¹ Ba phangi ba tondama, Lu siku lu kwikilu ku konso pheve; Man lu mekaka zi pheve, mu ku zaya na zene zi Nzambi, phe mu ku tala ba bikudi(pholofeti) ba mbi biingi biisi mu tsi n'toto. ² Luyaaba mu maambu maama pheve Nzambi : Konso pheve yina yi hoyila Yezu klistu wiisa mu n'suni yene yi Nzambi. ³ Phe konso pheve yina konda tanga zina di Yezu, yeko pheve Nzambi, yene yi mbeni wu klistu wu ba lu laki kwisa, phe wu wene bu ntwene ha tsi n'toto. ⁴ Beno bana ba nkeke, Nzambi wu luvwa, phe lu ba nungiki, mu diambu wu wene mukati di beno hioki kiteso ki wuna wene ha tsi n'toto. ⁵ Bawu, bene ba tsi n'toto; kikuma kiana ba hoyaka mu phila yi zolaka n'toto phe n'toto ka ba wiilaka. ⁶ Beto, Nzambi wu ntu vwa; wuna n'zeye Nzambi keka ntu wiila; Wuna kavwoko Nzambi keka ntu wiloko: Hakana ntu zayila pheve yi masonga ye pheve yi kifu. ⁷ Ba phangi ba tondama, ntu zolana beto ye beto ; Mu diambu zola diene di Nzambi, phe konso wu zolaka n'kweno ka butuka kwe Nzambi phe n'yebe Nzambi. ⁸ Konso wuna konda zola n'kweno ka n'yebeko Nzambi, mû diambu Nzambi kene Zola. ⁹ Zola di Nzambi di disongisa mu kati di beto, mu mambu matadidi kwisa ku mwana yandi wu tondama mu tsi n'toto, mu kusonga na ntu zinga mwe nzila yandi. ¹⁰ Phe zola dina diene, keeko mu phila yi ntu n'zodidi Nzambi, mana mu phila yi ka ntu hele mwan'andi bwoso n'kwa diambu mu masumu ma beto. ¹¹ Ba phangi ba tondama, na Nzambi ntu zodi mu phila yina, ntu fweti zolana phe beto ye beto. ¹² Ha nkatu mutu wu n'mona kene Nzambi; Na ntu zolana beto ye beto, Nzambi keeka zinga mukati di beto, phe zola di yaandi diene bu nkete bwiingi mukati di beto. ¹³ Ntu yeebe na ntu zinga mukati di yaandi, phe yaandi mukati di beto, mu mana ka ntu hedidi pheve yandi. ¹⁴ Phe beto, ntu mweneke phe ntweka teendula na tata ka n'hitikiki mwana ha bwoso ngulusi wu n'toto. ¹⁵ Wuna teendula na Yezu kene mwana Nzambi, Nzambi ka zinga phe mukati di yaandi. ¹⁶ Phe beto ntu mwene zola di ke diawu tata Samu di beto, phe beto, ntu kwikidi mo. Nzambi kene zola; phe wuna weka zinga mukati di zola keka zinga mukati di Nzambi, phe Nzambi mukati di yaandi. ¹⁷ Kene bwaabu, Ntwene bwaabu phe mu tsi n'toto : Mu bwabuna zola diene di bunkete bwiingi mukati di beto, mu kusia na ntu kala ye kiitu kilumbu ki kusambisama. ¹⁸ Boma bweko mu zola, mana zola di bu nkete bu nkete di ladisaa phe di katulaa booma; Mu ku tala booma bu ntu nataka ku ndola, phe wuna weka banga keeko mu zola di bunkete bwiingi. ¹⁹ Samu di beeto, ntu n'zolaku,samu ka ntu zodi wu ntete. ²⁰ Na mutu ka hoya: Yi n'zolaaka Nzambi, phe ye ku m'mengaka phangiandi, kene ki ngumba; mu kutala, wuna kondaka n'zola phangiandi wu keka mona, nki phila ka hoya na ka n'zolaaka Nzambi wu ka koonda mona? ²¹ Phe ntwe samu di yandi n'tsiku wandu: Wuna n'zoola Nzambi ka n'zoola phe phangiandi.