¹ Yezu kasambidiki kilumbu ki mosi ha phalashi mosi bwabu. Mu ntangu yi ka manisi ku sambila, mosi mu kati di ba longoki ka n'kambaka : Pfumu, ntu longa ku sambila, bwoso Yowani ka longi kwe ba longoki ba'ndi. ² Ka ba samunaka: Na lweka sambila, lu hoya: Tata, zina di ngeyi di monga lukumu; phe ki Pfumu ki ngeyi kiisa. ³ Ntu heka di pha di beto di konso kilumbu. ⁴ Ntu lolula masumu ma beto, samu beto phe ntu lolulaka kwe konso mutu wuna ntu sala mambi, phe ntu natiku mu mi mekanu. ⁵ Ka ba samunaka diaka: Na mosi mu kati di beno kene ye nduku, phe kende ke 'mona ha kati-kati di kisuku phe ka n'samuna: Ndefisa ma pha matatu, ⁶ samu mosi mukati di ba nduku ba mene ka nkumini ku nzo , phe yeko ye kima ki kudia ki pfwene yi n'heka, ⁷ phe na, muna kati di nzo yaandi, ka kukabusila mvutu: Ntungisiku, kiafulu kiene ki ku kasa yandika kiana, bana ba mene ye mene ntwene ku thangi pfweneko yi telama yisa ku heka ma pha, ⁸ yeka lusamuna, kete ka telamiku samu di ku n'heka kikuma kene nduku zandi, ka telama kaka samu di mi tungisi mi yandi phe ka n'heka bina bi n'yene m'pfunu. ⁹ Phe mene, yeka lu samuna: Lu lomba,phe ba lu heka, lu dinga, lu mona, lu beetika ku kiafulu, ba lu kangudila. ¹⁰ Samu konso mutu wuna lomba, ka monga, konso wuna diinga, ka mona, phe ba kangula ku mutu wuna budi kiafulu. ¹¹ Nki tata mu kati di beno fwene ka n'heka mwana'ndi ditadi, na ka n'lombi di pha? Ho lowa, na ka lomba mbisi maamba, fwene ka n'heka nioka ha phalasi mbisi maamba? ¹² Ho lowa, na ka lomba diaki, ka n'heka ngo manga? ¹³ Ye ngituka, baatu ba nkabu lwene, lu yeebe ku hana bima bi bu nkete kwe bana beno, mu nki ki kuma tata wu zilu ka konda hanina Pheve Santu ku bana ba n'lomba. ¹⁴ zu kudi pheve mosi yi mbi yina yi kondiki kuhoya. Ha yi lubuki pheve yeene yi mbi, mutu wuna wu kondiki kuhoya hoyi, phe kibuka ki yandiki ku yituka ye kiesi. ¹⁵ Mana ba kaka mu kati di bawu ba hoyaka: Mu nzila pfumu wu pheve zi mbi, keka kula pheve zi mbi. ¹⁶ Phe batu ba kaka mu ku songa ba m'meka, ba n'lombi ki dimbu ki tuki ku zilu. ¹⁷ Mu diambu Yezu ka zeyeeke zi ngindu zi bawu, ka ba samunaka : Konso kipfumu ki di kabisi kiawene kiene ki ku dibebisa(kieka dibebisa), phe nzo mosi yeka bwa ha ntandu nzo kaka. ¹⁸ Na Satana kene wu ku dikabisa yandiene, nki phila na n'toto yandi wu ki Pfumu ka zinga, samu lweka hoya na yeka kula pheve zi mbi mu nzila Pfumu wu pheve zi mbi? ¹⁹ phe na mene, yeka kula pheve zi mbi mu nzila Pfumu wu pheve zi mbi, bana ba beno, mu nzila yina beka kudila? Kikuma kiakina bakala bawene ba zusi ba beno. ²⁰ Mana, na mu nzila n'lembo Nzambi yeka kula pheve zi mbi, kipfumu ki Nzambi kisiiki phe kwee beeno. ²¹ Mu tangu mutu ngolo phe wuna wene ye bi nwanini bi mboti keka batila nzo yaandi, bima biakulu bina ke biawu biene bi ku batila mboti mboti. ²² Mana na wuna wene ngolo ziingi ku hioka yandi kiisa phe ka n'nunga, ka m'monga biawu bi nwanini biakulu bi ka sididiki kitu, phe ka kaba bi nwanini bi yandi. ²³ Wuna weko ye mene kene mbeni mene, phe wuna vukanoko ye mene ka mwangana. ²⁴ Pheve mbi ha yi lubuki mukati di mutu, yi kwenda mu zi phalashi zi konda m'pfunu (zi konda kiosi), samu di ku dinga homa ha ku phemina. Ha ka mweneko, ka hoyaka : yi kabuka mu nzo mene yi ndubukiki; ²⁵ Phe ha ka tuula, wisi wana yo yi ku kombula phe yi ku yidika kitoko. ²⁶ Phe ka kabuka, ye ka monga pheve zi mbi zi hioki yandi tsambwadi; zi kota mu nzo, zi zakala, phe nkadili yi tsuka yi mutu wandu yi kala yi mbi ku hioka yina yi ntete. ²⁷ Mu diambu Yezu ka hoyiiki bwabuna, mwana n'nketo mosi, ngutu ndinga ha kati di kibuka, ka n'samunaka : Kiesi kifundu kina ki ku nete! Kiesi layeno mana ma ku yemiki! ²⁸ Phe n'kabusidi mvutu: mu masonga kiesi ku batu bana bawa ndinga Nzambi ye ba batila yo! ²⁹ Neti batu ba wongamiki mu kibuka, yandiki