anania, engambi e nkanga asikise ok'ole bato bakoliki mpika la nde nde ndee, baobole biemba oko munya. ³ La mbisa Paolo aotepele ndee, Awu ole epele esa bakula mpembe! Esotikala nko nio Wangi angokobola yemba! Awu okokatika anse ako la nsambise mi nkonga oko dweli loka bekengo, pe opita bekengo la ntome bato bandiake mi? ⁴ Bako bakoyemalake mpika ako batepele boe, Awu otwa engambi e nkanga eka Wangi? ⁵ Yaaka Paolo atepele ndee, ntiyebake ye, bambale, mie nde ale engambi e nkanga, ibango losakosonwa loe ⁶ Paolo eyebake ndee, ok'etetei le bo bamo Basadoke, bamo pe Bapalosi, ngako apame ok'etetei le Ekokayolo nde ndee, bambale bele, mi Bopalosi, wana oka Bapalosi! Ane bo nsambisa mi ibango la elikia le bakundwelo baka bawi! ⁷ Lotefwa ngane loe, bolingatano bosopaswa ok'etetei eka Bapalosi la pe Basadoke, pe Ekokayolo esokalamola. ⁸ Ibango Basadoke batepela ngane boe bakundwelo ntabang'oko ye, pe ntomwa ye, Elimo pe ye, yaaka Bapalosi bayamba biko binkumela. ⁹ Ngako bolingatano bopaswake wuke, pe bamo bakoliki basoneli bayemale ok'etetei eka Bapalosi, pe batepele la wembu boe, ntatoyenili nkia lobo lomo lo bobe oko bienge bika boto one ye. Laa pe Elimo aotepela, laa pe ntomwa le liko, ako ele be? ¹⁰ Yaaka ako oki bolingatano bo wuke bopaswe ok'etetei le bo, nkumu eka baloi ayokake bomo, atangelake ndee bangoyatola Paolo bienge oko biteni, ngako apake munya ok'ole nde ndee batulwe ta-taa la nyimie nde ok'etetei le bo la wembu, pe la mbisa baoyotie oko lowulu lo bo. ¹² Ngeng'eki mpendu esoyombwa, Bayuda bayange waango, pe basimbe nyimi boe ntabangole yemba ye pe ntabangomina ye kuu nko onga bo badiaka Paolo. ¹³ Bosio boka bato bako bakosimbaka kio nyimi eko basondake bato bonei. ¹⁴ Base ok'ole bingambi bi nkanga la pe bingambi bi nza, pe batepele boe, Tososeya nsimbe nyimi le wembi soe ntatongole nkia yemba ene emo ye kuu nko onga so todiaka Paolo. ¹⁵ Ngako nyo oko ekokayolo botepela nkumu eka baloi poleele nyoe aotulole ane ok'etetei le Ekokayolo le nyo, nkonga nyoe bolia mposa le nzipole nde mbo nta sisoo. Yaaka bolia so tongoyala kosanu la ndiake nde lelo ntayili moika oni ole nyo ye. ¹⁶ Wana lo wele oko mpaka eka Paolo, ayoke dio ilonga libo, pe aye nzotwa oko lowulu loka baloi pe ayebie Paolo. ¹⁷ Paolo pe abesie omo lo ba kapiteni, pe aotepele ndee, Bela wana one lo wele ok'ole nkumu eka baloi, ibango alia lobo lolanga nde ntepele nde. ¹⁸ Ngako ase la nde, aobele kuu nk'ole nkumu eka baloi, pe atepele ndee, Bowutwe bo Paolo a mbise mi, ambotitie nde ndee nziise wana one lo wele oni ole wu. Alia lobo lo ntepele wu. ¹⁹ Nkumu eka aopose oko lobo pe ase la nde oko nta ndie le bo, pe aoyubole ndee, lobo lodia wu la ntepele mi lole be? ²⁰ Atepele ndee Bayuda basokayoka boe bakobotitie otulole Paolo oko Ekokayolo lobi, nkonga bato ba kana nsipole mbo nta dilo l'itina li nde. ²¹ Ngako awu ntoyambake mbo bi bo ye, ibango bele bosio bo sonda bonei baolendela. Bo basakosimba nyimi boe ntabale yemba ye pe ntabamine ye kuu nko enga bo ba diaka Paolo, pe akoboko basokakosia, balendela nko ileno li wu. ²² Ngako nkumu eka baloi apasole elenge le wele, pe aosikise ndee, ntotepelake nkia boto omo ye wue osobela lobo lone oni ole mi. ²³ Nkumu eka baloi abesie ba kapiteni bapele ndee, bokosiaka baloi benkama bepele l'itina mie base oko Kaisalia la lopoma lo bisato lo botio, la bato balia mfunda bosambiale, la bato balia bakongo benkama bepele. ²⁴ Bokosiaka pe mfunda l'itina li nangie Paolo, booyiise pe ok'ole Pelika le nkumu le mbotu la bienge wembu. ²⁵ Asone pe bokanda bo dweli lone; ²⁶ Mi Kulaudio Losia, ok'ole wu pelika le nkumu le mbotu, boto lo lowu wuke, beseso. ²⁷ Bayuda bawutake wele bone, ngeng'eki bo basokakolimia la ndiake nde, nsake la baloi la mbikie nde, ibango nzokake boe nde ale Boloma. ²⁸ Ndangake pe mie nzebe itina be liofunda bo, ngako moyotiake ok'etetei le Ekokayolo le bo, ²⁹ pe nyeneke mie, boafunda l'itina lika biango lama la bekengo be bo, yaaka ntafundwa nkia l'itina li lobo ye lokama la iwa pe la ikamba. ³⁰ Yaaka basontepela boe waango bol'oko lama la wele bone, ngako nsokotomia nde ta-taa, pe nsotoma lotomo ok'ole bafundi ba nde mie bayotepele oko ntondo le wu. ³¹ Ngako, nkonga oki baloi babae munya, bapose Paolo, pe baobele la botio oko antipatulo. ³² Oko mbise losio bapake bato balia mfunda base la nde, yaaka bo nkika bayitie oko lowulu loka baloi. ³³ Bato ba mfunda bayiake oko Kaisalia, pe bayambie bokanda ok'ole nkumu le mbotu, ngako babele Paolo oko ntondo le nde. ³⁴ Nkumu le mbotu atange bokanda pe ayubole Paolo nza eki nde ayimake. Eki nde asoyeba ndee ayimake oko KIlikia, ³⁵ atepele ndee laa bafundi ba wu basobele, ngoyokitia lobo lowu. Apake munya nde ndee baokosie oko lowulu loka Elode.