¹ Ata, ki nidi mu boloku dia Fumu, nienda nia nuhwa kikesa kia kujinga ni yifu ya pimbu ya lunga kukhala kudi athu nwa kumbula kuhangila nzambi. ² Nu khaloku lukambu,Lekenu mathatha, kasengenu mutshima. Nu feti kuzolangana. ³ Nu feti kushianga nolu mu kukeba kimvuka ki nudi naki mu Kipevi ni ngemba yoshu. ⁴ Enu oshu nudi muthu mumoshi. Pevi ya Nzambi yimoshi, mudi kidi kaka mambu mamoshi kaka medi ma nu feti kushila mutshima. ⁵ Fumu wudi kaka mumoshi, lukwikilu lumoshi,mbotika epi yimoshi. Nzambi wudi kaka mumoshi,tata wa athu oshu. ⁶ Wudi ha wulu dia yima yoshu , wenda kuyala ni kuhanga mutshima mia athu oshu. ⁷ Kudi koshu muthu makabu ma pevi ma tu kapila Khidishitu meshiku pila yimoshi. ⁸ Mudi ki medi ma kusonika: Tangwa dia kandukidi ku wulu ,wa sendidi ambeni awana akwatidi ku manima wa kapididi athu makabu. ⁹ Ekhi kamu yi kuzolanga kwakula etshi wendidi ku wulu? to esthi wa kulumukini mu kalunga? ¹⁰ Wendi thethi mu kalunga kumanima wa kanduka ku wulu. Wahangidi kienekina mu pila etshi wulu ni mafu mazadi ni lukumu lwendji. ¹¹ Khidishitu wa kapishidi makabu pila eyi: Athumwa, ambikudi, amalongi ma ndaka ya nzambi, a Pasteur ni a Docteur. ¹² Wahangidi kienekina mu kushia a khidisitu mu ndonga ni kukatula kisakasaka mu kisalu kia nzambi, dibundu dikhadi ngolu. Wa mkahangidi mu ku tusadisa tii kooku tu ¹³ wongami mu lukwikilu etuosu tujiki mwana wa nzambi. Tu feti kukula tii twakhena athu akula twikini mudi Khidisitu enzimweni. ¹⁴ Kienikioki tu kukhala oku epi mudi ana bibi, mabanza kuku ni kuku. Malongi ma pila ni pila ma tu benda oku, mudi kienda kubenda muhunga wenda kusenda athu kuku ni kuku. ¹⁵ Kashi tu feti kwakulanga mambu ma kiedika ni kuzolangana; he twa kakula mu mambu moshu mudi kidi khidishitu mutwa wa dibundu. ¹⁶ Ndambu jia mwila jidi jia kwatangana,misisa mia kwata mwila woshu. Koshu ndambu yenda kuhanga kisalu kioyi,mwila woshu wenda wakula nu kwikhina ngolu. ¹⁷ He mu jina dia fumu Yesu niazola ku nuhwa kikesa: nu jinganga oku epi mudi athu akonda kwijika Nzambi edi ni enda kulaba mambu makonda fhunu. ¹⁸ Mayela mowu medi ma pipa, eshiku ni moyi wenda kuhana nzambi, kejiku kima kikuma edi mutshima mia wa bola ni mutwa ngolu. ¹⁹ Eni kakwivwanga oku soni mu mambu mabola menda kuhanga ni kubanza. Adihana mu kuhanga mubulu wa pila ni pila. ²⁰ Kashi keshiku kienekina twa nu longidi mu kwijika khidishitu. ²¹ Niejika etshi enu a nu longidi mambu matadila mweni, etshi kiedika kidi kudi Yesu. ²² Nu feti kukatula yifu yikulu,kikuma yikubula kasu ku nu senda mu kuhanga mambu makulu, kikuma athu edi nu mambu ma kulu abeba, enda kuzola kuhanga kaka mambu ma konda fhunu. ²³ Kikuma mabanza menu ni mitshima mienu mikhini mia katataka. ²⁴ Nonenu yifu ya katataka eyi ya hanga nzambi pila yidi enzimweni,nu kukhala kamu athu a bathu, edi ni kinzambi. ²⁵ Lekenu wukhubidi. Koshu muthu akudingi mambu ma kiedika kudi mukowu, kikuma etu oshu tudi twadivinga mu mwila wumoshi. ²⁶ Yivwa nwevwa khabu,nu hanga oku kubola. Khabu ji jiotila oku tangwa. ²⁷ Nu hwa oku satana ndjila a nu yadi. ²⁸ koshu muthu wakhedi mwiji aleki wiji, kashi akumbudi kumona pashi jia kisalu kia mokhu mendji, walunga ni mweni kukapila athu edi mu pashi. ²⁹ Lekenu kulata dia kwakula. Kashi yivwa diambu didi akulenu mambu malunga kusadisa athu edi ku nwivwanga. ³⁰ Nwivisa oku Pevi ya Nzambi nkenda,kikuma yidi nzimbu nzambi a nushila ,yidi kulombululanga etshi wa ka nu hulusa mu kilumbu kia tshuka. ³¹ Nu khala oku ni mutshima wa khu,wa khabu, wa matendu ni matuka. Katulenu mabanza moshu medi mabola ma nudi namu. ³² Kashi Jingangenu pimbu,nu di sadishingi. vidishila pangieyi mudi kia kuvidishididi Nzambi mu njila ya Yesu.