¹ Lukala ba landukidi ba Nzambi, samu lwene bààna ba yàndi ba tôndama, ² yé lu zinga mukati dizola mu kulààndaka mbààndu yi Khidisitu, wùù thu zodi yé wùù dihène yàndièène samu di béto néti dikabu yé kitambiki ki kiène yé tsudi yi bukhète kwé Nzambi. ³ Khadilu yi kindùùmba, màmbu ma ndziandzi mu phila zi mààwu mààkulu holowu kihwini ki kuvwa ki kadiku ki kusonika ha kati di béno, bwoso bu fwène kwéé ba saan'tu. ⁴ Ba wiku mahoya makônda tsààmbu, mààmbu ma buyula, holôwu nzààyila zi phila zôole-bufwàànàko-mana wadi mahoya ma nzayasàna. ⁵ Lwééka yàba mboti yé bààwu, ha khatu mutu wù khadilu mbi, wùù mbi holôwu wuna zolààka kakàla yé biima biingi-disongidila mutu sambilààka bitèke-kééko yé biima mu kipfumu ki Khidisitu yé ki Nzambi. ⁶ Mutu ka lu huniku mu mahoya makônda tùùnga tûûnga ye sikisiki, mudiambu diène samu di bwàna khabu zi Nzambi zi kwisààka ha thandu ba phumbulu ba mbi. ⁷ Lukadiku kète yé kàbu yé bààwu, ⁸ mukutala né mbala kaka lukàla phiiba, buthwène lwène n'téémo mwéé Pfumu. Ludinatisa néti bààna bà n'téémo! ⁹ Kibundu ki pheve kiene mu phila yakulu yi lutondo, masonga ye makieleka. ¹⁰ Lusala luswasanu lu diambu di diene di mboti ku ntwala pfumu, ¹¹ ye lufweneko luu saanga ku bisalu bi kôônda m'pfunu bi nzila zi phiba, mana lu ba katula kivwanda ku meso wádi. ¹² Ye bwawu, di bééke sala bààtu banà mu kitswéki, biene ye tsoni mu ku hoyila bioh; ¹³ miààkulu mi miene mi ku katula kivwàànda ku n'temo mi monika ye n'temo wààkulu, mukutala miààkulu mi mimonika buna, miene n'temo. ¹⁴ Khiakina di hoyama: «Vùùmbuka, ngéyi wùù wééka niimba, télèma hakati di bafwa, yé Khidisitu ka kuyinika.» ¹⁵ Lusála kèba moni mu phila yi lwééka dinatisina: lukadiku néti bilàwu, mana néti bààtu ba ndùùka: ¹⁶ lu kùùla thangu, samu bilumbu biène bi mbii. ¹⁷ Khiakina lu kadiku mayùla, mana luzaya khi lwène luzolo lu Pfumu. ¹⁸ Lù di lawùsiku mu malafu: diààna di nàtààka ku kwiiti. Mu mbalula lukala ba bààsa ye phève: ¹⁹ lu di-samuna mikunga mi lukwikilu, mikunga mi n'khembo ye mikunga mi buphève; lu yimbila phè lu kumisa ye mbundwééne yààkulu mikunga mi lukumu mi Pfumu; ²⁰ lu n'kabusila matondo kon'so thangu Nzambi tààta samu di mààkulu, mu zina di Pfumu béto Yézu-Khidisitu; ²¹ lu di kulumuna ba mosi kwéé ba kwéno mu bôôma bu Nzambi. ²² Ba khééto, [lu di kulumuna] kwéé yakala diàku bwooso kwéé Pfumu, ²³ mu kutala yakala kene pfumu wù n'khééto, bwooso Khidisitu kéé Pfumu wù dibùùmbu di diene lùùtu lwààndi phe di kene ngulushi. ²⁴ Mana phila mosi ye dibùùmbu di dikulumunààka kwéé Khidisitu, ba khééto phè ba dikulumuna kwéé yakala di bawu. ²⁵ Bayakala, luzola n'khéétwéno bwoso kazodi Khidisitu dibundu. Ka di hèène yandièène samu di diawu ²⁶ mukusia ka nata dioh ku bu saan'tu kunima di ku phétula dioh ye ku di yebisa mu mààmba ma ndiinga, ²⁷ samu di ku monisa ku thwàla yàndi dibundu diène ye bukhète bu n'khéémbo, di kônda kitemuna, di konda n'ngète mu lùùtu, di kônda kiima ki fwanana dimbi, mana saan'tu ye ba fweneko ba n'tsika. ²⁸ Bwene bwàbuna bayakala ba fweti zola bakhééto ba bààwu néti lùùtu lu bààbèène. Wuna wééka n'zola n'khéétwàndi kéka dizola yandièène. ²⁹ Ye bwààwu, hakhatu mutu lenda busa lùùtu lwààndi. Mu mbalula, ki lù tsasààka ye ka lù batilààka, bwoso kasalààka bwoh Pfumu samu di dibundu ³⁰ mudiàmbu thwène bidiimbu bi lùùtu lù yàndi, [bi bisalami mu n'suni yàndi ye bikudi bi yàndi]. ³¹ Khiakina yakala ka katuka kwé ngudiààndi ye tatààndi, ka zitamana kwé n'khéétwàndi, phè ba bôle ba sala kiima kimosi. ³² Diswèkamu diàdi diène diingi, phe yeka hoya buna kwé Khidisitu ye dibùùmbu. ³³ Kù mana masèèle, kon'so yakala hakati di béno ka n'zola n'khéétwàndi neti yandièène ye phe n'khééto kan'zitisa yakala diààndi.