¹ Kiedidi afinama mu kuhanga feti dia Paki Yesu wejikidi kadi etsi tangwa dienji dialunga mu kuvutuka kudi Tata Wakhedi kuzola athu jienji oshu akhedi mu kifutshi Mweni wa wazodidi kamu tii kutshuka. ² Kinga lo Diabulu washidi kadi mabanza makusumbisa Yesu mu mutshima wa Yudashi Iscadioti mwana wa Simoni. ³ Yesu wejikidi kadi etsi Tata wahanini kiyeka kia yima yoshu ha mokhu menji wejikanga epi etsi mweni wakatuka kudi Nzambi wakavutuka kaka kudi Nzambi. ⁴ Mweni wazangulukidi ha mesa hakhedi kudia wazutula muledi. Wanona kitemba kia muledi wadikasa mu luketu. ⁵ Kumanima washidi meya mu dilonga wayanjika kwovwa miendu mia alonguku jienji ni kuwa kukumuna ni kitemba kiadi kashidi mu luketu. ⁶ Kiatudidi kudi Petulu Petulu wamuleza etsi Fumu Ayi wukwovwa miendu miamemi ⁷ Yesu wa mu vutudila etsi mambu ma nidi kuhanganga enu nu kumabakisa oku kikimweni kashi nwa kamabakisa kumanima. ⁸ Petulu etsi Ayi wukwovwoku miendu miemi ata fioti. Yesu wa mu vutudila etsi Yivwa niovidiku miendu mieyi ayi wukunona oku ndambu ya lukumu lwemi. ⁹ Simoni Petulu wa muleza etsi Fumu wovwoku kashu miendu miemi kashi ovwa epi mokhu memi ni mutwa wemi. ¹⁰ Yesu wa mu vutudila etsi koshu oyuna wadiovwa kadi mwila woshu keshiku epi ni fhunu ya kwovwa miendu yenji kikuma wudi kadi watoka. Enu nudi nwa toka kashi keshiku enu oshu. ¹¹ Kikuma Yesu wakhedi kadi kwijika nani wuku musumbisa kienikioki akudidi etsi enu oshu nusshiku nwatoka. ¹² Tangwa diamanisini Yesu mu kwovwa miendu miowu wavwatidi miledi mienji washikama he mweni wayaanjika kuwehwula etsi Nwenda nwejiya fhunu ya mambu mania nuhanga ¹³ Enu nwenda kuthambika Fumu to Longi nwenda kwakula mambu ma kiedika kikuma ami kinidi kioki. ¹⁴ Yivwa ami nidi Fumu to lLongi dineu nia nu sukula miendu enu epi nu feti kwovwa miendu mia a pangi jienu. ¹⁵ Kikuma Ami nia nu leza mitshindu wa kuhanga enu epi nu hangingi kienekina. ¹⁶ Nia nuleza ni kiedika kioshu etsi musadi kahitidiku fumu wenji ngenji epi kahitidiku muthu wa mutuma. ¹⁷ Enu kinwevwa mambu menama yivwa nwa mahangila kienekina nu kukhala ni kieshi kingi. ¹⁸ Ami nishiku kwakudilanga enu oshu kikuma ami niejika athu ania sodidi kashi ami nienda niakula kienekina kikuma mambu masonimini mu mukanda wa Nzambi malungi Muthu oyu ukudinga longa dimoshi nia ami mweni yoyu wakangu sumbisa. ¹⁹ Ami nienda nianu leza mambu ama kikimweni meni kandiku mahangama. Kimakela mahangama enu nuswakadi kukwikila etsi ami nidi. ²⁰ Ami nienda nia nuleza ni kiedika kioshu etsi Koshu muthu wangu yamba ami wayamba muthu oyu wuniatuma Muthu wangu yamba ami wa yamba oyu wathumini ami. ²¹ Tangwa diamanisini Yesu mu kwakula kienekina mweni wevidi pashi jingi ku mutshima wenji. He wa watendudila mweni etsi Mukasthi kenenu mudi ni muthu mumoshi wukuzolanga kungu sumbisa kudi a mbeni. ²² A longuki ayanjika kutalangana ni kuhwangana eni etsi nani Yesu akwakudilanga. ²³ Mu longuki mumoshi wakedi kuzola Yesu hengi wakhedi wayekama ha thulu ya Yesu tangwa diakhedi kudia. ²⁴ Simoni Petulu wabweta disu kudi mulonguki mweno oyuna mu pila etsi awaliji nani Yesu akhedi kwakudila. ²⁵ Mulonguki mweno oyuna wayekimina athulu ya Yesu wa muhula Fumu nani yoyu? ²⁶ Yesu wavutudidi etsi Ami niamba kushia kitshini kia dipa mu supu koshu wuniamba kuhwa mweni yoyu. Tangwa dia vuwa dipa mu supwa wahwedi Yudashi mwana wa Simoni Yisikadioti. ²⁷ Kiela wadia dipa Satana wa mwingidila. Yesu wa muleza etsi koshu mambu wazola kuhanga hanga tswalu. ²⁸ Ata muthu mumoshi mu owu oshu akhedi kudia kejikanga oku ekhi Yesu aku mulejilanga kienekina. ²⁹ Athu ekha abanzaanga etsi kikuma Yudashi wakhedi kusweka mbongu henihohu Yesu wamulezanga asumbi yima ya kuhangila feti. ³⁰ Ekha kama abanzanga etsi a feti kuwa a tsukami ndambu ya yima. Kiela wanona dipa Yudashi wahuhudikidi mbala yimoshi hanji. Pipa yabwa. ³¹ Tangwa diawukidi Yudashi Yesu wakula etsi Kikimweni Mwana wa muthu wanona lukumu lukumu lwa Nzambi epi lwa mwekana kudi mweni. ³² Nzambi wuku mwekinisa lukumu lwenjimweni kudi mweni mumbala yimoshi mweni akumuhwa nalu. ³³ Ana jiemi ami ni kukhala oku nienu tangwa dingi. Nakabula kupenga nienda niakula mudi kinialejidi a Yuda Enu nwalungidiku kwenda ku nikwendanga ami. ³⁴ Ami nienda nia nuhwa tshiku yapah Zolanganenu enu ni enu mudi kiniakhedi ku nuzola ami enu epi zolanganenu kienekina. ³⁵ Kienikioki athu akejika etsi enu nudi alonguki jiamemi. ³⁶ Simoni Petulu wehudidi kudi mweni etsi Fumu Kwehi waya ayi Yesu etsi Kuma kuni kwendanga ami ayi walungidiku kungu laba kikimweni kashi wakandaba tangwa diekha. ³⁷ Petulu wa muwula epi Fumu ekhi ni kuleka kukulabila kikimweni Ami niakahana moyi wemi kikuma kiayeyi. ³⁸ Yesu wa muvutudila etsi ayi wakula etsi wakahana moyi weyi kikuma kiamemi nia kuleza mu kiedika nzolu wa thethi kaka kokuloku kadi ayi waka tsuwangana mbala jisatu.