¹ Kiedidi Yesu wevwa etshi a Fadishi evidi etshi mweni wenda wanona ni kubotika alonguki lawu hitila Yowani ² ( Mu kutala kamu Yesu enjimweni kakhediku kubotinga oku kashi alonguki jienji akhedi kubotika) ³ Wa katukidi ku zude wavutuka ku Ngadidi. ⁴ Wa mweni etshi mbote a hitidi ku Samadiya. ⁵ Watudidi a dimbu dimoshi dia Samadiya jina diodi Sikadi pena pena ni kilanga kia Yakobi kiahwedi mwana enji Yosefi. ⁶ Henahana akhedi ni Buku dia meya dia Yakobi. Yesu wakhedi wakatukidi mu kukiba he wa hwila washikama mu khulu ya buku. ⁷ Mukhetu mumoshi mukwa Samadiya wejidi kuteha meya yesu wa wa muleza etshi nguhu meya ma kunwa. ⁸ Kikuma alonguki jienji endidi hembu mu kusumba yima ya kudia. ⁹ He mukhetu mwenoyuna wa mu leza etshi kikuma kiakhi ayi wudi muyuda wenda wangu lomba ami mukhetu wa ku Samadiya meya ma kunwa. ¹⁰ Yesu wa mu vutudila etshi Nga wijika makabu ma Nzambi ni oyu wu ku kulombanga meya makunwa ayi mwweni wambidi ku mulomba namu mweni wambidi ku kuhwa meya ma moyi. ¹¹ Mukhetu etshi Longi ayi wushiku ni kathini buku dia kobuka. Kwehi wu ku nona meya ma moyi. ¹² Ayi wahita kaka yetetu Yakobi watushisididi buku dienedi enjimweni epi wa nwini meya menama ni ana jienji ni yivwama yenji. ¹³ Yesu wa mu vutudila etshi kosu wanwa meya menama wa kevwa epi pwisa. ¹⁴ kashi oyuna wakanwa meya ma nia ka muhwa ka kevwa oku epi pwisa. Kashi meya ma nia ka muhwa makhekina mu katshi ka mweni musulu wenda kuhita ni kuhana moyi wa mvula ni mvula. ¹⁵ Mukhetu etshi Longi nguhu meya menamana ni lekingi epi kwivwa pwisa ni lekingi epi kwiza kuteha meya. ¹⁶ Yesu wa muleza etshi nda wutambiki mulumi weyi wiji nenji. ¹⁷ Mukhetu etshi nishiku ni yala. Yesu wa muleza etshi wakula kiedika etshi wushiku ni yala ¹⁸ kashi wakhedi ni amala atanu oyu wu wudi nenji kieneki keshiku mulumi eyi. Ma wakula medi kiedika. ¹⁹ Mukhetu wa muleza etshi Longi nia mona etshi ayi wudi mbikudi. ²⁰ A Tata jietu akhedi kusambila Nzambi ha mundonda wenowu kashi ayi wenda wakula etshi tufeti kwenda kusambila Nzambi ku Yesluselemi. ²¹ Yesu wa mu leza etshi kwikidi mukhetu ayi tangwa dia lunga nu kubula oku epi kusambila Nzambi ha mundanda owu ti ku Yeluselemi. ²² Nwenda kusambila konda kubakisa. Et twenda kusambila ni kubakisa kikuma kuhuluka kweza mu njila ya Ayuda. ²³ Mu tangwa dikwiza dieni epi dialunga kadi Athu a kabula kusambila Tata mu ki pevi ni mu kiedika kikuma tata wenda wa henga athu a pila mweneyina mu ku mu sambilanga. ²⁴ Nzambi wudi Pevi athu a ku mu sambilanga afeti ku mu sambila mu ki pevi ni mu kiedika. ²⁵ Mukhetu wa mu leza etshi Niejika mboti Mesiya wakeza(wenda kutambika Khidishitu). ²⁶ Tangwa dia keza wa ka tutendudila mambu mosu. ²⁷ Mu tangwa mwenedina Alonguki avutuka. Ayanjika kuyituka mu ku mu wana ni kwakula ni mukhetu Kashi ata muthu kakudidiku etshi ekhi wazola to kikuma kiakhi wu kwakudilanga