¹ Kumanima ma matshiku madi kwakhedi ni wala ku dimbu dia Kana kuthothu ya Ngadidi. Mama ya Yesu epi wakhedi kokhu. ² Yesu ni alonguki jienji epi awa tambikidi ku feti mwenedina. ³ Tangwa diahwidi vinu mama ya Yesu wa muleza etsi eshiku epi ni vinu. ⁴ Yesu wa muvutididi etsi Mukhetu ayi mambu menama mangu tala ami mukhi? Tangwa diemi kandiku dilunga. ⁵ Mama enji waleza athu a kisalu mu kuhanga moshu mawaleza. ⁶ Kwakhedi ni mabungu ma mayala masambenu makhedi kuhangila ayuda mu kushia meya makusamba tangwa dia yisambu. ⁷ Yesu wa walejidi endi kuzadisa meya mu mabungu menamana. Eni azadisi ti mu kwiza kuzala. ⁸ He Yesu waleza athu a kisalu kikimweni nona kandambu nu lombuludi kudi fumu wa feti. Eni ahangidi kienekina. ⁹ Fumu dia Feti kia mapaka meya malumuka vinu kashi kejikidiku kwehi makatukididi. Watambikidi muthu wakhedi kuhanga wala ¹⁰ wamuleza etsi Athu oshu enda kunwisa thethi vinu dia pimbu he yivwa athu azela wa wahwa kia vinu diabola kiehi ayi wakanga wasweka vinu dia pimbu tii tangwedi. ¹¹ Kipedikisa kiathethi kiahangidi Yesu ku Kana mu thothu ya Ngadidi mu kuyanjika kwa kisalu kienji kia hanini lukumu lwenji kienikioki alonguki jienji amu kwikididi. ¹² Kumanima ma lutshiku mweno luna Yesu ni mama enji ni apangi jienji ni alonguki jienji endidi ku Kapernawumi ahangidiku koku matshiku lawu. ¹³ Kiela Paki ya Ayuda yekhina penapena Yesu wendidi ku Yeluselemi. ¹⁴ Mweni wendi kwingila munzu ya Nzambi wa wanini enda asumbisa angombi ni apizio ni mamemi. Athu ekha akhedi kushianjia fwalanga. ¹⁵ Mweni Wahangidi muswangila wa wakaya munzu ya Nzambi ni angombi ni mamemi wamwanga fwalanga jiowu jioshu wa sandumuna ma mesa mowu. ¹⁶ Walejidi athu akhedi kusumbisa mabembi etsi katulenu yima yenu yoshu yisendu kuma kwekha. Nzu ya Tata yamemi nu yikhinisoku Zandu. ¹⁷ Alonguki jienji ebukidi mambu medi masonika ku mikanda etsi E Nzambi zola di nidi nadi kikuma kia nzu yeyi dienda dia ngwosahia ku mutshima. ¹⁸ He a fumu jia Ayuda a muvutudila etsi Khiakhi kidimbu walunga kutuleza etu mu kulombulula etsi ayi wudi ni kiyeka kia kuhanga kienekina? ¹⁹ Yesu wa wavutudila etsi Bwisenu nzu ya Nzambi eyi ami niku zangulusa kumanima ma matshiku masatu. ²⁰ A fumu jia Ayuda etu twahangidi mvula makumi mawana ni yisambenu mu kutunga nzu ya Nzambi yenehi ayi wakula etsi wuku yizangulusa mu matshiku masatu? ²¹ Nzu ya nzambi yakudidi mweni yakhedi mwila wenji. ²² Tangwa dia tokimini mu lufwa alonguki jienji abambukidi etsi mweni wakudidi mambu menama eni he akwikididi mambu medi masonama mu mikanda ni mambu makudidi Yesu. ²³ Tangwa diakhedi mweni ku Yeluselemi kikuma kia feti dia Paki athu lawu amu kwikididi eni amweni epi yipedikisa yakhedi kuhanga. ²⁴ Kashi Yesu kazodidiku kuwashilamutshima kikuma wa wejikidi owu oshu. ²⁵ Mweni kakhediku ni fhunu amuhu kithemu kia athu ekha kikuma enjimweni wejika mambu moshu medi ku mitshima mia athu.