¹ Eki bo basosonda Ampipoli la pe Apolonia, bayie kuu nko Tesalonike, oko eliki la lowulu lo bikokayolo bika Bayuda. ² Paolo ayotwe ndia bo nkonga bayekasano bo nde, oko nsio bi biyenga bisato akelake biango ndia bo lama la Basono. ³ Apasole itina pe alimbole polele ndee, Ekolamake la Masiya nko ato wale pe akundwe oko bawi, pe atepele ndee, l'itina lika Yesu ene leetepela mi, nde ale Masiya. ⁴ Bamo ok'eteteil le bo bayambake, pe balameme boa Paolo ndia Balanaba, pe esuku lenene le Ba-Ela, basangoli baka Wangi, pe yeti lenene le beto ba lumu. ⁵ Yaaka bayuda bayoke ikeke, pe bapose bele benkina be bongala, babo ba bomfweti, bakosie esuku le bato, pe bayumole nza enkumela. Base nkubole lowulu loka Yasona la nzalole Ba-Paolo boe baapasole bosale oko beso baka bato. ⁶ Eki bo ntaayosono mbae Ba-Paolo ye, bakuye Yasona ndia bambale bankina ok'ole bingambi bi nza, la mpama-pama boe, Bato bane, basokalomola bolongo, basobele pe ane. ⁷ Yasona pe asoasangala. Boankumela baboyake bekengo beka Kaisala, pe batepelake boe nkumu enkina lina Yesu al'oko. ⁸ Eki wuke bo bato, la bingambi bi nza, basoyoka mbo biko, bebonda bebo belingatane. ⁹ Yaaka eki bo basoseya mpose mfumbe ok'ole Yasona ndia bako bankina , baatungole. ¹⁰ Bambale batome Paolo ndia Sila tataa la botio oko nza lina Beloya. Eki bo basoyia oko, bayotwe oko lowulu lo bikokayolo loka Bayuda. ¹¹ Bo basondake bato ba Tesalonike la dilo wuke, pe batoloke Basono losio la losio, la nzalola laape bio mbo biko bile nko nta ngako. ¹² Ngako wuke bo baabo bayambake, la beto ba lomu Ba-Ela, la bele wana wuke. ¹³ Yaaka eki Bayuda ba Tesalonike basoyeba boe Paolo alakake nsango dilo la oko Beloya pe, baye ako pe bayumole esuku le bato. ¹⁴ Ngako bambale batome Paolo tataa boe ase oko mbongo le losi, yaaka Sila ndia Timotio batikalake ako. ¹⁵ Bato bakolotiaka Paolo baobelele kuu nko Atene, pe base la lotomo loka Paolo ok'ole Sila ndia Timotio ndee baobelele tataa, la mbiseko bayitie. ¹⁶ Lelo ngeng'eki Paolo aakongelake oko Atene, ayeneke ndee, nza esakonyota la ndobe, ngako elimo le nde edingatanake. ¹⁷ Ngako, ok'etei le ekokayolo akelake biango ndia Bayuda pe ndia basangoli baka Wangi, pe oko yando losio ndia bato bapomala la nde. ¹⁸ Bamo baliki bato ba dianya la Baepikulo la Basetoa bapomalake pe boa nde. Bamo batepeleka e boe, te nzakayoki ene alia mposa le ntepele be? Bankina batepele boe, Ayenele nkonga bobimbi boka biangi beka ngendia; ibango atepelake l'itina lika Yesu, la pe bakundwelo. ¹⁹ Baowute, pe base la nde oko engenza le Ale, pe batepele boe, Tobongo nzeba-yeba laa pe balako ba bosaba ba tepela wu bale be? ²⁰ Ibango ototela so mbo bika ngendia. NGako tolia mposa le nzeba-yeba laa pe mbo bine bile itina be. ²¹ Bato ba Atene bankumela, la ngendia bikoliki ako, ntaalekiaka ngengo le bo la lobo lonkina ye, yaaka nko bo boe batepele laa pe bayoke lobo lo bosaba. ²² Ngako Paolo ayemale oko engenza le Ale, pe atepele ndee, Bele be Atene! Nsoyene mie ok'etetei eka mbo binkumela, nyo bosonda ntelie biangi; ²³ ibango ngeng'ema mi nsakokende la ndende mbulu bi nyo bi bowangi, nyenili ndie le etumbelo le mbeka emo, esaka basono oko liko boe, OK'OLE WANGI BONE BOMPATOYEBATANE. Ngako, Wangi boko bosangola nyo ako pe ntabboyebe ye, mi metepela lama la nde lene. ²⁴ Wangi boko bokokelake bolongo, la biemba binkumela bile ok'etei le bo, nde ale nkolo le liko la nse, pe ntalokolambe oko mbulu bisobokwa la babo baka bato ye; ²⁵ babo baka bato pe ntabalokotiele nde ye, dweli nga wue nde alia bokamba boka yemba, ibango nde nkika alokopae bato bankumela lokeno, la mpoyi, la biemba binkuma. ²⁶ La nkaka nko kio emo, asakobotia babotwa bankumela baka bato baa lamba oni nse ene enkumela; aapake baleno, pe aatikele belelo oko ndie bi bolambelo boobo, ²⁷ l'itina ndee bayalole Wangi, la elikia ndee bangoyosono nzalole nde pe baobae. Ntange pe botale la boto omo la omo lo so ye, ²⁸ ibango ok'etetei le nde, so tolia bokolo, pe tolokokende pe tokena. Kweli nkonga osaka bamo ba nyo ba basoni ba nzembo bi nyo basono boe, tole pe ibotwa li nde. ²⁹ Ngako ane ole so ibotwa lika Wangi, ntebonge la so ntangela soe bowangi ele oko dweli loka wolo, laa pe palata, laa pe iwe, laa pe yemba esosonwa la boyeli pe la batangeli bkaka bato. ³⁰ Ibango oko ngengo ekamba so itangeli, Wangi ntatangele ngako ye, yaaka akoboko atepela ok'ole bato bankumela oko ndie binkumela ndee, bakalomole bebonda; ³¹ ibango asakosolo losio lomo loko longa nde asambise nse binkumela la sembo, angoasambisa la boto oko losaka nde asolo. Asakolakia bato bankumela polele ndee ele nta sosolo, ibango aokundole oko bawi. ³² Eki bo bayoke mbo bilami la bankundwelo, bamo bayole biteko, yaaka bankina batepele boe, Tongokoyoka lonkina lama la lobo lone. ³³ Ngako Paolo apaswe ndia bo loselele, ³⁴ Yaaka bele benkina balameme boa nde pe bayambe. Ok'etetei le bo eliko Diomusi, ntendi oko Engenza le Ale, la weto omo, lina li nde Damali, la bankina bakoliki ndieemo boa nde ako.