¹ Yezu phe kwe balongoki ba'ndi: «Mutu mosi wu mvwama kakala ye n'kengididi bima. Bisa n'kabula ne kakala bebisaaka mu phamba bima. ² N'tedi ye kan'kambaka: 'Khi bingwiidi beka hoya samu di ngeyi? Za tendula ndatisini yi bima, samu fweneko diaka wu natisa bima bi mene. ³ N'kengididi kadihoyilaaka: Khi tsadi, samu n'longi mene kaphotumuna kiyeka ki ku natisina bima? Yi wiila kwo tsoni. ⁴ Nzeye buna yi sala mukusonga ne hakala ye batu ba bangiamba kwe bawu ha bakhula mu kisalu ki mene. ⁵ Tedisi batu baakulu ba badefi mbongo zi n'longi yangi phe hoyi kwe wuu thete: 'Thalu kwa fweti futa kwe n'longi mene? ⁶ Yi fweti futa zi ngungudi khama zi maasi ma Odive', kabusi mvutu. Kan'kambaka: Tala kitan'si ki ngeyi, zakala ye tswalu haka phe sonika makûmi ye tanu. ⁷ Kahoyaka diaka kwe wuna wu kaka: 'Ah ngeyi, thalu kwa fweti futa?' Yi fweti futa bitesilu khama bi mbuma zi blé, kabusi mvutu. Phe kan'kambaka, tala kitan'si ki ngeyi, sonika makumi ye nana.' ⁸ N'longi yidiki malongi malukumu ma n'kengididi wu konda masonga kikuma ki mbundu ku kanguka yi ka songidi. Mukutala, bâna ba n'toto wandu bene ye mbundu yi kukanguka bwingi ha thwala n'kangu bawu yi ba kônda bana ba miesi. ⁹ »Phe mene, yeka lusamuna: Lusala binduku ye bi vwama bi konda masonga, mukusonga ne baluyamba mu bizingilu bi konda tsuka muthangu bikwisa lukonda. ¹⁰ Wuna wene wu kwikama mu bima bi kheke kee ye ku kwikama mu bima bi mbuta, phe wuna wu konda masonga mu bima bi kheke, keeku mawu phe mu bima bi mbuta. ¹¹ Mana ne lu keleko ye kukwikama ku mbundu mu bi mvwama bina bi konda bimasonga, na luheka bima bi bukhete? ¹² Phe ne lukeleko ye kukwikama ku mbunda ku bîma bi biene bi ngani, ne luheka bi biene bi beno? ¹³ Hakhatu n'tsadi fwene ka sadila balongi bôla mu mbala mosi, samu ngatu fwene kan'busa wuu thete phe kazola wuu zoole, holowu ka phusana bele-bele ye wû thete ye kan'safula wû zôle. ¹⁴ Mukuwaaka mambu mana maakulu, ba Fadizie ba ba zodiiki mbongo bakala n'seyaka. ¹⁵ Yezu kabasamunaka: «Beno, ludingaka lumonikaka batu ba masonga kuthwala batu, mana Nzambi zeye mbundu beno. Mutsadilu, kina kiene kizolama bwingi kwe bâtu, kiene disumu dingolo kuthwala Nzambi. ¹⁶ N'tsiku ye ba mbikudi ba zingi diaka tii ye kwe Yowani; yandika hakana, tsangu mboti yi Kipfumu ki Nzambi yi phanzana phe konso mutu kekadinga ye ngolo samu ka kota. ¹⁷ Zulu ye n'toto bi hioka ye malembi maakulu mana kete ditonzi di mosi di kisona ki n'tsiku kibwoko. ¹⁸ Konso yakala wu kula n'kheto yandi ye ka kwela wu hika bebisi n'tsiku longo, phe konso yakala wuna kwela n'kheto wu bakula kene ku longo bebisi n'tsiku di kwela. ¹⁹ ». Hakala ye mwana yakala mosi wu mvwama, wuu vweteke milele mi bashia n'kubi wu kabenge ye batunga ye misinga mi ngolo phe wu zingiki luzingu lubukhete konso kilumbu. ²⁰ Phutu mosi mu zina di Lazadi kakala nimbiki ha thwala kielo, wu bela bivimba. ²¹ Kasepidi ka yukutaa ku bikesumuni bi mapha bii bwidiki mu tsi mesa ma mvwama, khiakina ata ba mbwa ba yisi hendaka zi phuta zi bi vimba bi yandi. ²² Phutu fwidi phe ba wanzio ban'nete kuthwala Abalayami. Mvwama fwidi phe ye ba n'ziki mu mafu. ²³ Mukilumbu ki ba fwa, mukati di kiadi ki phasi zi yandi zi ngolo-ngolo thuti meso phe mwene ku kiana Abalayami, ye Lazadi kukhala yandi. ²⁴ N'tedi ye ndinga ngolo: 'taata abalayami, ngwila kiadi phe n'tuma Lazadi samu kabodisa tsongi n'lembo yandi mu mamba samu kakhabula mwa kiosi lulumi, mudiambu yeka mona phasi zi ngolo ha kati di n'lemu mbawu. ²⁵ Abalayami kabusi mvutu: 'Mwana mene, yibuka ne yembeeke kimvwama muthangu luzingu lungeyi phe Lazadi ka kutani ye phasi muthangu ngeyi; buthwene, ban'sunga haka ye ngeyi phe, weka mona phasi. ²⁶ Diaka, hene ye bilungu bi mbuta hakati di beto ye beno, mukusia ne bana ba zodi ba hioka hakati ye kwe beno, holowu kwe beno ye kwe beto, ba sadi bwoko.' ²⁷ Mvwama ka hoyaka: 'Yeka kubondila ne bwana, tata, wun'hitika Lazadi kwe tata mene, samu yene ye baphangi ba bayakala ba tanu. ²⁸ Bwene samu kabatsika, mukusia ne bakumiku ku tsuka, bawu phe, mukati di phalasi yayi yi phasi. ²⁹ Abalayami n'kabusidi mvutu: 'Bene ye Moyize ti ye ba mbikudi, ba bawudila. ³⁰ Mvwama hoyi: 'Lowu, tata Abalayami, mana ne mutu katuka kubafwa kenda kwe bawu, ba soba khadilu.' ³¹ Abalayami kan'kambaka phe: Ne ban'wididiku Moyize ye ba mbikudi, ba di yambudiloko ba kwikila, kete mutu futumuki.'»