ni mweni. ²⁸ He mukhetu wa zeza katini ka meya wa vutuka hembu waleza athu etshi ²⁹ Yizenu nu tadi yala mumoshi wandeza mambu mosu ma nienda kuhanga. Kalungidiku kukhala Khidishitu mbala jiekha. ³⁰ Akatuykidi hembu ayi kudi mweni. ³² Mu tangwa mwenedina Alonguki akhedi ku mu bondila eni etshi Longi dianga. ³¹ Kashi mweni wa walejidi etshi Nidi ni madia makudia ma nwa konda kwijika enu. ³³ He Alonguki akwangana etshi ata ka mu nehininiku madia. ³⁴ Yesu wa waleza etshi Madia memi medi kuhanga luzolu lwa oyuna wathumini mu kuhanga kisalu kienji kiosu. ³⁵ Nwa kula oku etshi kwasala angondi awana mu kukatula yima mu yilanga. Nia nu leza etshi thutenu mesu nu tadi yilanga kikuma tangwa dia ku sanda dia lunga kadi. ³⁶ Oyu wenda kukatula mbuka wenda kunona lufutu lwenji ni kusweka mbuma kikuma kia moyi wa mvula ni mvula kikuma ni oyu wa kuna ni wa katula mbuka ayangaladi owu mbadi. ³⁷ Kikuma kweni koku kwa katukila kingana ki kwakulanga etshi Mumoshi mukuni mukowu mukatudi wa yima. ³⁸ Nia nu tumini nwendi kukatula yima yi nwa leki kukuna. Athu ekha a hangidi he enu nwengila mu pashi mu pashi jiowu. ³⁹ Athu lawu Ku Samadiya akwikididi kudi Yesu mu njila ya Mukhetu wendidi ku bula kithemu etshi Wa ndezanga mosu ma nienda kuhanga. ⁴⁰ He kiela akwa Samadiya eza kudi mweni a mu lombidi akhadi nawu wakhedi hohu matshiku madi. ⁴¹ Athu lawu akwikididi epi mu malongi menji. ⁴² Alejidi mukhetu etshi twa kwikididiku kikuma kia mambu ma wakula kashi etu mweni twa divila twejika etshi oyu wudi kamu Muhulushi ya thothu. ⁴³ Kumanima ma yilumbu yo yadi wa katukidi henahana waya ku Ngadidi. ⁴⁴ Kikuma Yesu enjimweni wakudidi etshi mbikudi kendoku ku khala lukumu ha katshi ka dimbu dienji. ⁴⁵ Kia tudidi ku Ngadidi a mu yambidi. Eni a mweni mambu amana mahangidi ku Yeluselemi mu feti kikuma eni epi akhedi koku. ⁴⁶ Wa vutukidi epi ku kana mu thothu ya Ngadidi kwa alumunini meya mekhina vinu.Ku Kapenawumi kwakhedi ni Kapita wa kengilanga Fumu mwana enji wakhedi wayela. ⁴⁷ Kiela wevwa etshy Yesu wakatuka ku Zude waya ku Ngadidi wendidi kudi Yesu mu ku mu bondila endi ku huka mwana wakhedi kadi ku taba. ⁴⁸ He Yesu wa mu leza etshi enu nwenda kukwikila kaka yivwa nwa mona yidimbu to yipedikisa. ⁴⁹ Kapita etshi Longi yiza tswalu kia leka kadi kufwa mwana emi. Yesu wa mu leza etshi Nda mwana wudi ni moyi. ⁵⁰ Muthu mweni wakwikididi ndaka ya mulejidi Yesu wendidi kwenji. ⁵¹ Kiakhedi kukulumuka asadi ejidi ku mu waningina a mu leza etshi mwana eyi wudi ni moyi. ⁵² He mweni wa hwehula etshi tangwa ekhi ayanjikanga kudivwa. Eni etshi ameni mu tangwa dia midi kuyela kwahwidi. ⁵³ He mweni wajikidi etshi yakhedi mu tangwa dia mulejidi Yesu etshi Mwana eyi wudi ni moyi. Henihohu enjimweni ni athu jienji osu munzu enji akwikididi. ⁵⁴ Eki kidi kipedikisa kia kiadi kia hangidi Yesu kia katukidi ku Zude mu kwenda ku Ngadidi.