¹ OKo ikoni bayotwake nkonga bayekasano bo bo, oko bokosamelo boka Bayuda, pe balakake ngako pe wuke bo Bayuda la Ba-Ela bayambake. ² Yaaka bayuda bane bakoboya nzamba-yamba bayumole bayulu baka ngendia pe baayemie esongo la ntomwa. ³ Ngako bayale edie ako pe balakake la bonzenze l'itina lika Nkolo Yesu, nde nkika pe akayeniake polele l'itina lika ilako li nde li iyangi; ayeniake pe bilimbetelo la bimwenge bikokelwake oko ba bo. ⁴ Yaaka wuke bo bato ba nza bakalamole, bamo base oko lokengo loka Bayuda, yaaka bankina base oko lokengo loka ntomwa. ⁵ Yaaka ngendia, la bayuda, la bingambi bi nza, bakanake boe bakele bobe ok'ole ntomwa pe baabe bawe. ⁶ ngeng;eki bo basoyaka ngako, balote oko mbotu bi Lukaonia, la nza bi Lusetula la Delube la pe nza bi dioso. ⁷ Oko balakake nsango dilo. ⁸ Wele bomo, bo ekoko oko bakolo, aliki ako oko Lusetula, nde aliki ekoko yima nk'oko ibale lika nyango le nde, pe lelo ntakendili ye. ⁹ Nde boto oko, ayoke Paolo atepela, Paolo pe aolende, pe ayene ndee, alia boyambi bokolama la nde mbika-bika. ¹⁰ Ngako atepele la iyoyi li wembu ndee Yemala la bakolo ba wu senaa! Asotwe soti, pe akende. ¹¹ Ngeng'eki bato basoyene esali eko eka Paolo, bapame pe la ntepela oko iyoyi li Lukaonia boe, Biango oko boyenelo boka bato besotokitela! ¹² Bapae Balanaba lina Zeu, pe Paolo Eleme ibango nde aliki ntepelaki. ¹³ Nkanga le lowulu lo bosangoli boka Zeu, oko lokoliki oko ntondo le bayotwelo ba nza, aye la nyate wuke, la fulele bi dilo la bolatelo bo nsio wuke, aliki ndiemo le bato tungunguu, pe bayangake wango kosanu boe batumbe mbeka. ¹⁴ Yaaka ngeng'eki ntomwa Balanaba ndia Paolo bayoke ngako, Bayatole bisenda bi bo, pe bayotwe ok'etetei le esuku awe, bapamake la ntepela boe, ¹⁵ Bambale! bokela ngako itina be? So, la so tole nkonga nyo, pe tosoya la nsango dilo, l'itina soe botwenye mbo bine binkumela bimpatombia engondi, pe boyelele Wangi bolia bokolo, one lokoyangake liko na nse, la nzale binene, la biemba binkumela bikende ok'etetei le bio. ¹⁶ Oko ngengo le kalakala atwenyake babotwa bankumela bakende oko dweli lolanga bo. ¹⁷ L'itina li nde nkika ntambia bokamba bo nde ndee akayebie lonkina ye, ibango asokela bisali bi dilo poe asoepa nyo mbula oko liko pe baleno ba bota mbolo wuke, pe asonyotia bebonda be nyo la biemba bi ndekeleke pe la nyinga. ¹⁸ Pe nkia oko bayoyi bako, bapekelake bisuku bi bato la ntumbele bo mbeka nko la wembu. ¹⁹ Yaaka Bayuda ba Antiokiya la Ikkoni base oko, pe bakembiake bisuku boe babole Paolo bawe, ngako baokuye oko bosale bo nza, pe batangelake boe akosowa. ²⁰ Yaaka eki bayambi basoseya ndingela nde, ayemale pe ayotwe oko nza . OKo mbise losio ase ndia Balanaba oko Delebe. ²¹ Oko kio nza eko balakake nsango dilo, babae bayambi wuke. La mbisa bayitie oko LOsetula, la Ikoni, la Antiokiya, ²² pe bakembiake bebonda beka bayambi, la mpae bo ilako boe bayemale nk'oko boyambi, bo boe, Ekolama la so nzotwa oko Bonkumu boka Wangi oko mboka le bonyoko. ²³ Eki bo basoseya nsole bingambi bi ekinda la ekinda, pe eki bo basobotitia la biemba nkina-kina, baasembole oko babo baka Nkolo ene esa bo bayambela, ²⁴ Ngako baleke oko mbotu bi Pisidia pe bayie oko Pamfulia. ²⁵ Balakake nsango dilo oko Pelege, pe bakitele oko Atalia. ²⁶ Bayime ako, pe base oko Antiokiya la baswa, oko oki baasembolake oko basoyi baka Wangi l'itina lika esali eki bo bakele. ²⁷ Eki bo basoyia pe la nkosia ekinda, baatepele bisali binkumela biki Wangi akelake ndia bo ndiemo, boboe Wangi asakolipola ekuke le boyambi ok'iole ngendia. ²⁸ Bayale yembe nsio wuke ndiemo boa bayambi.