¹ Na jɔn na ɲama dapɔn, Yezu turɔ sa vɔn o ɲamɔ ni wo: Mɛ Ɲina, o were ye. Ce lenbe n. bi balo la bɛn, yele n' bi balo la ce lenbe n' yile bɛn, ² Naa ce n' nian pan na zolon bio lakala bɛn, naa yilena n' nɛ lema o na, o nɛy sayɔya le zoere ba an na lakala na. ³ Sayɔya le zoere ba naa ni so na ni wo, an na ɲunu ni wan ke Vamara soo wa, n' ɲini Yezu kirisa, n' babu na len. ⁴ Mɛ ce lenbe n' bɛn na yen tan ta la bɛn. N' nɛ wali lema mɛ na ni mɛ da na, mɛ da na a pusɔrɔ ɲe. ⁵ Bisaso, mɛ Ɲina, lenbe len yen mɛ bɛn wan yan sani diɲɛ ɲe ji mɔɔ, ce na lenbe la mɛ bɛn wan se jelen yan. ⁶ N' nɛy la lema mɛ na o lurɔ diɲɛ won, mɛ bɔrɔ n' yile la na ya na, naa ce an na ɲunu. Wan ɲini yaa tari, n' nian naa mɛ na, an na ziɛn n' jɔn na. ⁷ Bisaso an na ɲino n' nɛy yile ma mɛ na, naa lakala lurɔ wan won, ⁸ naa yilena n' ɲamu jɔn lema mɛ na, mɛ ɲamu naa lakala an na na, an na sian naa jɔn na tan. An na ɲinu o purumu ni mɛ lurɔ wan won, a na da la o na ni wan baba mɛ. ⁹ Mɛ n' ziri wan nariya na. Mɛ ta ni n' ziri diɲɛ na ba, naa n' nɛ lema mɛ na, mɛ ziri wan nariya na, naa yilena nariya ke wan ɲini. ¹⁰ Mɛ ɲini lakala ke wan ɲini, n' ɲini lakala ke mɛ ɲini, lenbe ce mɛ bɛn na ma na. ¹¹ Mɛ ja tamɔ diɲɛ won seba, naan soya kɔni yen diɲɛ won, mɛ ja wan yan. Mɛ ɲina cana, n' nɛy yile len mɛ na, mɛ zɛn nariya na pan won, yele an na da bi tën na, dama mɛ ni wan ko tën ɲa len ɲɔ. ¹² O jɔn mɛ an na yan, n' nɛy yile lema mɛ na, mɛ zian na yan na pan won. Mɛ ziɛn na ya, an na pɔyi ye ɲɛni, foo ɲɛnɛmɛ bio la, na da yele vari mɔrɔ jɔn na ɲe pusɔrɔ. ¹³ Naa bisaso, mɛ n' jaa wan yan, mɛ ɲamu so maya so na yen diɲɛ la won dere, yele mɛ bɛlɛ ɲɔmɔ ɲe pusɔrɔ an na powon. ¹⁴ Mɛ ɲama wan jɔn na an na na, diɲɛ da an na kɔniɲɛ, naa yilena naya ka diɲɛ ɲini ma, dama mɛ ka diɲɛ ɲini ɲa le ɲɔnɔ ba. ¹⁵ Mɛ tani ziri ni wo, ni bri 'a na diɲɛ won ma, naa n' da na kirisi suntani san. ¹⁶ A na ka diɲɛ ɲɛnɛ ba dama mɛ ka diɲɛ ɲɛnɛ ɲa len ɲɔnɔ ba. ¹⁷ Ce a na n' se na an na purumu tiɲɛ cena bɛn. Wan jɔn na ke canmu. ¹⁸ Mɛ baba na diɲɛ won, dama wan babu mɛ diɲɛ won ɲa len ɲɔn na. ¹⁹ Mɛ je a se dɔn bran n' na n' bɔsɔ mɛ naa yilena, yelen na mɔ dɔn sebran n' na o bɔso so diɲɛ so won. ²⁰ Mɛ ta ni ziri soya mini yilena ba. Lema n' siɛn mɛ tan an na jɔn na yilena, mɛ ji wan ziri naya mun na, ²¹ yele a lakala da ni bi tën na, mɛ Ɲina, dama wan yen mɛ san na ni mɛ yen wan san ɲa le ɲɔ, nariya mu tamu epa san, yele diɲɛ siɔn tan ni wan babu mɛ. ²² N' nɛy lenbe len mɛ na, mɛ nian naa naya na, yele an na da ni bi tën na dama mɛ ni wan ke bi tën ɲa le ɲɔ na. ²³ Mɛ yan na yan, wan yen mɛ yan, yele an na ye pusɔrɔ tën ya won, yele diɲɛ ɲinu ni wn bɛbu mɛ, naa ni wan da na kanu dama wan da mɛ kanu ɲa le ɲɔ. ²⁴ Mɛ Ɲina, n' nɛ lema mɛ na, mɛ yen tan le nɔ, mɛ yo yan naya mu tamu mɛ mu yan bran, yele n' nɛ lenbe le mɛ na, an na sa na na, naa yiena n' da mɛ kanu sani diɲɛ ɲe ji mɔɔ. ²⁵ Mɛ Ɲina cɛn sɔ, diɲɛ yen wan ɲini ba, naa mɛ ɲini wan, so ya mu ɲinu ni wan babu mɛ. ²⁶ Mɛ bɔrɔ n' yila an na na, yele an na ɲinu wan. Mɛ jo bɔrɔ an na na sema, yele wan da mɛ kanu ma ɲɔma la lena, na da naya na, na ni mɛmu jinɛ an na na.