¹ Oko mbise mbo biko, ayime oko Atene, pe ase oko Kolinto. ² Atanake Boyuda bomo, lina li nde Akwila, bosi Ponto, wano ngengo nko nio ekolekaka, ayimake oko Italia pe Pulisekila, ndia ilaka li nde, l'itina lika bokengo boki Kulaudio apake nde ndee, Bayuda bankumela bayime oko Loma. Ngako Paolo aye nde nde bo, ³ pe ayale edie ndia bo esali nkamba-kamba, ibango aliki boto lokokelake esali dweli lomo nkonga bo. Esali le bo eliki bengumbe nkeka-keka. ⁴ Biyenga binkumela, alakake bato oko mbulu bi bekosamelo, pe akekake nkembie boyambi boka Bayuda la Ba-Ela. ⁵ Yaaka oki Sila ndia Timotio babele yima oko Makedonia, Paolo alameke nk'oko esali le nsango dilo ndaka-laka, pe ndimbole Bayuda ndee Yesu ale Masiya. ⁶ Yaaka bo bayemalake esongo la nde pe baokisoloke, ngako nde aafumpolake bisenda bi nde, pe aatepele ndee, Balongo ba nyo banangeme oko liko li betu be nyo nkika! Mi sesoo! Akoboko ndeka la lomi ok'ole ngendia. ⁷ Ayime ako, pe ayotwe swe oko lowulu loka boto omo lina li nde Tito Yuseto, bosangoli boka Wangi lokoliki la lowulu mpika la lowulu lo ekinda. ⁸ Yaaka Kulisipo, lokoliki lokengi oko lowulu lo enkina, ayambele Nkolo, ndia bato bankumela ba lowulu lo nde. Bato wuke, la basi Kolinto oki bo bayoke mbo biko, bayambe pe bayinwe. ⁹ Yaaka, la botio nkolo atepele Paolo oko boyenelo ndee, Ntoyokake bomo, yaaka tepela pe ntoyalake totolo ye! ¹⁰ Ibango mi nde mia wu ndiemo, pe boto ye longoyemala esengo pe la nyokole wu, ibango bato wuke oni nza ene bale baa mi. ¹¹ Ngako Paolo ayale ndia bo mpela emo la benzali besamalo, nsango dilo ndaka-laka. ¹² Yaaka eliki la boto lina Galio nkumu le mbotu bi Akaya, Bayuda babelele Paolo la bobonda bomo, pe baobele ok'ole ntendi, ¹³ pe batepele boe, Boto one alaka bato ndee basangole Wangi oko dweli lompatokolame la nge la bekengo. ¹⁴ Ngeng'eki Paolo abangake ntepela, Galio atepele Bayuda ndee, Nyo Bayuda! Laa lobo lone lokanoyala ewungi, laa pe lobo lo bobe bo ekuna, ntumbe nkanoekandela lomo. ¹⁵ Laa ele l'itina lika biango beka balako, la bena, la bekengo be nyo, bokolimia lobo nyo nkika. Mi ntinyiminye nzale ntendi eka mbo biko ye. ¹⁶ Pe aakombe, aapasole oko ndie le botendi, ¹⁷ yaaka Ba-Eala boankumela bawute Sosotene bondwa lowulu lo ekinda, pe baodiake lodii oko ntondo le ndie le botendi, yaaka Galio ntapakaka nkia lobo lomo oko biko binkumela ye. ¹⁸ Ngako Paolo ayale ako bana nsio, la mbisa akalamole ndia bambale, pe ayotwe oko baswa kuu nko Sulia, pe Pulisekila ndia Akwila base boa nde. Oko kenkulea, abeke dibo li nde, ibango aliki la bokengo. ¹⁹ Basekeme oko Epeso, pe akalamole ndia bamo bankina ako, yaaka nde nkika ayotwe oko lowulu lo ekinda pe akelake biango ndia Bayuda. ²⁰ Baobotitie boe asoyala ndia bo yembe ngengo, yaaka nde ntalanga ye, ²¹ yaaka ako oki nde akalamolake ndia bo atepele ndee, laa Wangi alanga, ngoyitia oni ole nyo lonkina. la mbisa asekwe oko Epeso, ²² pe aduwe oko Kaisaliya. Eki nde asoyia oko Kaisaliya, ayilele kuu nko Yelusalema, pe ngeng'eki nde asoseya nsese ekinda, akitele kuu nko Antiokiya. ²³ Ayalake edie ako wano ngengo, la mbisa ayumwe la nse lokendo oko bise bi Galatia pe la Pulugia la nkembie bayambi bankumela. ²⁴ Bayuda bamo, lina li nde Apolo, boto lo Alesandulo, alambake oko Epeso. Nde aliki wele bo dianya pe la loyebako lo basono. ²⁵ Asakoseya ndakwa oko mboka eka nkolo, pe elimo le nde eliki la twe. Atepelake pe alakake mbo bika Yesu nta kweli, ayebake nko boyini boka Yoani. ²⁶ Nde pe abangake ndakalaka la wembu oko lowulu lo ekinda; yaaka ngeng'eki Pulisekila ndia Akwila basoyoka mbo bi tepela nde, baopose pe baolimbole mboka eka Wangi oko dweli lo penda kweli. ²⁷ La mbisa, ngeng'eki nde asotangela ndee aleka oko Akaya, bambale baokembie bobonda, pe basonele bayeki bokanda boe baosaangale. Eki nde asoyia oko, aungake la lolango wuke, bane basakoyamba, ²⁸ ibango, oko beso baka bato aseyake biango beka Bayuda nk'esanyange, la ndakie bo polele oko basono ndee Yesu ale Masiya.