¹ Kwakhedi ni mufadishi mumoshi jina diendji Nikatemu mbuta mu katshi ka Ayuda. ² Muthu oyu wendidi kudi Yesu mu pipa wa mu leza etshi Longi twejiya esthi ayi wudi longi mumoshi wa katuka kudi Nzambi kikuma kushiku ni muthu wa lunga kuhanga yipedikisa mudi ki wu kuhanganga yivwa Nzambi keshiku ni mweni. ³ Yesu wa mu vutudidi etshi Kiedika kidi muthu ka tetukidiku epi mbala ya kiadi ka kumona oku kifumu kia Nzambi. ⁴ Nikatemu wa mu vutudidi etshi kiehi muthu a lunga kutetuka mbala ya kiadi yivwa mweni wa nuna kadi. Boshu wu kwingila mu vumu dia mamendji mu ku tetuka epi. ⁵ Yesu wa mu vutudila etshi kiedika kidi muthu katetukidiku mu meya ni mu Pevi ka lungidiku kwingila mu kifumu kia Nzambi. ⁶ Oyu wa tetuka kudi wudi muthu oyu wa tetuka mu kudi Pevi wudi Pevi. ⁷ Wu yituka oku ki nia kulejidi etshi Wu feti kutetuka mbala ya kiadi. ⁸ Fundji yenda kwenda kosu ku ya zola. Wenda kwivwa mayema ma muhunga kashi wu kwijiyanga oku ku wa kutukila ni ku wu kwendanga. Kienikioki ki medi kudi koshu oyuna wa tetuka mu Pevi. ⁹ Nikatemu wa vutudidi etshi kiehi ma lunga kuhangama. ¹⁰ Yesu wa mu vutudila etshi Ayi wudi longi mu katshi ka ana a Yiseledi wushiku kwijiyanga mambu ama. ¹¹ Kiedika ejika etshi etu twenda kwakula mambu ma tu kwijiyanga twenda ku nuhwa kithemu kia mambu ma twa mweni. Enu kia nnweda oku ku kumbula kithemu kietetu. ¹² Yivwa nia nu leza mambu ma hashi nushiku kukumbulanga kiehi nu kukumbula yivwa nia nu leza mambu ma ku wulu. ¹³ Kushiku ni muthu waya kadi ku wulu kaka oyu wa katukidi ku wulu Mwana wa muthu. ¹⁴ Mudi kioki kia shidi Moshi kiteki kia nioka ha wulu dia mutondu kitezu kimoshi Mwana muthu epi a feti ku mu zangulusa ¹⁵ kikuma koshu wa mu kwikila akhadi ni moyi wa mvula ni mvula. ¹⁶ Kikuma Nzambi wa zodidi athu a hashi wa hanini mwana endji mumoshi mu pila etshi koshu wa mu kwikila kafwoku kashi anoni moyi wa mvula ni mvula. ¹⁷ Nzambi ka tumishiniku mwana endji hashi mu ku wa zengila ndola kashi kikuma kia ku hulusa athu. ¹⁸ Koshu wa mu kwikila ka ku nona oku ndola kashi oyu wa mu beya wa dihwa ndola endjimweni kikuma ka kwikididiku mu zina dia mwana mumoshi kaka wa Nzambi. ¹⁹ Tala pila ya kejila ndola Mwania wejidi kudi athu hashi kashi athu azodidi kowu pipa mwania lo kikuma yisalu yowu ya khedi ya bola. ²⁰ Kikuma koshu wenda kuhanga kubola ka kutshianga oku mwania ka ku jinga oku mu mwania kivwa lo yisalu yendji yileki ku tunguluka. ²¹ Ata kioki koshu wa hangila kiedika wudi mu mwania kikuma ethi yisalu yendji ya hangilanga Nzambi yidi mwekinishi. ²² Kumanima he Yesu ni alonguki jiendji aya mu thothu ya Zude. Wajingidi koku mwa tangwa ni eni ni kubotika. ²³ Yowani epi wakhedi kubotika ku Enon ha bela bela ni Salem kikuma kwenokuna meya makhedi lawu. Athu akhedi kwiza kudi mweni ni kunona mbotika ²⁴ kikuma Yowani kakhediku kadi mu boloku. ²⁵ Kumanima matendu mengididi ha katshi ka kiatshi kia alonguki jia Yowani ni muyuda mumoshi kikuma kia kwovwa mokhu. ²⁶ Eni endidi kuleza Yowani etshi Longi oyuna wu wakhedi nendji mu sambwa dia meya ma Yordani wu wakhedi kuhanina kithemu wenda wa botika athu oshu enda aya kudi mweni. ²⁷ Yowani wa vutudidi etshi Muthu kalungidiku kunona ni koshu yivwa kia katukidiku ku wulu. ²⁸ Enu mweni nwa lunga kuta kithemu ki nia kudidi etshi Ami nishiku Khidishitu kashi nia kudidi etshi Ami athumini ni thethikidi. ²⁹ Oyu wa hangisa feti dia wala wudi mukwa wala. Kashi ndoyi wa Mukwa wala wudi penapena ni ku mwivwa wu kukhala ni kieshi mu kwivwa ndaka ya mukwa wala. ³⁰ Henihohu moshu menda ma nguhwa kieshi kia lawu. Mboti lukumu lwendji luhiti lwa memi. ³¹ Muthu oyu wa katukila ku wulu wudi ha wulu dia mambu moshu. Oyu wa katukila hashi wudi wa hashi wenda kwakula kaka mambu ma hashi. ³² Oyu wa katukila ku wulu wudi ha wulu dia mambu moshu. ³³ Mweni wenda kuhana kithemu kia mambu ma mweni ni mevidi kashi ni muthu kendoku kumbula kithemu kiendji. ³⁴ Koshu wa kumbula kithemu kiendji wa kumbula etshi Nzambi wudi kiedika. ³⁵ Kikuma oyu wa tumini Nzambi wenda kwakula mambu ma Nzambi kikuma Nzambi kendoku kuhana Pevi ka ndambu. ³⁶ Oyu wa kwikila kudi mwana wanona moyi wa mvula ni mvula oyu wa konda kulemvuka kudi mwana ka kanona oku moyi kashi khabu jia Nzambi jia ka mu bwila.