¹ Oki mbise nsio bitano, Anania engambi e nkanga, akitele oko Kaisalia, ndia bankina ba bingambi bi nza, la boto omo lina telutulo, nde aliki boto lokoyebaka ntepela wuke. Bato bako bankumela bapasole lobo loka Paolo oko beso baka nkumu le mbotu. ² Babesie Paolo, pe Tuelutulo abangake mfunde Paolo ndee, Oo Pelika, boto lo lumu wuke, so toyoka nyinga wuke lama la totolo le wu, bisali bi dilo wuke pe bisokelwa oni etetei le ibotwa line l'itina lika boyeli bo wu. ³ Tolokoyambe bine binkuma la betelia wuke ntundu la ntundu. ⁴ Yaaka ntilange nkande wu ane edie-edie ye, ngako nkobotitia mie, l'itina lika boboto bo wu, otoyokitiake lama la bana mbo bi nio-bio. ⁵ Ibango so tosolomola soe wele bone ale bosukoli bo bikokele ok'etetei eka Bayuda bankumela ba bolongo; nde ale engambi le ntondo oko esuku le basi Nazaleta. ⁶ Akekake pe la mpite lowulu lo bowangi, yaaka so tosowuta, pe toliki la mposa soe toosambise oko dweli lo bekengo be so. ⁷ Yaaka Lusia nkumu eka baloi ayotokumola nde oko babo la wembu, ⁸ pe atome lotomo ok'ole bafundi ba nde, ndee baye oni ole wu. Awu nkika ongoyosono la nzubole nde lama la mbo bine binkumela, l'itina wue oyebe ibango be lio funda so. ⁹ Bayuda pe bayambake, pe batepelake boe mbo biko binkumela bile nko ngako. ¹⁰ Bandwa nse afumpe lobo ok'ole Paolo la mpae nde ngengo le ntepela. Paolo akalole ndee, mi nzeba mie awu ole ntendi oni ibotwa line yima edie lenene, ngako nzoka nyinga la mpae nkalo lama la mbo bi mi. ¹¹ Okolama la nzeba-yeba wue yima nko losio loki mi nzilelake oko Yelusalema la mbotitia, nsio diomu la bipele nteliki ye. ¹² Ntabantana mi nkia losio lomo ye nkela biango mia boto laa pe nyumole esuku le bato ok'etetei le lowulu lo bowangi ye, laa pe oko ndie bekosamelo ye, laa pe ok'etetei le nza ye. ¹³ Ntaangoyosono pe mpae wu elimbetelo le kweli la nkonkimie mbo bine mfunda bo pe ye. ¹⁴ Yaaka mi ntepela la bososolo oko beso ba wu mie mi ntiela Wangi boka bankaka ba so oko dweli lone lotolo bo bonkika boe lobengwa. Nzamba mbo binkumela bisakosonwa oko Bekengo pe babambi. ¹⁵ Ndia elikia ok'ole Wangi, bone bo yamba pe la bato bane, boe bakundwelo bangoyala, la ok'ole bato ba pie-pie, la ok'ole bane bampatonge pie-pie. ¹⁶ Mi ndokotulole bobonda oko lobo lone mie ngengo binkumela mi ndia loyebako lo sosolo l'itina lika Wangi pe l'itina lika bato. ¹⁷ Oko mbise mpela wuke, mi nzitiake ok'etetei le ibotwa li mi la nkapele bato bakapo ba isei pe la mpae mbeka. ¹⁸ Ngengo eki mi nkelake biko, ba ntanake mi bokolami oko lowulu loka Wangi, ntiliki mia esuku le bato ye, nteliki pe la ikakasa ye. Yaaka Bayuda bane bakoyimaka oko Asia baliki ako; ¹⁹ emokalome wue la bo bayale ane oni ntondo le wu, ba mfunde, laa pe balia nkia lobo lomo loyosono bo mfunde mi. ²⁰ Laa pe ngako ye, paaka bane bale ane batepele la lobo, laa pe balia lobo losa bo ba mbaa mi la ekita ngeng'eyamala mi oni Ekokayolo, ²¹ laa pe ntenge lama la lobo loko lomo losaka mi ntepela mie, Nyo bo nsambisa mie lene lama la bakundwelo baka bawi. ²² Yaaka Pelika, oko lokowutake mbo bika mbok'eko binkumela batina, aapasole boankumela, pe atepele ndee, laa Lusia nkumu eka baloi asobele, ngoyeba mbeke lobo lo nyo. ²³ Apake munya ok'ole Kapiteni ndee akosie Paolo, yaaka ntaolalake ye, pe lonkina ndee ntapekelake bato ba nde-nkika la nsunge nde ye. ²⁴ Oko mbise bana nsio binkina, Pelika aye ndia ilaka li nde nde nkika lina Dulusila, lokoliki Boyuda, pe atome lotomo la mbesie Paolo, asakoyoka mbo bi nde lama la boyambi ok'ole Nkolo Yesu. ²⁵ Yaaka ngeng'eki nde asolaka mbo bi lami la bokolami, la bienge nkeke-keke, pe lama la Botendi bone booyaka, nde Pelika ayokake bomo, pe akalole ndee, Sosa nza la lowu lelo, yaaka laa nsobaa ndie, ngokobesia. ²⁷