¹ Ba ngalasasi baakulu ye batu ba luzingu lu mbi ba mpusani belebele ye Yezu mu diambu di ku'wa. ² pe ba Fadizie ye ba siklibi bakala bokuta-bokuta, ba hoyaka: mutu wandu kayamba batu ba luzingu lumbi, pe keka dia ye bawu. ³ Mani kaba teelaka kingana kiaki: ⁴ Nki mutu mukati di beno, ne kene ye mameme nkama, pe kaladisa di mosi, ka konda siisa mana ma hika ma makumi vwa ye vwa mu n'toto wu zelu-zelu (tseke) mu kwenda belebele ye dina di ladiki, tiye kuna ka di mona? ⁵ mu ntangu yi ka di mwene, n'sidi ye kiesi hantandu kimpanga, ⁶ pe, mu ku kabuka ku nzo, tedi ba nduku ba'ndi ye batu ba kazinga bawu belebele, pe ba keembe: Lu sepila ye mene, mû diambu Yidi mwene dimeme di mene di diladi. ⁷ Mpila mosi, yeka lusamuna, kukala ye kiesi kiingi ku zilu ki kuma ki n'sumuki mosi wu lombi ndolula masumu, kuluta mana ma makumi vwa ye vwa makonda m'funu ndulusama masumu. ⁸ Holowu nki n'keto, ne kene ye makuta ma bibende kumi, pe ka ladisa di mosi, ka konda mpedisa mwinda, ka konda kombula nzo, pe ka konda dinga ye kitoko kiakulu, tiye kuna ka di mona? ⁹ Muntangu yi ka di mwene, katele ba nduku ba'ndi ye batu ba kazingaka bawu belebele, pe hoyi: Lu sepila ye mene, mudiambu yi di mwene dikuta di ntalu dina yi ladisi. ¹⁰ mpila mosi yeka lusamuna, kwene ye kiesi kingolo ku ntwala ba wanzio ba Nzambi mu diambu di n'sumuki mosi wu lombi ndolula masumu. ¹¹ Ka hoyaka diaka: Mutu mosi kakala ye bana boola ba bayakala. ¹² Wuna wukala ngunza bwingi kahoyaka kwe tat'andi : Tata mene, mpeka mene kiteso ki bima bi fweti kala bi mene. pe tata bakabisi bima bi'andi. ¹³ Ku nima di bilumbu bi nkeke, wuna wukala ngunza bwingi, mudiambu bima bi'andi biakulu kakala wongikiki, wele ku tsi yi kiana, kwakuna ku kayenda ladisila bima biakulu muku zinga luzingu lu bidiadia ye bi nwa nwa. ¹⁴ Muntangu kamanisi biakulu, nzala yi ngolo yi koti mu n'toto wanduna, pe ka mongi yandiki ku diwa mu m'funu bima. ¹⁵ Ka mongi we zakala ku kisalu ki mutu mosi wu batu ba kwa n'toto, mutu wana ka n'tumi mu bilanga bi yandi kabatila bangulu. ¹⁶ Ka zodiiki bwingi ka diaka madia madidiki ba ngulu, mani kete mutu wu ku n'heka kamweneko. ¹⁷ Kimutu(zingindu) ki n'kabukidi, ka di hiulaka: ba hika ba kwa kwe tata mene bene ye mampa ma hiokaka kitesu, pe mene, yeka fwa ye nzala! ¹⁸ Yi telama kaka, yi kwenda ku kwene tata mene, pe yi n'kambi: Tata mene, ndete disumu ku ntwala zilu ye ku ntwala ngeyi. ¹⁹ Yeko diaka wu fwana ba ntele mwana ngeyi, mbonga bwoso monga mosi hakati di ba hika ba ngeyi. ²⁰ Pe katelemi, ye wele kwe tat'andi. Buna kakala kuna kiana, tat'andi 'mwene pe kiadi ki n'kwete, n'lemukini ntinu mutsingu pe n'hele bisi n'tama. ²¹ Mwana n'kambi: Tata, yi sala mbi ku zilu ye ku ntwala ngeyi, pfweneko dihika ba ntele mwana ngeyi. ²² Mani tata ka hoyaka kwe ba tsadi ban'si: Lu'natina n'lele wuna wu bu nkete pe lu'mvwatisa; lu'mvwatisa kimpata mu n'lembo, ye masabati ku malu. ²³ Lu'natina mwana ngombi wuna wu masi-masi mana pe lu n'honda. Ntu'diene pe ntu weno kiesi. ²⁴ mu diambu mwana mene wu moniki kakala wu fwa, pe wisi kabuka mu luzingu, kakala wu lala, pe moniki. pe bayindiki ku yangalala. ²⁵ kinga, tsomi kakala ku ma sola. Buna ka tombuki ye ka tuudi belebele ye nzo, widi mikunga ye makinu. ²⁶ Tedi n'sadi mosi pe n'hiudi bina bisa bwa ku nzo. ²⁷ N'tsadi wene kan'kambaka : mpangi'aku yakala wisi kabukaka, pe, ki kuma ka'mwene ye lutu lu bunkete, tat'aku ka n'hondi mwana ngombi wu masi-masi. ²⁸ Widi nkabu, kazodiku kakota. Tat'andi lubuki, pe n'lendiki ka kota. ²⁹ Mana kabusi mvutu kwe tat'andi : Mwene, mvula zingi zi hioki tuka buna yi ku sadilaka kisalu, nkuludieko mitsiku mi'aku, mpeki'eko kete mwa nkombo yi honda yi dia ye yi yangalala ye ba nduku ba mene. ³⁰ Ha ka tuudi mwan'aku, wu-u kudidi bima ye ba ndumba, kikuma ki yandi wu fweti hondi mwana ngombi wu masi mingi! ³¹ Mwan'ama, n'kambi tata, kalaka konso ntangu ye mène, pe biakulu bi ye biawu biene kwe ngeyi, ³² mani bu fwene ntu kala ye kilunzi ki kiesi pe ntu sepila, mu kikuma ki mpangi'aku wu weka mona kakala wu fwa ye wisi kabuka mu luzingu, mu diambu kakala wu lala pe moniki.