¹ Ayie oko Delebe la Lusetula, boyambi bomo lina li nde Timotio aliki ako, nde aliki wana oka Boyuda bomo bo boyambi, ise li nde aliki Bo-Ela. ² Bambale bako bakoliki oko Lusetula pe la IKoni batatake mbo bi dilo itina li nde. ³ Paolo alangake ndee ase ndia nde mboka emo, ngako atome baobeke bosuti l'itina lika Bayuda bakoliki oko bio ndie biko; ibango boankumela bayebake boe ise li nde aliki Bo-Ela. ⁴ Ngeng'eki bo bayakoleke oko nza, bapake bayambi bekengo beki ntomwa babekeke, la bingambi bi ekinda oko Yelusalema boe batotie. ⁵ Ngako bikinda bikembake nkemba-kemba, pe bosio bo bo bofulake bonene losio la losio. ⁶ Balekake nko boleki oko nza lina Pulugia la Galatia, ngeng'eki Elimo le Tee asoapekala nteye nsango eka Wangi oko Asia. ⁷ Bayie oko ndie ekayelele ndia Musia, pe bakeke nsaka-saka oko Bitunia, yaaka Elimo eka Nkolo Yesu nteapa mboka ye. ⁸ Eki bo basopenda Musia, batulwe oko Tuloa. ⁹ La botio Paolo ayene boyenelo: Wele bomo, boto lo Makedonia, ayemalake la mbotitie nde, ndee yaka oko Makedonia otosunge! ¹⁰ Eki nde asoseya nyene boyenelo, toyalole mboka taa-taa eyia so oko Makedonia, ibango toyebake polele soe Wangi asotobesia la mpae bo nsango dilo. ¹¹ Ngako eki so tososeya nzotwe oko baswa ba Tuloa, tosenamake nko tii, kuu nko Samotulake, pe oko losio lo mbisa, kuu nko Neapoli, ¹² pe toyime ako kuu nko Pilipoi, oko eliki nza le ntondo oko mbotu bi Mkedonia, nkinda eka Baloma. Toyalake bana nsio binkina wuke oko kio nza eko. ¹³ Oko losio lo Eyenga topaswe oko nza yima oko ntundu le mbongo le nzale, oko eliki la ndie le lobotitia. Tokatike anse la nzoka-yoka soa beto bakokosamake oko kio ndie eko. ¹⁴ Weto omo lina li nde Ludia, ayokitiake. Nde aliki boto lo Twatila, boteki bo bisenda bi belele, atotiake Wangi. Nkolo alipole bobonda bo nde, ndee ayambe mbo bi tepela Poalo. ¹⁵ Eki nde asoseya nyinwa, la bato ba lowulu lo nde, atobotitie ndee, Laa botangela nyoe mi nde boyambi boka Nkolo, boyotwaka bokitia oni lowulu lo mi. Atonsinsole wembu. ¹⁶ Ngengo eki so tosake oko lobotitia, elenge emo le weto lokoliki la elimo le bola mbo, atopominye. Nde abaleake bandwa nde (ba-nkolo ba nde) engondi wuke oko kio esali le nde le mbo mbola-bola. ¹⁷ Nde atobenge oko loselele lo soa Paolo, la mpamatana ndee, Bato bane bale bantamba baka Wangi Bosonda Sangaa, bo batolaka so mboka le lobiko! ¹⁸ Akelake ngako nsio wuke, yaaka Paolo ayoke mbabali oko bobonda, akakalomole la ntepele elimo eko ndee, Nkolaka oko lina lika Yesu Masiya mie opaswe ok'ole nde. Apaswe nk'oko kio ngeng'eko. ¹⁹ Ngeng'eki bandwa ba nde bayene boe elikia le nzetie mbae engoti esosia, bawute Paolo ndia Balanaba, baakuye oko yando oko ntondo eka bingambi bi nza. ²⁰ Baabele kuu ok'ole ntendi, pe batepele boe, Bato bane bale Bayuda, pe ba dingitia nza le so. ²¹ Balaka pe bato mbo bimpatokolame la so Baloma nzamba-yamba laa pe nkela-kela ye. ²² Ngako, esuku le bato bakayumole la bayulu esongo la bo, pe ntendi bayatole bisenda bi bo, batome bato boe baapioke bemiekwa. ²³ Eki bo basoseya mpioka bo bemiekwa be wuke, baaboke oko lowulu lo ikamba, pe bapae besikiso ok'ole lokengi boe baakenge nta dilo. ²⁴ Eki lokengi lo lowulu lo ikamba asoba besikiso beko bako, aaboke oko eteni le lowulu lo ikamba le etetei, pe alinge bakolo ba bo la biamba. ²⁵ La etetei le botio, Paolo ndia Balanaba babotitiake pe bayembelake Wangi nzembo, bato pe bakoliki la bo oko ikamba baayokitiake, ²⁶ pe basukasano bonene boka mbotu boyokane nk'ako, pe beboko beka luwulu lo ikamba besukasane. Tataa nk'ako, bikuke bi lowulu lo ikamba bilifwe, pe benkokoso beka bato bankumela bekalingole. ²⁷ Ngeng'eki lokengi lo lowulu lo ikamba asoyumwa ok'isilo, ayeneke bikuke bi lowulu nko polele, anangole mpalo le nde l'itina ndee akadiake, ibango atangelake ndee, bawutwe basolota. ²⁸ Yaaka Paolo apame la iyoyi li wembu ndee, ntokelake nkia lobo lomo lo bobe oko bienge bi wu ye! Ibango soankumela so soane. ²⁹ Abesie ilangi li pete, pe ayotwe swe nko nsakatana, pe akite oko ntondo eka Paolo ndia Balanaba. ³⁰ Aapasole oko bosale, pe atepele ndee, Bapapa, nkele ngamoni l'itina mie mbike? ³¹ Baotepele boe, Yambelaka Nkolo Yesu pe ongobika, la wu la bato ba lowulu lo wu lonkuma. ³² Baotepelake nsango dilo eka Nkolo, la bato bankumela ba lowulu lo nde. ³³ Aapose, asose mpota bi bo nk'oko kio ngengo eko le botio, pe ayinwe tataa nk'oko, la nde, la bato ba lowulu lo nde lonkumela. ³⁴ Ayotwe ndia bo oko lowulu, atande mesa, pe ayokake bosango, la nde la bato ba lowulu lo nde bankumela, ibango asoyambela Wangi. ³⁵ Ngeng'eki mpendu esoyombwa, ntendi batome bato boe, tungola bato bako. ³⁶ Lokengi ayebie Paolo mbo biko ndee, Ntendi basotoma lotomo boe botungwe, ngako bopaswaka, pe bose la totolo. ³⁷ Yaaka Paolo atepele ndee, Batopioke bemiekwa oko beso baka bato, lelo ntaatosambisi, so tole Baloma, pe batoboke oko lowulu lo ikamba. Akoboko pe bakana batoboke oko bosale la nkuku? Ngako ye! Yaaka baye batopasole oko bosale bo nkika. ³⁸ Bapolisi bayebie ntendi mbo biko, yaaka oki bo bayoke boe Baloma, bayoke bomo. ³⁹ Baye la mbotitie bo, pe baapasole bosale, pe baabotie boe bayime oko nza eko. ⁴⁰ Eki bo basoseya mpaswa oko lowulu lo ikamba, bayotwe ok'ole Ludia, pe eki bo basoyene bambale, baakembiake, pe la mbisa bayime ako.