¹ Ami nidi mutondu wa vinu dia kedimina Tata yamemi wudi mukwa kilanga kia vinu. ² Mweni wenda kuvuka luthayi lwenda kukonda kubuta yibundu wenda kuhangika olu lwenda kubuta mbuma luswakadi kubuta mbuma lawu. ³ Nudi kadi nwa ku wedika mu malongi ma nu hwedi. Kangamenu kudi ami ami kudi enu. ⁴ Mutshindu wumoshi kushiku ni luthayi lwa lunga kubuta yibundu woyimweni yivwa lushiku lwa kangama ku mutondu wa vinu kienioki enu epi nwa lungidiku kubuta yibundu kidi etshi nwa kangiminiku kudi ami. ⁵ Ami nidi mudi mutondu wa vinu enu nudi mudi mathayi. Koshu wa kangama ni ami ami ni mweni wu kubuta yibundu lawu kikuma konda ami nu kuhanga oku ata kima kimoshi. ⁶ Kidi muthu ka kangiminiku ni ami a ka mukonga handji mudi luthayi lwa wuma athu a ka tonguna mathayi a momba ku thuya mahia. ⁷ Yivwa nwa kangama ni ami ni ku ndaka yemi yoshu yi nwa zola kulomba nu ku yi nona. ⁸ Mu menamana Tata yamemi a ku nonina lukumu yivwa enu nwa buta yibundu ya lawu nu ku mwekinisa etshi nudi alonguki jiemi. ⁹ Mutshindu wa ngu zodidi tata ami epi nia nu zola zingangenu mu zola diemi. ¹⁰ Yivwa nwa keba mishiku yemi nu ku bula kujinga mu zola diemi mudi ki nienda kukeba mishiku ya tata yamemi nidi muthu wendji wa luzolu. ¹¹ Nia nu hwedi milongi kikuma etshi kieshi kiemi kikhadi ni enu epi kikhadi kia lunga. ¹² Mushiku wemi owekhi zolanganenu mudi ki nia nu zodidi ami. ¹³ Luzolu lwa hitangana pimbu ludi kudihana mu kikuma kia a futa jiehi. ¹⁴ Enu nudi a futa jiemi yivwa nwa kumbula kuhanga mambu ma nia nu lejidi. ¹⁵ Ni ku nu tambika oku epi ana kisalu kikuma mwana kisalu kendoku kwijiya yoshu yi kuhanganga longi diendji. Nienda nia nu tambika a futa jiemi kikuma nia nu lejidi mambu moshu ma nievidi kudi tata. ¹⁶ Enu nwa ngu sodidiku ami kashi ami nia nu sodidi nia nushia mu kisalu nwendi kuteta yibundu yibundu mweni yi jingi. Yoshu eyi etshi koshu ki nwa lomba kudi tata mu jina diamemi wu ku nuhwa. ¹⁷ Nienda nia nu leza mambu ama moshu kikuma nu zolangani. ¹⁸ Yivwa athu hashi ka nu beya ejikenu etshi ami a thethikidi kubeya. ¹⁹ Nga nu khala akwa hashi ambidi ku nu zola mudi a pangi jiowu kashi kikuma nushiku akwa hashi kikuma epi nia nu sodidi a katshi ka hashi kienikioki akwa hahsi a ku nu beyilanga. ²⁰ Ebukenu ji ndaka ji na nu lejidi etshi mwana kisalu ka hitidiku fumu endji. Yivwa a ngu mwenishini pashi enu epi a ka nu mwesa pashi Yivwa a kumbudidi ndaka jiemi a ka kumbula jienenu. ²¹ A ka nu hanga mambu menamanamoshu kikuma kiamemi mu kikuma eni kejiku oyu wa ngu tumini. ²² Yivwa etshi niejidiku ku wa longa kambidiku kuhanga masumu kashi kikimweni ka lungidiku kwepa masumu mowu. ²³ Koshu wa ngu beya wa beya epi Tata yamemi. ²⁴ Yivwa nia hangidiku mu katshi kowu yisalu ya kondidi kadi kuhanga ata muthu eni ambidi ku wa tangila kubola kashi kikimweni owoshu a mweni enda kaka a beya ni ami niTata yamemi. ²⁵ Moshu ama menda ma hangama mu ku lungisa medi ma kusonika etshi mu mukanda wa jitshiku etshi A ngu beyidi konda kikuma. ²⁶ Kia kela muhombi weza ( oyu wu nia ka nu tumisa wa ka katukila kudi tata disongidila Pevi ya kiedika ya katuka kudi tata) mweni wa kata kithemu kiamemi. ²⁷ Enu epi nu ku ngu tela kithemu kikuma nwakhedi ni ami banda luyandjiku.