¹ La mbisa, ngeng'eki ekokele esosia, Paolo atome boto asobesie bayeki, pe aakembiake. Ngako akalamole ndia bo, pe ayime ako ase oko Makedonia. ² Alekake nko ndeka-leka oko bio mbotu biko pe aapake balako lama la mbo nzeli wuke, la mbisa ayiake oko Ela, ³ pe ayale edie ako benzali besato. Bayuda bakolimiake waango l'itina li nde ngeng'eki nde ayangake wango bo nzotwa oko baswa la nse oko Sulia, ngako ayangake oko bobonda ndee angoyitia oko mboka le Makedonia. ⁴ Bato bakosaka la nde kuu nko Asia, Sopatula bosi Beloya, lo wana oka Pula, pe la basi Tesalonike Alisitaluko la Sekundo, la Gayo bosi Delube, la Timotio; pe la bato ba Asia Tukiko ndia Tulopimo. ⁵ Bako bakolondoloko ntondo pe batolendelake oko Tuloa. ⁶ Yaaka so toyotwe oko baswa oko Pilipoi mbisa eka efula ekamba bompeka, peoko mbise nsio bitano topomalake soa bo oko Tuloa. Toyalake edie ako nsio bisambiale. ⁷ La losio lo eyenga tokosamake la nzotole efula, pe Paolo aalakake. Alangake ndee akende oko mbise losio, yaaka nde akuye ilako li nde kuu nko etetei le botio. ⁸ Mwinda biliki wuke oko lowulu, oko nzamba le liko, oko ndie eki so tokosamake. ⁹ Elenge emo le wele, lina le nde Eutuko, aliki anse oko bonkili bo ilisi, pe awutame la isilo li wembu. Ngeng'eki Paolo alakake edie-edie, elengeatame isilo, pe akite oko nse yima oko nsamba le bisato, pe bakekake nyumola nde yaaka aliki bowi. ¹⁰ Paolo atulwe, akasampie oko liko li nde, aolinge la babo ba nde pe atepele ndee, ntaboyokake bomo, ibango lokeno lo nde lokili lelo ok'etei le nde. ¹¹ Ayitie nzilela, ayotole efula pe akele. Alakake edie lenene kuu nko mpendu wee, pe ayime ako. ¹² Bato base la wan'elenge eko nza, mbika-bika komoso la lokeno pe bayokake nyinga lenene. ¹³ Yaaka so tolondoloke la baswa ntondo, pe tosake kuu nko Aso, la mposa le mpose Paolo oko baswa; ibango alangake ngako nde ndee, nde nkika ase mboka le bakolo. ¹⁴ Topomale soa nde oko Aso, pe tooyotie oko baswa pe toyiake oko Mitulene. ¹⁵ Tosekwake ako, pe oko losio lo mbisa toyeleleke Kio, oko mbiseko tobekeke mbise mbongo le Samo; pe oko losio lo bisato tosekeme oko Mileto. ¹⁶ Paolo ntalangake nsekeme oko Efese ye, nde nkanga ntasolekia ngengo edie-edie oko Asie ye, Ibango aliki la mposa ndee ayale oko Yelusalema la losio lo Botano, laa engokolama la nde. ¹⁷ Oko Mileto pe atome lotomo oko Epeso ndee basobesie bingambi bi ekinda. ¹⁸ Ngeng'eki bo basoseya mbelebele, aatepele ndee, Nyo boyeba yekeselo lemi oni etetei le nyo ngengo binkumela, yima nko losio lo ntondo loki mi nyimake ane Asia. ¹⁹ Ntielake nkolo la imemia linkumela oko bobonda, la biosoli, la pe bekeki bekombeleleke lama la biango beka Bayuda. ²⁰ Ntiyokake bomo ye, la ntepele nyo bibongo nsunge nyo, pe la ndake nyo ok'etei le mbulu binkuma lomo la lomo. ²¹ Ntepelake polele ok'ole Bayuda, pe la Ba-Ela, lobo lo nkalomole bobonda ok'ole Wangi, pe la nzambela nkolo le so Yesu Maiya. ²² Akobok'ene mi, bolalemi oko Elimo, ndeka la lomi oko Yelusalema; ntiyebe pe mbo bingombelele oko ye, ²³ yaaka nko, Elimo le Tee a nzebia nde ndee oko nza la nza bakamba ba wembu ba ndendela. ²⁴ Yaaka oko beso bami, lokeno lomi ntalonge lobo loenene ye, nko laa nzosono nseye lokendo lomi pe lotomo loko mi mbae yima ok'ole Nkolo Yesu Masiya ndee ntepele l'itina lika nsango le dilo le iyangi lika Wangi. ²⁵ Akobok'ene mi nzeba mie ok'ole nyoankumela, bane basa mi nkende ok'etetei le nyo bonkumu boka Wangi ntepela, ntabongoyitia nyene boso bomi ye. ²⁶ Kio kieko leetepela mi lene mie, lama la balongo ba nyoankuma mi nde seso; ²⁷ ibango ntembia lobo loki mi nkambe ntepele nyo lama la bonkumu boka Wangi. ²⁸ Bokekeke bienge l'itina li nyo nkika, pe l'itina lika botonga bonkumela bone bosaka Elimo le Tee aetika lokengi lobo; boyalaka bakosie baka ekinda eka Wangi ene eki nde asombake la balongo ba nde nkika. ²⁹ Mi nzeba mie oko mbisa le bayimelo ba mi, nkoi bilia waangi bangoyotwa ok'etetei le nyo, pe taangotwenya botonga totolo ye. ³⁰ Ok'etetei le nyo nkika pe bele bangokayumola la ndake balako ba bongala l'itina boe bakuye bayeki oko loselele lo bo. ³¹ Kio kieko ngako, bobokaka nzebi, pe botangelake nyoe mpela bisato botio la wane ntitwenya mpae nyo nkepo omo la omo namia la bilelo. ³² Akobok'ene mesembola oko babo baka Wangi pe oko ilako li nde li iyangi, li bongo la nkembie nyo pe la mpae nyo ibondo ok'etetei eka bankumela basakokolama kweli. ³³ Ntikanili bensongo beka boto ye , laa pe wolo ye, laa pe lolato ye. ³⁴ Nyo nkika boyeba nyoe babo bami bane basoseya bokamba bo mi, pe la bokamba boka bane bakolambaka ndiemo la mi. ³⁵ Lama la mbo binkumela, nsoelakia bilimbetelo l'itina mie ekolama la nyo bokele ngako l'itina li nsunge bato ba bonghunyu, botangelaka pe bayoyi baka Nkolo Yesu nde atepelake ndee Nyinga le mpapaa esonda nyinga le mbabaa. ³⁶ Eki nde asoseya ntepele ngako, akukame la babongo ba nde pe abotitiake ndia bo loselele. ³⁷ Boankumela balelake wuke, pe bakayimbake oko nkingo eka Paolo la mfwete nde. ³⁸ Baliki la isei li wuke nsonda-sonda l'itina lika mbo bisa nde atepela ndee ntabangoyitia nyene boso bo nde lonkina ye. La mbisa base boankumela ntindie nde oko baswa.