¹ Ntang nge mbom Yezu ngum, olal avar molab wande. ² Ntang ngeni, wur emwatuk eyinde lankang e Lepre me kende lefukam lenku e Yezu, nda mugne: nk'mu, onsarsa me nkumnsa,ozuk yolang. ³ Yezu mosim nde ewua,mokir nde, nda mugne:" me melang, yen nsa!". Mbal emwatuk, nkang za mesia za. ⁴ Ntang na Yezu mokab nda mugne:"keb! obia kab ansa wur, kansi kayen Anganga Nzama, pawa makab ekwa ngakab Moyize lepa kaka, itsen lekab avar ke yome yen sa". ⁵ Ntangu me swe Yezu lewaa Kapernaum, nk'mu emwatuk a Soda e Roma mezewuon nde, ⁶ nda mugne: nk'mu, mpik eme mwatuk ale nkar lember, ndeyen mbwa djegna. ⁷ Yezu mokab ndamugne:" me ntize lebelusa nde". ⁸ Nk'mu ni nda mugne:" nk'mu,mpe kuwu loyam levl'e eme be. Kansi tib ke lodum,mpik eme kayen nde nsa. ⁹ Me mpi ba lemfuk me la nk'mu, mbuyi ti asoda nga fetel lenzuk me. Ozuk metib ma soda me kiene! nde fetel lekiene. Ozuk metib ti Soda emwa: Zak! nde fetel leza. Ozuk me tib ma mpik eme: kie abim ngena! nde fetel leekie. ¹⁰ Ntang Yezu me zuk nde eshuong ngesa, me yituk nde: me kab nde avar ngeyi olab nde otin na:" me ntakab no dji-dji: Mpang ayen kundim otin na ntete be, atat lewa wur emwatuk Israel. ¹¹ Me ntakab ma mugne avar olal kafwa Este ti Weste, ka zezawa le mesa ti nk'mu Nzama, Abrama, Izak ti Yakobi. ¹² Kansi avar ni izawa lok'mu, Nzama katom nde wa lelien, lepib. Loka keni kalewa,kakur mbwa adzen. ¹³ Ke Yezu me kab nde nk'mu Asoda za ndamugne:" kal evl'e eyia. Eshuong me kwikil ya laza ngena, isalama itsen layia. Kaka ntang keni, mpik e nk'mu ngeni me gulusa nde. ¹⁴ Yezu mekien nde evl'e e Pier, meyen nde okl'e Pier onkar ame bir lember la fievre. ¹⁵ Mokir nde lewua, fievre me siawa; me zum nde ntang ni, me bagne lekiel Yezu bivan emwa. ¹⁶ Ntang otshu me bagne wa leyila, meyil wa Yezu avar olal ngeyi lawa mpeve ipwa. Yezu meper nde ampeve ipwa ti eshuong nge tib nde; mebeluka avar kokin ngeyi lankang. ¹⁷ Ekiende otin ni itsen lekukisa avi nge tib mbikur Ezayi:" Nde ngaza amevey ampasi eso, ame lim kimbefo eso". ¹⁸ Ntang avar meyil wa Yezu olal,makab nda mugne: Sabiak no sim evey e Mer e Galileya. ¹⁹ "Long ansik emwa me zo kab nda mugne:" long,mefetel lolab yia konso oka nga kien yia". ²⁰ Yezu mokal nde:" Niam pavi wa ombala ale ti mb'wu, amfl'e ale ti ayab awa, kansi van wur pale likir oka kakien nde lebil be". ²¹ Wur emwa ngeyi longoki e Yezu, metib nda Yezu nda mugne:" nk'mu, ompa ntete mbok, leka fegn taa me". ²² Yezu nde:" be, zondab me, ke meng avar nge me wa, wa fegn avar awa nge mewa". ²³ Ntang na, Yezu meswende lengab, Alongoki ende mpi ekien wa ti nde. ²⁴ Wul ebir me nig za vey e Mer . Ani, ngab me yantik za leyu lavey. Kansi eyinde lila. ²⁵ Alongoki meko sum wa nde lila, wa mugne:" nk'mu,gulusa so, soling lewa! ²⁶ Yezu nde:" itsen lange nge zuk no woma? lukwikil eno ile itshi! ntang ni, mezum nde, mengang nde wul ti vey,ke oku konso meya za nie. ²⁷ Avar me tsig wa ke losum. Wa mugne:" ngena otin o wur nge? ata wul ti vey mpi elemfuk lande! ²⁸ Ntang Yezu mekum nde lisum, leboo avar e Gadara, avar ape mepwe wa le maziam, letay wa e Yezu. Eyiwa lawa mpeve ipwa; eyiwa epa avar woma mpil be, nduk za, nsa wur ngeyi ava bir leling lembok ni be. ²⁹ Me yantik wa letib bir ke:" yia van Nzama, yeyia su oshuong nge? keti me yaya ana itsen lepa so mpasi, ntang esu epalung ntete be? ³⁰ Olal angwil, eyiwa pipi loka keni, ika lela. ³¹ Ampeve keni me wuon wa Yezu wa mugne: Ozuk yolang lepur so, tum so koswe leti angwil ngeni. ³² Yezu nde:" E kaa no!" nduk za mepweza, meke sweza langwil ekwa. Angwil za me lim wa ivang lengum, me ke kwawa le vey e mer, mpi mewa-wa. ³³ Avar ngeyi ekiang angwil me lulur wa, mekien wa lepay esang le waa, ti eshuong nge kwil avar ngeyi lawa mpeve ipwa. ³⁴ Avar awaa ni kokin mekien wa letay wa Yezu. Ntang moyen wa, mo wuon wa nde wa mugne:"pado, lim ana leboo eso!"