ku hoya:ki tini ki n'kangu wandu kiene ki batu ba nkabu; kieka lomba kipha ki mosi; ba n'hekako ki pha ki hika na keko ki ba hele Yonasi. ³⁰ Mu ku tala, phila mosi na Yonasi ka kala ki pha samu di n'kangu wandu. ³¹ n'keto ntotila wu kumwini ka telema, mukilumbu ki kusambisana, ye batu ba n'kangu wandu, ne ka ba bela, samu keeka kwisa mu zi tsuka zi n'toto samu di kuwa nduka zi salomoni; phe tala, hene haka ye wuna hioki salomoni. ³² batu ba mavula ma niniwi ba telama, mu kilumbu ki kusambisama, yhe n'kangu wandu phe ka m'bela, samu ba baludi zi mbundu phe balombi ndolula ku malongi ma yonasi, phe tala, hene haka ye wuna n'hioki yonasi. ³³ Ha nkatu mutu lemisa mwinda samu ka n'sia ha phalasi yi phungama, holowu mu tsi kitesilu ki bima bi yumuka, mana ba n'siaka ha ntandu kima, mu ku songa na bana beka kota ba mona miesi. ³⁴ Disu diaku diene mwinda wu luutu lu ngeyi. Disu di ngeyi mu ntangu diene di bu nkete, lutu lu ngeyi lwakulu lwene mu miesi, ,mana ne disu di ngeyi na dieko di bu nkete, luutu lu ngeyi phe lwene mu kati di phiba. ³⁵ Yilama mu kusonga na mwinda wuna wene mu kati di ngeyi ka kadiku phiba. ³⁶ Mu kutala na lutu lu ngeyi lwakulu lwene lu miesi, lweko ata kitini ki mosi mu kati di phiba, lukala lwa kulu mu miesi, bwoso ka ku semisina mwinda miesi mi yandi. ³⁷ Mu ntangu kakala hoyaka yezu; Fadizie mosi n'lendiki kenda ke dia madia ma mwini ku nzo yandi. Koti, phe ba yandiki kudia ye yandi. ³⁸ Fadizie mwene, yituki samu ka yebidiku ku ntwala ku dia. ³⁹ Mana pfumu ka n'samunaka: beno, ba Fadizie, lu sukulaka ha nzila di koba ye dilonga, mana phe mu kati lwene ba kabasi ye nkadilu yi ku hotumuna bima mu kingolo ngolo phe ye nkabu. ⁴⁰ Lukonda ki kuma! Wuna wu sala phenza ha nzila kasaloko diaka kati. ⁴¹ Lu hanaka di kabu di kati kwee ba phutu, phe tala, bima biakulu bi kala bi bu nkete samu di beno. ⁴² Mana phashi kwe beno, ba Fadizie! Samu lu futaka mosi ye kumi di n'ti wu mananashi ma bu nkete, ye di mu nzila, ye di mi ti miakulu, mana phe lweka simboko mboti ku sambisama ye zola di Nzambi: Diene hakana di lu fweti sadila, phe lu shisiku bima bina bi hika. ⁴³ Mana phasi kwee beno, ba Fadizie! Samu luzolaka phalashi yi ntete mu zi nzo nzambi, phe zimboti mu ma bala bala. ⁴⁴ Phasi kwe beno! Mu diambu lwene neti ma bulu ma zi mvumbi mana ma kondaa di monisa, ha ntandu mawu ba kangalaka mu ku konda ku zaya. ⁴⁵ Mosi mu kati di ba nganga nzambi ba mi tsiku mongi ndinga, phe ka n'samunaka: N'longi, mu ku hoya buna, weka safula beto. ⁴⁶ Phe Yezu hene mvutu: Phasi ku beno diaka, ba nganga nzambi ba mi tsiku! Samu lu hekaaka batu ma zitu ma buulu mu ku nata, phe maambu ma lu konda simba benweno kete ku n'lembu mosi. ⁴⁷ Phasi kwe beno! Mu diambu lu tungaaku ma ziamu ma ba mbikudi(pholofeti) mana ba sisa ba tata beno. ⁴⁸ Lu hanaku zi nteendula ku bisalu bi ba tata beno. Bisalu biene, samu bawu ba hondiki ba mbikudi, mana beno lweka tunga ba ma ziamu ma bawu. ⁴⁹ Kikuma kiakina nduka zi Nzambi zi hoyi: Yi ba hitikila ba mbikudi ye ba teyi, Mana bawu ba ba honda ba hika ye ku niokula ba kaka. ⁵⁰ Mu ku songa ne ba hiula ki sambu kwe dibuta diadi di meenge ma ba mbikudi baakulu mana ma mwangana tuka luyandiku lu n'toto, ⁵¹ Yandika meenge ma Abedi tii ye kuna meenge ma Zakadiya, ba ba hondi yandi ha meese ma ki menge ye kuna nzo Nzambi: Ntambusi, yeka lu samuna, ba lômba lu futu kwe di buta diadi. ⁵² Phasi kwe beno, ba nganga Nzambi ba mitsiku! Samu lu katudi vungula di mazaya ma n'toto, lu kotiku benweno phe lu busidi ku kota bana ba zodi ba kota. ⁵³ Mu ntangu ka lubuki hakana, ba Siklibi ye ba Fadizie ba yandiki ku n'dindika ye ngolo-ngolo, phe ba yandiki ku n'tuma ka howa mu diambu di bima biingi, ⁵⁴ ye kwe n'leeki mitambu, mu diambu ba kwata ma hoya ma yandi ma hika mana ma lubuki mu n'nwa yandi.