¹ Yi hoka bwabu, nzaambi wulosa kanda diandi? lo! saamu me phe yene musi izalayele, kanda di Abalami, kikolo ki Manzamina. ² Nzaambi kalosoko kikanda kiandi kikayaba kuna kintete. Luyebeko na masonama ma santu mahoya mu mambu matadidi Eliya, bwa kabokuti kuntwala Nzaambi saamu di Izalayele? ³ "Pfumu, bahonda ba Profeta baaku phe ba mpanzikisa nzoo zi bimenga. Yendi mene yi sala phe beka zola ba mponda." ⁴ Nki mvutu ka mongi kwe Nzaambi? "'Yi hoyuku mafunda tsambwadi ma bayakala bakonda fukamina nzaambi Baala." ⁵ Piila mosi, mu ntangu buntwene, basala ndambu kikuma ki lutondu lu Nzaambi. ⁶ Nadi kala saamu di lutondu, nabuna keku mu bisalu. Na lo, lutondo lunka kala dihika lutondo. ⁷ Nki di hika? Izalayele nki kakala sosa, kamonga bioko; mana baatu bakasola Nzaambi ba monga bio, mana masala makuma tooto. ⁸ Buna masonama: "Nzaambi wu ba heka mpeve yi kutengita-tengita, ye mesu mabakonda mwene, ye maatu mabakonda wila tii ye lelu kiaki." ⁹ Davidi hoyi: "mesa ma bawu makuma bukondi, n'tambu, nzila yi kuba nata mu masumu, kukabusa mbela kwe bawu. ¹⁰ Yambula mesu ma bawu mabwa mpipa mukusia na bamoniku dihika. Milombu mi bawu mikala mikondalala." ¹¹ Yihoya donc: "ba shelumuki mukusia ba bwa?" lo. Mana kubwa ku bawu ku nete luhulusu ku ba mpani, mukusia na kimpala kibutuka mu mbundu bawu. ¹² Bwabuna, na kubwa kubawu kwe kimvuama ki tsi n'toto phe kulala ku lala ku bawu kimvuama ki ba mpani, Nki piila ku kakala kutoka ku tsoni zi bawu? ¹³ Yekahoya buntwene kwe ba mpani. Buna ye kaka ntumu ba mpani, ye yelulendu lu kisalu kiama. ¹⁴ Nkani mfwene yi tombula kimpala ki ba mpangi zama. Nkani tu ba hulusa bahika hakati di bawu. ¹⁵ Saamu na kulosama ku bawu kuba nata muku kabusa ngemba mu tsi, bwe dikala kutambusama ku bawu, na keku luzingu mukati di ba fwa? ¹⁶ Na bima bi ntete bikatuka mu bilanga biebi bunkete, bwabuna bikala kitini kidi phâ. Na n'zembu ke wu santu, mahandika phe me ma santu. ¹⁷ Na ma handika mahika makala matoluka, ngeye, handika di n'ti wun'katika tseke, bakuyika ku luhandika luhika, weka dia maba ma matukaka mu mizembu mi n'ti Olivie, ¹⁸ Di kumusiku mamba ma mahandi mahika. Kasi na wudikumisa, yaba na ngeye we ye misodi, kasi misodi mieka kusimba. ¹⁹ Hoyo mana: "Ma handi ba namuna mo mukusia be mpatika mo kun'ti hika." ²⁰ Bu makieleka! Saamu di kukonda kusambila ku bawu ba banamunini, kaasi ngeye sala huma mosi kikuma ki lukwikilu lwaku. Kadiku ye mabanza mingi saamu di ngeyene, kaasi kala ye kubanga. ²¹ Saamu na Nzaambi kataniniku mahandi mana ma dimenina, ngeye phe kaku taninoko. ²² Talaka mambu ma mboti phe kangula meso mu mambu ma Nzaambi. Ku ndambu ntete, Kukangula meso kuisi kwe ba Zuifi mana ba bwa. Kundambu zole, mamboti ma Nzaambi maku kwisila na wu kakangama mu mamboti mandi. Na keku bwabuna baku katula phe. ²³ Phe, Naba seloko ba kangama mukonda kusambila ku bawu, ntu bva mpatika dihika mu mbala yizole. Saamu Nzaambi kene kaba mpatika dihika. ²⁴ Saamu na baku zengi mun'ti Olivi wu nkatika tseke, wuna wubunkete wu dimenina, Mana bwe na ba Zuifi ba bene mahandika mankatika tseke ma madimenini, baba yiika mun'ti wu bawene? ²⁵ Saamu yizoloku, ba mpangi lukala baatu bakonda zaya mu swekamu ma, samu lukadiku bakonda ngangu mu mabanza ma benu. Di swekamu di kwene ye ndambu zi mbundu zi toto ku Izalayele, yekuna bakota ba mpani baakulu. ²⁶ Hakana hata di Izalayele diakulu di huluka, buna masonama: "Kuna Siyoni kutuka ngulusi. Kahulusa Yacobu ku baatu ba mbundu mbi." ²⁷ Diadi dikala kuwakana ku mene ye bawu hana yikatula masumu." ²⁸ Ku ndambu hika, natu tala m'samu bunkete, be ba mbeni mu kikuma ki benu; Ku ndambu hika, buna kasola Nzaambi, Be ba mpangi ba tondama kikuma ki ba taata zi bawu. ²⁹ Saamu ka bu ye mbila Nzaambi ma sobaku. ³⁰ Saamu ntangu yi hioka lu lemvukiku kwe nzaambi, buntwene Nzaambi lu fwididi n'kenda saamu di kukonda kulemvuka. ³¹ Piila mosi, ba Zuifi ba lemvukaku. Mvutu yikala na, n'kenda wu balu fwila, ba mongi bahu phe n'kenda. ³² Saamu Nzaambi ka bakwataka baatu baakulu muku konda kulemvuka, mukusia kaba fwila n'kenda. ³³ Ô dingu di kimvuama dikala di ngangu to di kuzaya Nzaambi! kusambisa ku yandi bafweneko batesa kwo phe nzila zi yandi ziyabakaniku! ³⁴ Saamu nawuzaya ngindu zi Pfumu? phe nawu kumi n'hani milongi wu yandi? ³⁵ Ho lo, na wuhana kene kima ku Nzaambi mukusia kan'kabusila kio? ³⁶ Saamu bima biakulu biebi yandi, kwe yandi phe mu yandi. Kwe yandi lukumu mu ntangu mvula ye mvula. Bwabuna.