¹ Mitsima mienu mikhala mu wulu. Kwikilenu kudi Nzambi ni kudi ami. Mu nzu ya Tata yamemi mudi ni mafundu lawu ma kukhala. ² Nga meshiku kienekina niambidiku ku nu leza namu kikuma ami niaya ku nu hangika fundu dienenu. ³ Yivwa niaya ku nu hangikila fundu nia keza kuvutuka nwa ka yamba ami mweni kikuma hoshu ha nia ka khala enu epi nwa ka khadi. ⁴ Enu nwejiya ndjila yi ni kwendila ⁵ Toma waleza Yesu etshi Fumu tushiku kwijiyanga kwehi wu kwendanga Kiehi twa lunga kwijiya ndjila. ⁶ Yesu wa mu leza etshi Ami nidi ndjila ya kiedika wu kuhananga moyi kusuku ni muthu wa ka tula kudi tata yivwa ka hitididiku mu ndjila yamemi. ⁷ Nu ngwijiya ami nwejika epi Tata yamemi yandjika kikimweni enu nwa mwijika nwa mumona. ⁸ Fidipa waleza Yesu etshi Fumu tu leji tata he yi ku tu lunga. ⁹ Yesu wa mu leza etshi Nia khediku ni enu matshiku mengi ni kiki nushiku ku ngwijiyanga e Fidipa. Moshu wa ngumona wa mona Tata kiehi wa lunga kwakula etshi ni nu leji Tata. ¹⁰ Nwa kumbudidiku etshi nia ami ni Tata tudi muthu mumoshi. Ndaka ji nidi ku nu lezanga jishiku kukatukanga kudi ami kashi Tata wudi ni ami mweni wu ku hanganga yisalu yendji. ¹¹ Kwikilenu etshi ami Tata ni ami tudi muthu mumoshi kivwa lo kwikilenu kikuma kia yisalu yemi. ¹² Nienda nia luze ni kiedika kioshu etshi Koshu wa khumbula ami wu kubula kuhanga yisalu yi nidi kuhanganga. Wa ka bula kuhanga epi ya hitangana kikuma ami niaya kudi Tata. ¹³ Koshu yi nwa lomba mu jina dia memi ni ku yihanga mu kuhwa Tata lukumu lwa katuka kudi mwana. ¹⁴ Yivwa nwa lomba koshu kima mu jina diemi ni ku hanga. ¹⁵ Yivwa nwa ngu zola nu feti kulemvuka tsiku jiemi. ¹⁶ He ami ni kuleza Tata a nuhu tsadishi mwekha mu ku khala ni enu tangwa disohu ¹⁷ Pevi ya kiedika. Athu a hashi kalungudiku ku mu nona kikuma keshiku ku mumonanga ka mwijiku lo. Kashi enu nwa mwijiya kikuma wenda kukhala ni kujinga ni enu. ¹⁸ Ni ka nu shisa oku enu mweni nia keza epi kuvutuka kudi enu. ¹⁹ Kwa sala fioti athu a hashi ka ku ngu mona oku kashi enu nwenda nwa ngu mona. Kikuma nidi ni moyi enu epi nudi ni moyi. ²⁰ Tangwa ki dia kalunga nwa kejika etshi ni ami ni Tata tudi muthu mumoshi ni ami ni enu tudi muthu mumoshi. ²¹ Koshu muthu wudi ni mishiku yemu ni ku yikeba wenda wa ngu zola kienikioki muthu wa ngu zola wa ka zodiwa kudi Tata nia ka mu zola ti hohu ha nia ka dimwekinisa kudi mweni. ²² Yuda keshiku Yisikadioti wa leza Yesu etshi Fumu Kikuma kiaki wudi kudi tendudilanga kudi etu kashu kudi akwa hashi lo. ²³ Yesu wa vutudidi etshi Yivwa koshu muthu wa ngu zola ami a feti kukeba ndaka yemi. Tata ya memi epi wuku mu zola he nia ami ni Tata twa keza kudi mweni mu kijinga nendji. ²⁴ Koshu wu ku lekanga ku ngu zola ka ku kebaka oku ndaka yemi. Ndaka yi nu kwivwanga yishiku yamemi kashi yidi ya ngani ya Tata wa ngu tumini. ²⁵ Nia nu leza mambu ama tangwa di nidi khadi ni enu. ²⁶ Kia kela Tsadishi Pevi ya Longu ya ka tumisa Tata mu jina diemi wa ka nu longa mambu moshu ni ku nu bambukisa moshu ma nia khedi ku nu leza. Ami nia nu shishila shipidi nia nuhwa nayi. ²⁷ Ami nia nuhwediku nayi mudi kienda kuhana akwa hashi. Leka mitshini mienu mi leki kukhala mu wulu nu khala oku ni woma. ²⁸ Enu nwevidi ki nia nu lejidi etshi Ami niaya nia keza epi kudi enu. Yivwa nwa ngu zola nu kukhala ni kieshi kikuma niaya kudi Tata sambu Tata wudi mbuta kudi ami. ²⁹ kikimweni nienda nia nu leza namu ki ma leka kadi kuhangama kikuma nwa ka kwikila tangwa di ma ka hangama. ³⁰ Ni ku nu leza oku epi mambu mengi kikuma Fumu wa hashi wenda weza. Mweni keshiku ni kiyeka kia ku ngu hanga koshu kia zola kashi medi ³¹ kaka etshi athu a hashi ejiki etshi nia zola Tata nienda kuhanga menda kuthuma Tata. Zangulukenu tu katuki homa haha.