¹ Yezu hoyi kwe ba longoki bandi: «Bafweneko basala ne ha konda mitambu, mana mbembi kwe wuna kwatama mwo! ² Kukala mboti samu di yandi ba batikisa mu tsingu yandi kisengo kikitabulaaka muku baluka phe ba n'losa mu nzadi mbuta, holowo khi ka hukumuna mosi mu baleke ba yandi. ³ Lusala keba kwe benweno. Ne phangiaku kasadi disumu [kwe ngeyi], n'nganina phe, ne kayibuka mayandi, n'lolula. ⁴ Ne kasadi masumu kwe mbala tsambwadi mu kilumbu kimosi phe na mbala tsambwadi [muna kilumbu] kisa kabuka [kwe ngeyi] phe kahoya: 'Mbongi kibela', n'lolula.» ⁵ bathumwa bahoyi kwe Pfumu: «Vudisa lukwikilu lu beto.» ⁶ Pfumu kahoyaka: «Ne lwene ye lukwikilu neti ngenze yi Mutaledi, luhoya kwe n'ti wandu: Divusa phe ndonda we dikuna mu nzadi mbuta,ka lulemvukila phe. ⁷ »Ne mosi hakati di beno kene ye n'hika wuu phundulaaka holowu wuu talaaka mameme, kan'kamba yandi, muthangu ka kwisa kabuka ku masola: Zosa tswalu ha mese thu dia'? ⁸ Mu mbalamosi kan'kamboko ne: Ndaambila madia ma kumasika, kasa zita di n'lele ngeyi samu wisa tsila bima ha mese ti ye kuna yifweti dia phe yi nwa; kunima dikusala bwana ngeyi phe dia ye nwa phe'? ⁹ Zayani ye n'hika wanduna samu kasadi mana ban'sidi kasala'? [Khwikidiku']. ¹⁰ Beno phe phila mosi, ha lusadiki maakulu ma ba lu ila lusala, luhoya: Twene ba tsadi ba konda m'pfunu, thu sadi ma thu fweti salako'.» ¹¹ Mu diambu bayeleke ku Yeluzalemi, Yezu hioki hakati di Samadiya ye Galileya. ¹² Samu kakotiki mu hata di mosi, batu ba beela zi phuta kûmi bisa n'lunga. Ba telemi mu kiana ¹³ phe bayandiki kun'kamba: «Yezu, n'longi, thu wila kiadi!» ¹⁴ Muthangu kabamwene, Yezu ka basamunaaka: «Lwenda lwe bisongila kwe banganga Nzambi. » Muthangu bayeleeke, bakodi. ¹⁵ Mosi mukati di bawu, ha ka dimwene kodi, wisa kabuka mu thambi zaandi ye kwe kabusi lukumu kwe Nzambi ye ndinga ngolo. ¹⁶ Bwidi kilunzi ha tsi ku bitambi bi Yezu phe n'kabusidi matondo. Kakala mutu Samadiya. ¹⁷ Yezu mongi ndinga phe kahoyaka : «Baa kûmi bakodiku?Ah bana ba hika ba vwa, kwe bene? ¹⁸ Hamoniki kaka n'nzenza wandu samu di kwisa kabuka kisa hana matondo kwe Nzambi ? ¹⁹ Kan'samunaka diaka:«Telema, ndonda, lukwikilu lwaaku lu kuhulusi.» ²⁰ Ba Fadizie ban'hiudi Yezu khi thangu ki kimonisa kipfumu ki mazulu. Ba n'kabusidi mvutu: «Kipfumu ki Nzambi ki kwisaaku ye kwe dimonisi. ²¹ Ba hoyoko: Kene haka,holowu, kene hanaaka,'mukutala kipfumu ki Nzambi kiene hakati di beno.» ²² Kahoyaka diaaka kwe ba longoki, «Thangu mosi yi kwisa yi luwa m'pfunu lu mona kete kilumbu ki mosi ki bilumbu bi mwana mutu, phe lu kimonoko. ²³ Ba lusamuna: 'Kee haka, Kee hana, lwendiku, lu vûudiku. ²⁴ Mukatala, phila mosi phe bwoso di lubukaka phe ka phelaaka ye kwe landi zulu tsuka ye tsuka, bwana kakala mwana mutu mukilumbu ki yandi. ²⁵ Mana bu fwene kuthwala kamona phasi ziingi phe ban'losa kwe n'kangu wandu. ²⁶ »Mana makumi muthangu Nowa makuma phila mosi mu bilumbu bi tsuka. ²⁷ Bayakala bakala diaka, ba kala nwaaka, ba kwediiki phe ba kwediiki ye bana ba bawu, tiye kuna kilumbu ki kakoti Nowa mû nzasa, ye mvula yi ngolo-ngolo yiisi phe yi ba hondi baakulu. ²⁸ Kikala neti thangu Lôti: Bayakala bakala diaka, bakala nwaka, ba sumbiki, ba tekiiki, ba kuniiki, ba tungiiki, ²⁹ mana kilumbu ki ka lubuki Lôti mu hata di Sodomi, mvula mosi yi mbawu phe yi pfunzi yi tukikuzulu yi noki phe yi ba hondi baakulu. ³⁰ Dikwendila phila mosi kilumbu ki ka kwisa Mwana mutu. » ³¹ Kilumbu kiakina, moni wuna kala ha thandu n'dilu phe wuna kala ye bisalu biandi mu kati di nzo ka tulukiku samu di ku bimonga phe wuna kala mu masola ka kabukisiku diaka ku manima phe. ³² Ludiyubukisa samu di n'kheto Lôti''. ³³ Wuna dinga kahulusa luzingu lu yandi kalu ladisa, phe wuna lu ladisa ka lu swekisa. ³⁴ Yeka lusamuna, mu phiba yayina, batu boole bakala ha thangi mosi: Mosi ban'monga phe mosi ban'sisa; ³⁵ Bakheto boole bakala ba banda toka mu ki mvuka: Mosi ban'monga phe mosi ban'sisa. ³⁶ [Bayakala boole bakala mu sola di mosi: Mosi ban'monga phe mosi ban'sisa.] » ³⁷ Balongoki kan'kambaka : «Kwe masalamina mambu mana Pfumu?» Kabusi mvutu: Hana hakala luutu, hakana ba kutakanina phe banuni ba badiaka misuni.''»