¹ Bankina bayimake oko Yuda pe baye oko bambale ndakalaka boe, Laa ntabaebekili besuti nga otepela bekengo beka Mose ye, ntaboyosone mbika-bika ye. ² Ikakasa la biango wuke bepaswe ok'ole bato bako la Paolo la Balanaba. Ngako basole boe Balanaba ndia Paolo, namia la bato bankina ok'otetei le bo bayilele oko Yelusalema ok'ole ntomwa la bingambi bi ekinda l'itina lika bio biango beko. ³ Bato ba ekinda basake ntindie bo oko mboka, la mbisa balekake oko Poinike, la Samalia la ndimbole bo polele lama la bokalomoli boka ngendia pe la nzokie bambale bankumala nyinga lenene. ⁴ Eki bo basoyia oko Yelusalema, ekinda, la ntomwa, la bingambi baasangale. Baatepele bisali binkumela biki Wangi akele ndia bo ndiemo. ⁵ Yaaka bankina yima oko ekinda eka Bapalosi bane bakoliki bayambi, bayemale la ntepela boe, Ekolama nko baabeke besuti pe baayebie boe batotie bekengo beka Mose. ⁶ Ntomwa boa bingambi bi ekinda, bakakosie l'itina boe batangele bokobo bo lami la lobo'eko. ⁷ Eki biango besopaswa wuke, Petelo aatepele ndee, Bambale, nyo boyeba nyoe Wangi asakonsolo mi yima kala ok'etetei le nyo ndee ngendia bayoke Ilako li nsango Dilo oko munya bo mi pe bayambe. ⁸ Wangi boyebi bo bebonda beka bato asakotepela l'itina li bo, ibango asakoapa Elimo le Tee dweli lomo nkonga oki nde atopake so. ⁹ Ntatokalamolake soa bo ye, ibango asakososa bebonda be bo lama la boyambi. ¹⁰ Ngako akoboko itina be li keka nyo Wangi la nkande bayambi bekoli oko nkingo, bene ba papa ba so, la so nkika pe ntatoliki la nguya le mbela-bela ye? ¹¹ Yaaka toyamba soe tongobika la iyangi lika Nkolo Yesu kweli nkonga bo. ¹² Esuku enkumela le bato bayalake nko totolo la nzokitie Balanaba ndia Paolo oki bo batepelake bimwenge la bilimbetelo binkumela biki Wangi akelake ok'ole ngendia oko babo baabo. ¹³ Ngeng'eki bo baseye ntepela, Yakobo akalole ndee, Bambale, bonzokitiake mi! ¹⁴ Simona asoseya ndimbola dweli loki Wangi ayolendaka ngendia ntondo le nde nsole bato l'itina lika lina li nde ok'etetei le bo. ¹⁵ Bayoyi baka babambi bakayoka oni lobo lone nkonga osaka lo losonwa loe, ¹⁶ Oko mbise mbo bine, mi ngoyitia, pe ngolwa lonkina lowulu loka Dawidi lone losakokita. ngolwa lonkina emfumpa lelo, pe ngoeyemia lonkina. ¹⁷ L'itina mie bato bankina bankumela bayalole nkolo, nko ngendia binkuma bine bisaka lina li mi litolwa oko liko li bo. ¹⁸ Nkolo, botepeli boka mbo bine yima nko kalakala atepela ngako. ¹⁹ Kio kieko mi nsotende mie ntatonyokoloke bane bale oko etetei eka ngendia basokalomoa oko Wangi ye; ²⁰ yaaka toatomie lokasi lo bokanda soe baboye mbindo la ndobe, la lolemba, la nyama bisa bo bapioto, la balongo. ²¹ Ibango yima nko ngengo le kalakala Mose alakwa oko nza la nza, pe oko eyenga la eyenga balokobale basono ba nde oko mbulu bi bikokayolo. ²² Oko kio ngeng'eko eyeneleke dilo ok'ole ntomwa, pe bingambi, namia la ekinda enkumela, la nsole bele ok'etetei le bo la ntome bo oko Antiokiya loselele boa Paolo ndia Balanaba . Ngako basole Yuda, one lokobeswaka Balanaba, la Sila, bo baliki bele be ntondo eka bambale bankuma. ²³ Batome bakonda la babo baabo boe, Ntomwa la pe bingambi, bambale ba nyo, ok'ole bambale bane ba yima ok'ole ngendia oko Antiokiya, la Suliya, la Kilikiya, Beseso! ²⁴ Tosakoyoka boe, bamo bakoyimake oni ole so, basakoya ndingitie nyo la bayoyi ba bo, la mpite bebonda be nyo; so pe ntatoatomake ngako ye. ²⁵ Ngako toyenili soankumela dilo la bobonda bomo la nsole bele benkina baye ok'ole nyo loselele boa ba-lolango ba so Balanaba ndia Paolo, ²⁶ bane basakosampia beboto be bo sampaa oko lina lika Nkolo le so Yesu Masiya. ²⁷ Ngako pe tosotoma Yuda ndia Sila, bo pe bangoelimboela mbo nko bine la munya. ²⁸ Ibango nteyeneleke kweli la Elimo le Tee, pe la so nsangie nyo belito benkina ye, nko mbo bine bi kolama, ²⁹ so soe boboyaka biemba bine bisopawua ok'ole ndobe, la balongo, la nyama bine bisa ba yama nyama-yama, la lolemba. Laa bosokakeke lama la mbo bine, ako bokela dilo. Botikalaka dilo. ³⁰ Ngako, eki bo basoseya ntomwa, bayie oko Antiokiya. Bakosie ekinda enkuma, pe baayambie bokanda boko. ³¹ Eki bo baseye ntanga-tanga, bayoke nyinga lama la mbo bi bokembie bika bokanda. ³² Yuda ndia Sila bo nkika baliki balaki, pe bakembiake bambale la balako wuke, basangiake pe ilako le bo. ³³ Bayalake ako yembe ngengo nio, la mbisa bakalamole boa bambale bayitiake la totolo ok'ole batomi ba bo. ³⁴ Yaaka eyeneleke ok'ole Sila ndee asoyala lelo ako wano ngengo. ³⁵ Paolo ndia Balanaba bayuele edie ako Antiokiya, bo boa bankina wuke, balakake pe bakendiake Nsango eka Nkolo Yesu Masiya. ³⁶ Oko mbise bimo nsio, Paolo atepele Balanaba ndee, Tosoyitia lelo oko nza binkumela bisa so tolaka ilako lika Nkolo tosolende laa pe bambale oko bale nghamoni. ³⁷ Balanaba alangake ndee ase ndia Yoani, one lokotolwaka Malako, ³⁸ yaaka Paolo ntanyiminyaka mpose nde ye, nde oko lokoalaliaka oko Pampuliya pe ntasa ndia bo loselele oko esali ye. ³⁹ Bana biango wuke bepaswe ako, ngako bakalamole, pe Balanaba apose Malako pe ase la baswa oko Kupulio. ⁴⁰ Yaaka Paolo asole Sila, pe eki bambale ba ekinda basoseya nsembola nde ok'ole Nkolo, ayime ako. ⁴¹ Aleke ok'etei le mbotu bi Sulia la Kilikia la nkembie bikinda bika Nkolo Yesu.