¹ Bambale bele, la bapapa, boyokitiaka nkalo enga mi mekalola akoboko. ² Eki bo bayoke boe aatepela oko iyoyi li Ebele, basonde nzale totolo. Nde atepele ndee, ³ mi nde Boyuda, mbotwake oko Tuluso le Kilikia, yaaka mfulake oni nza ene. Nsakoyeka mbo binkumela bi lami la bekengo beka bankaka oko nse le bakolo baka Gamaliele. Ndiki boto lo mposa le lobo loka Wangi nkonga elo nyo lene. ⁴ Nsonyokolo mboka ene kuu nko iwa lika bato. Mawutake, la beto, la bele, pe mayotiake oko mbulu bi bakamba, ⁵ kweli nkonga onga engambi e nkanga la bingambi bi nza binkumela baetepela l'itina li mi. Mposoke bekanda ok'ole bo, l'itina mie nse oko Damaseke, pe nsake la lomi l'itina mie oko yelusalema bako bakoliki oko, la benkokoso, l'itina mie babae ikamba. ⁶ Nsakokende nko ngako, pe ndiki beli-beli la Damaseke mpika la midi, ta-taa lokeso lo twe lo wembu yima oko liko lo nkosele oko beso. ⁷ Nkitake oko mbotu, pe nzoke iyoyi li ntepela ndee, Saula, Saula, te onyokolo mi bokobo be? ⁸ Mi pe nzisenake nkalo mie, Te awu nani, Nkolo? Antepele ndee, mi Yesu le bosi Nazaleta, oko lo nyokolo wu. ⁹ Bane bakoliki ndiemo la mi bayeneke lo twe loko, yaaka ntabayokake iyoyi likotepelaka la mi ye. ¹⁰ La mbisa ntepele pe mie, Nkolo, te ane nkele be? Nkolo antepele ndee, Yumwaka, pe leka lalowu oko Damaseke, pe bangokotepela ako bingondi bi mbo bisakolondwa la wu nkela-kela. ¹¹ L'itina lika twe loko, ntiyosonoko nyeneyene ye, yaaka bane bakoliki ndiemo la ba mbutake oko lobo, ngako toyiake oko Damaseke. ¹² Pe wele bomo lina li nde Anania oko lokobotitiaka oko dweli loka bekengo pe aliki la betato be dilo oko beso baka Bayuda bankumela bakoliki ako, ¹³ ayake, yemaa oko ntondo le mi, pe atepele ndee, Mbale Saula, Yitia nyene-yene lonkina! Mi pe nzitie nyene-yene nk'oko kio ngeng'eko. ¹⁴ Pe atepele ndee, Wangi boka bankaka ba so asakokosolo nde ndee oyebe waango bo nde oyene Bokalami, pe oyoke iyoyi le nde. ¹⁵ Ibango ongoyala bolaki bo nde ok'ole bato bankulmela lama la mbo bi yenili wu pe bi yokili wu. ¹⁶ Akoboko olendela be? Yumwaka osoyinwe, pe ososake bobe bowu, osotoloke lina li nde. ¹⁷ Ngeng'eki mi nsoyitia oko Yelusaleme, ndiki oko etei le lowulu lo bowangi, pe nsake nkayi, ¹⁸ pe moyene nde nkika antepele nde, Paswaka ta-taa oyime oni Yelusalema, ibango ntingonyiminya botato bo wu l'itina li mi ye. ¹⁹ Ngako mi ntepele mie, Nkolo, bo nkika bayeba boe mi mowutake bayambi ba wu oko mbulu bi bakamba pe moadiakake la bemiekwa oko mbulu binkuma bi bikinda; ²⁰ pe ngeng'eki balongo baka Setepano bobambi bo wu bafundwake oko nse, mi nkika ndiki wema ako kio ndi'eko, pe ndangake lo lobo loko, pe ndiki boto lokokosiaka bisenda bika bato bako bakoodiakaka. ²¹ Nde pe antepele ndee, lekaka la wu, ibango mi ngokotama ok'ole ngendia bele. ²² Baoyokitiake oki nde atepelake lobo loko lonkumela, yaaka la mbisa banangole bayoyi ba bo boe, Yimia boto lo dweli lone oni bolongo! Ntekolame la ndalie nde la lokeno ye! ²³ Ngengo eki bo bapamake la ntepela, babokake bisenda bi bo, pe babokake bontuku oko liko, ²⁴ nkumu eka baloi atepele nde boyotia nde oko lowulu loka baloi, pe baoyubole la bemiekwa l'itina boe ayebe ibango li lobo be lio kela ngako. ²⁵ Eki bo basoseya ndale nde la nkamba, Paolo atepele ok'ole kapiteni eko lekoyemalake ko ndee, Te laa ntaasambisi Boloma ye, ako ekolama la mbole bemiekwa? ²⁶ Eki kapiteni asoyoka ngako, ase ok'ole nkumu le bo la ntepela ndee, Te ongokela ngamoni? Ibango boto one ale Baloma. ²⁷ Nkumu eka baloi aye ntepele Paolo nde ndee, ontepelake, awu ole Bolama? Nde pe ayambake. ²⁸ Nkumu eka baloi akalole ndee, mi nsombake bonsomi bone la bensongo wuke. Yaaka Paolo atepele ndee, Yaaka mi nsomi. ²⁹ Ngako bane bakolangaka ndiake nde la bemiekwa baotwenye, pe nkumu eka baloi ayokake bomo, ibango asoyeba ndee Paolo ale Boloma, nde pe akosoowuta.