¹ Na were Pilate ni wo a muan Yezu a marɔ ni tɔgɔ wini na. ² Sɔrɔsi yala suan fɔro ni banfula na a doro Yezu ɲun san, an na dɔro paaya wurɔ o san. ³ A na dabɔ san a na ɲamɔ naa ni wo: Ni mawali, juifu yala paa!A na lɔ zara jimi. ⁴ Pilate lura sema o ɲama zama la na ni wo: sumu tee, mɛ jo bri a nɛn apa na fen na, yele apa ɲinu ni mɛ ye zere nɔn pɔyi na so ba so san. ⁵ Yezu lura fen na, fɔru cimɛnɔ y'o ɲɔ san, paaya wurɔ durɔ y'o bun san. Pilate ɲama a na na ni wo: Ni ka naa bala! ⁶ Pɛɛ ɲɔn cala na ni o yorɔga cala nɔ lenwere, an na pasara ni wo: A piɔ duru la san! A piɔ duru la san! Pilate ɲama an na na ni wo: A pisa a turɔ a piɔ duru la san, ben yilena mɛ ye zere nɔ pɔyi nɔ san. ⁷ Juifu yala zamisɔ ɲe ni wo: Tɔn dari yen epa yan, o mɔni na tɔn na na, o cana n' guɔ, naa yilena o ɲamu ni wa ko Vamara bi ya. ⁸ Pilate nɔgɔ naa lenwere la, pancingle dɔ o bɔmɔ fɔn fɔn ci la. ⁹ O zɔan jee na sema o busu Yezu sema ni wo: Ni wan lurɔ ze? Naa Yezu y'o ɲe ze ba. ¹⁰ Naa were Pilate ɲamɔ naa ni wo: Wan dere jɔn mɛ yan ma? Wan y'o ɲini ni paan yen mɛ won a juin, na ni paan yen mɛ won apɛn duru la bɛn wa? ¹¹ Yezu zamisɔ ɲe ni wo: Paan pɔyi te won mɛ bɛn, foo Vamara ni nian le na o lurɔ vɔn na. Naa dɔ le ce mɛ n' lugo, na ɲini magɔsɔ la ganra bɔn wan ɲina. ¹² Foo naa were la, Pilate ni kuiri sa yan an na niɔn Yezu na, naa juifu yala pasara ni wo: Ni nian so ba so na, wan ka Rɔmɛ paa la duruba ci ba. Lo wo lo d'o se ni paa na, na ke Rɔmɛ paa la zɔgɔ wa! ¹³ Pilate nɔgɔ naa lenwere la, o lura ni Yezu na fen na. o jina kiti cira nɔ na na yile ni Pave, na taan , ke taan vɔrɔ, (hɛburu jɔn kole, na yile Gabata). ¹⁴ Na da o tɔn zara da ni kɔrɔbɛn bisa la na, wɛntan. Pilate ɲamɔ juifu yala na ni wo: Ka na paa la! ¹⁵ A na pasara ni wo: A wɔ na tan nɔ jɔn won! A wɔ na tan nɔ jɔn won! A piyɔ duru la san! Pilate ɲamɔ a na na ni wo: Mɛ pɛ apa paa la duru la san wa? Pɛɛ bra ɲɔ cala zamisɔ ɲe ni wo: Paa buru te pa yan ma ni ka Rɔmɛ paa la ba. ¹⁶ Na were Pilate ce Yezu a na lon, a piyɔ duru la san. A na muan Yezu a na wɔ na. ¹⁷ Yezu turɔ o pian duru la o lurɔ na zere la won o wa na tan dari nɔ, na yile ni ɲun koe nɔ, (hɛburu jɔn na won, na yile ni Golgota). ¹⁸ Sɔrɔsi yala pɛ Yezu duru la bɛn bran, o wa ni la ɲii boru. tën ye Yezu jele yan, tën na ma yen jele tën yan, Yezu tari yen an na bɛlɛn. ¹⁹ Pilate guan vari dari o tan lo Yezu pian duru la san. Le ko gɔn o bɛn, naa ni so na: Yezu Nazɛrɛtina, juifu yala paa. ²⁰ Juifu yala jaani da na va la karan, naa yilena a na pɛ Yezu duru la bɛn tan le nɔ, o nɔn kuisi zere la san. Na k'o gɔn hɛburu jɔn na won na ni Rɔmɛ jɔn na won na ni grɛki jɔn na na. ²¹ Juifu yala pemere bra ci ɲunci na ɲamu Pilate na ni wo: N' bɔ gɔn ni wo: Ni juifu yala Paa, naa gɔn ni wo, ni wo ni wa ke juifu yala Paa. ²² Pilate zamusɔ a na ɲi ni wo: Mɛ gɔn le, na guɔn o zɔa. ²³ Sɔrɔsi yala pɛ Yezu duru la bɛn lenwere, a na turɔ o wula an na cirɛ ta naasi, sɔrɔsi lo tën, ta cirɛ tën. A na turɔ o foro cala, ɲara cen tari to yaba, naa o vari o da ni poo bi tën na o ɲi mɔ vɔn na foo yii tan ta la san. ²⁴ Sɔrɔsi yala ɲamɔ dana ni wo: A ba na foro ci yala kanri ba, naa e ce mura bɛn le je na e ɲini na ci. Na daa yele vari murɔ jɔn na ɲe pusɔrɔ le ɲamɔ ni wo: A na cirɛ mɛ wula tan an na sɛrɛ, an na ce mura mɛ wula bɛn. Sɔrɔsi yala da na ma yala. ²⁵ Yezu ɲi na n'o ɲi bi kanlo na ni klopasi kan Mariyamu na ni Magadala Mariyamu, nariya tari ke zangalɔ Yezu pian duru la jele yan. ²⁶ Yezu nɔ o ɲi na ni o tari n' de karan bi lema kanu, o sa na namu zangali o ɲi jele ya. O ɲamɔ o ɲi na ni wo: Kan la, ke n'bi balo la. ²⁷ Na dapɔn, o ɲamɔ o karan bio la na ni wo: ke ɲi. Foo naa were, na karan bi wara ni Yezu ɲi na o se guso won. ²⁸ Na dapɔn, Yezu ɲinu ni wo, ni ma la lakala da o ɲi pusɔrɔ lenwere,ni wo: Mini kɔnɔ yen mɛ san. O ɲamɔ naa yele vari murɔ jɔn na ɲe pusɔrɔ. ²⁹ Wuru dari tari yen, o ko pɔɔ yii yɔnrɔ na. Sɔrɔsi yala suu vunru yii ɲɔrɔ la won an na vɔn jope duru gɛlɛ la ɲun san, a na co Yezu len. ³⁰ Yezu na na yii ɲɔrɔ la lenwere la, ni wo: O ɲe pusura! Na dapɔn, o zuro ɲun tan o bri o kunmara. ³¹ Kɔnrɔbɛn bisa saci la tari ya, Juifu yala ton yaa ma la cɔɔ yala tamu ma pian duru la san ma o da fin fin na wura ba, naa ce na were la ke fin fin na wura were murɔ wa. naa yile na a na ziri Pilate ni wo la piyɔ yala na ya ba gu, a na cɔ yaala lurɔ duru la san. ³² Sɔrɔdasi yala yi Yezu pɛ ci na darɛ san dere, a na gu naya bakula yala, na dapɔn, a na wa yii bore driya san, a na gu naya mɔ ɲina. ³³ An na yiYezu san lenwere, an na nɔ ni o cua o zɔ, naa yilena an na yen na bala gu ba ³⁴ Naa Sɔrɔsiyala won lo tën furo pule ni caama na, tan tën nɔ na jɛrɛ mɛ ni mina lura. ³⁵ Le nɔɔ, na se bro o sɛrɛ, o sɛrɛ la ke can mu wa. An na ɲino ni wo n'o ɲimi cɛn. An na ɲino n'o ɲimi cɛn, yele apa mu da lanaya. ³⁶ Na mayala da baso yele Vamara vari jɔn na ɲe pusɔrɔ: O koe pɔyi ja gu. ³⁷ Kitabu jɔn buru ɲamu ni wo: An na furu le la, a na sa jo na. ³⁸ Na dapɔn, Arimate Yusufu zire Pilate ni wa je Yezu cɔ la turɔ. Yusufu tari ke Yezu karanbi dari na, naa o dasa na ma la juifu yala sa cile sɔa yilena. Pilate siɔn tan. Yusufu wara o turɔ Yezu cɔ la. ³⁹ Ɲikodɛm le tari wara Yezu yan da wura yala na, na mu kuan ni mire na na ni aloɛs nuan suma ɲɔma gɔgɔ da won kilo sun cɔɔ bɔɲɔn na. ⁴⁰ Na la ɲii turɔ Yezu cɔ la a cɛnmɛni sama wurɔ poron na o san, an na ce na nuan suma ɲɔmɔ la o san, o mɔni juifu yala cɔ yuga sa na. ⁴¹ Yezu pɛ duru la bɛn tan le nɔ na, jimɛ wayi tari dari ye, cɔ van durɔ dari tari yen na jimɛ wayi la won, lo pɔyi yen yugu bran dere ba. ⁴² A na yuge Yezu cɔ la bran, naa ce juifu yala fin fin na wura ɲi muan wura tari ya, na cɔ van nɔn kuisi bran san.