¹ Yeka lu heka kikesa mana, mene, mutu boloko mwe Pfumu mu ku lu katisa mu phila mosi yi masonga ma mbila yi lu yembe. ² Mu ku dikitisa kwakulu ye mbundu bukhete, ye ku hwena, lu di nata banà ye ba kweno mukati di zola. ³ Lu nwanakana muku batila bumosi bu pheve mu nzila yi ngemba. ⁴ Hene ye lùùtu lu mosi ye phèève mosi,phila mosi ba lu tédi mù kîîtu ki mosi kaka mù nzila yi mayiindu ma beno. ⁵ Hene kaka ye Pfumu mosi, lukwikilu lu mosi, mbotika mosi, ⁶ Nzambi mosi phe tààta wu betokulu. Kène ha thandu betokulu, kasalààka hakati di betokulu phe kazingààka mu kati di [beto]kulu. ⁷ Kààndzi, kwe mutu yandikulu bééto ha thwene dyenga di hanami mu kitéésu ki kabu di Khidisitu. ⁸ Kikuma kiakina ba hoya: Ka mèètèèke ha thandu lôôndi, kisa bulumunààka bààtu ba boloko phe ka hèène makabu kwéé bààtu. ⁹ Mukutala, khi disongidi: Thombikiiki, ne lôôwu kene phe [thete] wù kulumuka mu mitoto mi khatika bàànda mi mààfu? ¹⁰ Wuna kulumukiiki, kene yàndi wùù tombukiiki ha thandu mazulu mukusonga ne ka bààsisa n'toto wààkulu. ¹¹ Yàndi wùù hèène ba hika néti ba thumwa, ba hika néti ba mbikudi, ba hika éeti mwangi tsàngu, ba hika néti ba ngungudi ye ba lôôngi. ¹² Ka sàdi bwàna samu di ku yidika ba saan'tu mu phalasi yi kisalu mukusonga né ba tùùnga lùùtu lu Khidisitu, ¹³ tii ye kuna thu kwisa kuma betokulu mu kimvuka ki lukwikilu ye ki ku zààya mwana Nzambi, mukukala ku mayiindu ma kimbuta, ha kitééso ki kitèke kina kifwene phenza kii Khidisitu. ¹⁴ Bwàbuna, thu kalôko diààka bana ba khèèke, ba thu hukumuna tôh ba thu nata ku koon'so m'phebe wu kimvuka ki mangùùmba, mu ndùùka zi bààtu ye masoonga ma bààwu mukati di bisalu bi bààwu bina biééka ba nata kiànà ye Nzambi. ¹⁵ Mana mu kuhoyààka masoonga mukati di zola, thu vuula mu phila yi ku mwénina kwakulu tii kwéé wuna wene ha n'twà Khidisitu. ¹⁶ Kwéé yàndi lùùtu lwààkulu ye ku twàdisama ku mboti ye ngolo zààkùlu lu vukana, dyenga kwéé biyikamini bi lùùtu bi kéé biàwu, kabèndààka kuvula kwàndi mu nzila yi kisalu kî kifwene kwéé koon'so bitini bi lùùtu lu yàndi phè ka ditùùngààka yandièène mu zola. ¹⁷ Lu tala bwààwu mana yééka hoya ye yééka tàmbusa mukati di Pfumu: Lu fwenèko diààka lu di natisààka néti bààtu ba kônda ku ndima, bana bà diyambudilààka mu ku di twàdisa ku buzoba bu zi ngindu zi bààwu. ¹⁸ Bène yé ngangu zi sià phiba, bène ba nzènze mu lu zingu lu Nzambi kikuma ki kukônda mazààya mukati di bààwu, kikuma ki mbundu kukôla bààwu. ¹⁹ Ba ladisiiki khadilu yààkulu yi bukhète phè ba dihène mu luzingu lu ndziandzi samu di kusala yé nzala biima bi mviindu bi phila ye phila. ²⁰ Màna béno, kééko bwabuna né lu longuki mu kun'yàba Khidisitu, ²¹ mana né yàndi wu lu wididiiki phè né mwéé yàndi ba lu longi mu ku fwanakanààka ku masoonga ma mène mwéé Yézu. ²² Ba lu longi lu dikatula kwéé mutu khùlu wùù fwanani ye phila béno yi kuzingila ku kiààna phè wùù dibébisa kunima di kwiiti di biéési bi yàndi bina bi hunààka, ²³ Mu ku diyambula lukabukisa mu phève mu kati di mayèle ma béno ²⁴ ye mu ku divwatisààka mutu wu phà, wu ba hàngi mu phila Nzambi mukati di kusambisa ku masoonga ye bu saan'tu bu kasala masoonga. ²⁵ Khiakina, mu ku lôsa bungumba, koon'so mutu ka hoya masoonga kwéé n'kwénwààndi, samu thwene mu kikanda bànà yé ba kwéno. ²⁶ Né luwa khabu lu natiku disumu. Tààngu di nimbiiku ha thandu khabu zi ngeyi, ²⁷ phe lu siisiku kete phalasi mosi kwéé diabulu. ²⁸ Wuna wù yibiiki kayambula kuyiba; Ka di hèka ndola zi kusala yé masoonga mààkulu yé [môôko] mâândi samu di ku kala yé kina ka hàna kwéé wuna wene yé m'pfunu kiààwu. ²⁹ Hà khatu dihoya di mbi di lubuka mu n'nwà béno, mana kaka mahoya ma bukhète, mu nzila zi m'pfunu, ma sadisa mu kutûngama yé ma nata dyénga kwé bana béka ma hingila(mahoya). ³⁰ Lu kotisiku mu kiàdi phève-saan'tu yi Nzambi, mwéé yina ba lu sididi kidiimbu samu di kilumbu ki ku kangulàma. ³¹ Khadi yààkulu, khabu zààkulu, ndinga ngolo yààkulu, sààfu diààkulu yé mààmbu ma khabu mààkulu ma lala ha kati di beno. ³² Lukala bu bukhète yé lukala yé kiàdi bana yé ba kwéno; Lu di lôlulààka wuna yé wuna bwoso ka thu lolulààka Nzambi mwéé Khidisitu.