¹ Nia nu lejidi mambu menamana kikuma nu leki kubwa. ² A ka nu kaya mu manzu mowu ma yisambu Tangwa dia lunga awa a ku nu jiya a ka banza etshi enda a hangila Nzambi. ³ A ka hanga kienekina kikuma eni kejikidiku Tata ni Ami. ⁴ Nia nu lejidi mambu menamana nwijiki etshi tangwa di ma kabwa enu nu swakadi kwibuka etshi nia nu lejidi kadi namu. Nia nu lejidiku namu mu luyanjiku kikuma ami nia khedi ni enu. ⁵ Niaya kudi oyu wathumini ni muthu loni mu katshi kenu wa nguhula etshi kwehi niaya. ⁶ Kikuma nia nu leza kienekina mitshima mienu miazala ni khenda. ⁷ Ejikenu etshi nia kula kiedika. Medi mboti kudi enu ami niendi kikuma yivwa niendiku tsadishi ka kwiza oku kudi enu Kashi yivwa niaya nia ka nu tumisa nenji. ⁸ Tangwa diakeza Tsadishi wa kalombulula pwelele kubola kwa kifutshi mu kutala masumu masonga ni kuzenga kwa mambu. ⁹ Wa kalombulula etshi edi ni masumu kikuma eni ka kwikididiku ami ¹⁰ Mu masonga kikuma ami niaya kudi Tata nwa ka ngu mona oku epi ¹¹ mu kuzenga kwa mambu kikuma fumu wa yala kifutshi a mu zengila kadi ndola. ¹² Nidi ni mambu mengi ma ku nu leza kashi nu ku mabakisa oku kikimweni. ¹³ Kia keza mweni Pevi ya kiedika epi yakeza mu ku nu sadisa mu katshi ka kiedika kiosu kikuma kaka buloku kwakudila mambu ma mambanza menjimweni kashi waka bula kwadila mambu menda kwivwa ni mambu ma kabwa kumesu. ¹⁴ Waka nguhwa lukumu kikuma wakanona mambu kudi ami ni ku nu leza. ¹⁵ Yosu yidi ni Tata yidi yamemi henihohu nia kudila etshi Pevi waka bula kunona mambu mosu medi kudi ami ni ku nuleza. ¹⁶ Tangwa dia sala ditshiotu enu nwa ka ngu mona oku epi mu mwa tangwa fioti nwa ka ngu mona. ¹⁷ Kiatshi kia Alonguki jienji ekha ayanjika kuhwangana Mambu mekhi mama edi ku tulezanga etshi Kwa sala fioti nu ku ngumona oku epi ku manima ma mwa tangwa nu ngu mona epi Kikuma nienda niaya kudi Tata. ¹⁸ Eni he akula etshi ekhi kamu a kuzolanga kwakula Mu tangwa ditshiotu. Etu tushiku kwijikanga ekhi a kuzolanga kwakula. ¹⁹ Yesu wejikidi etshi eni akhedi ni mambanza ma ku muhula he mweni wa waleza etshi Nwenda nwehwangana etshi ekhi niazola kwakula mu ndaka eyi Mu tangwa ditshiotu enu nu ngu mona oku epi kumanima ma mwa tangwa nu ku ngu mona. ²⁰ Makiedika kamu ni ku nu lezanga enu nwa kadila ni ku nienganana kashi akwa kifutshi ni kuseyila nwa kakhala ni khenda khenda jienu jia kalumuka kieshi. ²¹ Mukhetu wenda kukhala ni khenda yivwa tangwa dia kubuta dia lunga kikuma kia pashi. Kashi yivwa wa buta wajimbangana pashi jievwanga wekhina mu kieshi kia mwana wa butuka mu kifutshi. ²² Ni Enu epi nudi ni khenda kikimweni kashi nia keza epi ku nu tala mbala yikowu mitshima mienu mia kakhala ni kieshi ata muthu kaka nu katula oku kieshi mwenekina. ²³ Kilumbu mwenekina nwaka nguhwula oku ata diambu dimoshi. Nienda nia nu leza ni kiedika kioshu etshi Kioshu ki nwa lomba kudi Tata mu jina diemi mweni wuku nuhwa. ²⁴ Ni kieneki ata kima kiomshi nwa lombidiku kadi kudi Tata mi jina diemi Lombenu nu kunona kikuma kieshi kienu kikhadi kia lunga. ²⁵ Nia khedi ku nu leza mambu menama mu yingana kashi tangwa didi nia kakula oku epi mu yingana kashi kamu pwelele kikuma kia Tata. ²⁶ Mu kilumbu kienekina nwa kalomba mu jina diemi nia kudidiku etshi nia kalomba Tata kikuma kienenu ²⁷ Kikuma Tata enjimweni wa nu zola sambu enu nwa ngu zodidi sambu epi nwa kwikila etshi ami nia katukidi kudi Tata. ²⁸ Nia katuka kudi Tata nieza mu kifutshi nienda nia nuleza epi etshi nienda nia sisa kifutshi niaya kudi Tata. ²⁹ Alonguki jienji akudidi etshi wamona wekhina kwakula luthungu wushiku epi kwakulanga mu yingana. ³⁰ He twejika etshi ayi wejiya mambu moshu wushiku ni fhunu etshi muthu akuwudi epi. Twejika he etshi wakatukidi kudi Nzambi. ³¹ Yesu wa wavutudidi etshi nwa kwikila kia. ³² Talenu tangwa dia henga kulunga dia lunga kodi kadi a ku numwanga koshu muthu kunzu yenji nu ku ngu sisa ami mweni. Ata kienekina nishiku ami mweni kikuma Tata wudi ni ami. ³³ Nia nu lejidi mambu menamana nu swakadi kukhala ni ngemba. Nwa kamona pashi jingi mu kifutshi kashi khalenu ni kikesa Ami nia nunga mambu moshu mu kifutshi.