¹ Ngeng'eki so tosokalamola soa bo, tosekwake pe tokendeke nko dilo Kosa; oko mbise losio toyiake oko Lode, pe yima ako kuu nko Palata. ² Ako toposoke baswa bakoliki kosanu la nse oko Poinike, ngako toyotwake oko bo, pe tosekwe. ³ Ngeng'eki so tososeya nyene Kupulio pe la ndalie kio epoka eko oko lobo lo nkoso, tosenamake kuu nko Sulia pe tosekemeke oko Tula, ibanmgo baswa baliki la biemba bi nsapola ako. ⁴ Toyalolake bayeki, pe ngeng'eki so tosoaba, toyalake edie ako nsio bisambiale. Bo batepelake ok'ole Paolo, lama la Elimo, boe ntayilelake oko Yelusalema ye. ⁵ Eki so tososeya nkokie sio biso, tosake la loso. Boankumela, la beto la bana bapaswake oko bosale bo nza ntindie so, pe tokukame la babongo ba so oko mbongo la mbotitia, ngako tokalamole. ⁶ So toyotwake swe oko baswa, yaaka bo bayitiake oko nza. ⁷ NGeng'eki lokendo loso losokuma oko Tula, toyiake oko Potolomi, oko tokasekake soe bambale pe toyalake nko losio lomo. ⁸ Oko losio lo mbisa toyimake ako pe toyiake oko Kaisalia, toyotwe swe oko lowulu loka Pilipo bolaki bo nsango dilo, one lokoliki omo lo basambiale, pe toyalake edie soa nde. ⁹ Nde aliki la bana ba beto banei, bakoyambaka, babembi. ¹⁰ Eki so tosoyala bana nsio wuke ako, bobembi bomo lina li nde Agaba, atulwake yima oko Yuda. ¹¹ Ayake ok'ole so, aposoke nkamba eka Paolo, akalinge babo la bakolo la kio, pe atepele ndee, Elimo le Tee atepela ngane nde ndee, Oni dweli lone, Bayuda ba Yelusalema bangolala wele bone bondwa nkamba ene, pe bangooyamba oko baka ngendia. ¹² Ngeng'eki so tosoyoka mbo biko, so soankumela soa bankina bakoliki la so ndiemo, tobotitiake Paolo soe ayale nkosa oko Yelusalema. ¹³ Yaaka PAolo akalole nde ndee, Te yemba lekela nyo be, bane olela nyo osukona nyo babonda bomi? Ibango nde kosanu, ntenge nko nkandema oko Yelusalema ye, yaaka la mbwaka-waka ako ndieko, oko lina lika Nkolo Yesu. ¹⁴ Oki nde ntalangaka nzamba-yamba ye, totwenye, pe totepele soe, waango boka Nkolo bokelwe. ¹⁵ Oko mbise bio nsio biko, tolalake biemba biso, pe toyilele oko Yelusalema. ¹⁶ Bayeki bankina ba Kaisalia balameme loselele la so, pe batobele oko lowulu loka Menasona, nde bosi Kupulio, boyeki ba kala, one loki so tolangake bokitia oko lowulu lo nde. ¹⁷ Ngeng'eki so tosoyia oko Yelusalema, bambale batosaanghale nko la nyinga. ¹⁸ Oko losio lombisa Paolo ase nde ndia Yakobo, la so loselele, pe bingambi binkumela baye la bo. ¹⁹ Paolo aasese boankuma pe alimbplake mbo binkumela lomo la lomo biki Wangi akelake ok'etetei eka ngendia lama la esali le nde. ²⁰ Ngeng'eki bo basoyoka ngako, bateliake Wangi wuke, pe baotepele boe, Oyene ye, mbale, ok'eteti eka bane basakoyamba, Bayuda bale nkoto wuke, pe boankumela badia bebonda nko be twe-twe lama la Bekengo. ²¹ Yaaka basakoyoka bentika be tepele bato lama la wu bo boe awu olaka ok'ole Bayuda bankuma bale oko bise bika ngendia wue baboye Mose, pe lonkina boe awu oapekela mbeke bana besuti pe la mboye ntotie bekengo be bo. ²² Ngako ele nghamoni? Bangoyoka solo bobe esobele. ²³ Ngako akoboko kelaka dweli longa so tokotepela. Tolia bele benei ane, bako basakosimba nyimi le bo. ²⁴ Awu lamemaka wua bo, ososake bienge ndiemo wua bo, pe oafutelake bensongo l'itina boe bakolole betu be bo; ngako bato bankumela bangoyeba boe mbo bi yokili bo lama la wu bile mbo bi bongala, yaaka lama la wu nkika, ole boto lototia bekengo. ²⁵ Yaaka l'itina lika ngendia bine bisakoyamba, so toayebiake ebekele le so soe baboye biemba bisosembwa ok'ole ndobe, la balongo, la nyama bisa bato badiaka nyama-yama, la lolemba. ²⁶ La mbisa Paolo alamemake ndia bele beko. pe oko losio lo mbisa akasosake ndia bo ndiemo; ayotwe oko lowulu loka Wangi, pe ayebie bato ileno li bokuma li nsio bi bososwe bo bo ngeng'enga bo bapae mbeka l'itina lika boto omo la omo lobo. ²⁷ Ngeng'eki bio nsio bisambiale bisokoka, Bayuda bankina bane bakoyimak'oko Asia baoyene oko lowulu loka Wangi, pe bayumole esuku le bato, pe baosangie babo baowute, ²⁸ pe bapamake la ntepela boe, bele be Yisalaele, botosunge so! Boto one alokolake bato bankuma oko ndie binkuma ndee bakisole ibotwa li so, la bekengo, beka ndie ene. Lonkina pe asoyotia Ba-Ela bankina oni lowulu loka Wangi, pe asopitia ndie ene le sampaa. ²⁹ Ibango ntondo bayene Tulopimo lo bosi Esepo, ok'etetei le nza ndiemo ndia Paolo, pe batangelake boe PAolo asooyotia oko lowulu loka Wangi. ³⁰ Nza enkumela ekayumole pe esuku le bato basume lobango la mbute Paolo, pe baokuye oko bosale bo lowulu loka Wangi, pe balale bikuke bi lowulu loka Wangi ta-taa. ³¹ Ngeng'eki bo bayalolake dweli lo diaka bo paolo, bonktika boyiake ok'ole nkumu le poloto le baloi nkoto emo boe Yelusalema enkumela esokayumola. ³² Nde pe apose baloi bankina ta-taa, la bakapiteni bi bo, pe asume lobango ok'ole esuku. Ngeng'eki bo basoyene baloi ba nkumu le bo, batwenye ndiake Paolo. ³³ Nkumu eka baloi asise mpika pe awute Paolo, ngako apake munya ndee baolale la benkokoso bepele. Ayubolake laa Paolo ale nani, lla asokela be. ³⁴ Yaaka ok'etetei le esuku, bamo bapamake la ntepele lobo lomo, bankina pe batepelake lobo lonkina. Ngeng'eki nsio bisoleka, nde pe ntayosonoko mbae nta itina li lobo ye, l'ibango lika ekokele, apake munya nde ndee babele Paolo oko lowulu loka baloi. ³⁵ Ngeng'eki nde asoyia oko bonango, baloi babele Paolo ibango la ikakasa lika bato, ³⁶ ibango esuku le bato bayakobenge la mpama-pama boe, diaka nde! ³⁷ Ngeng'eki bayotiake Paolo oko lowulu loka baloi, nde pe atepele oko munya bo bo nde ndee, mbongo la mbae ngengo le ntepele wu lobo lomo? Yaaka nde atepele ndee, oyeba iyoyi li Li-Ela? ³⁸ Ngengo awu bosi Ezipeto boko, oko nsio binkina, lokoyumolaka bele nkoto binei na mpalo bi etumba, pe aapasole oko boleki ye? ³⁹ Yaaka Paolo atepele ndee, mi nde Boyuda, bosi Taluso le Kilikia, ntime boto lo nza bi nio-nio ye; Nkobotitia mi mie ompa ngengo mi ntepele ok'ole esuku. ⁴⁰ Ngeng'eki nde asopa ngengo, Paolo ayemale oko bonango, pe afumbe bato la lobo lo nde. Eki baonkumela basoyala totolo, aatepele oko munya bo Ebele (Hebreux) ndee,