¹ Yezu ni wo: Apa haciri ba gɔgɔ ba. A sian Vamara tan, a sian mɛ mun tan. ² jinanɔn jaani yen mɛ Ɲina guso won. Ni na tari ka tiɲɛ ba, mɛ tari ja na ɲamu apa na ba. Mɛ ja tan vavari apa na bran. ³ Ni mɛ ni wara tan vari apa na, mɛ ji ko duru naa a ko apa turɔ, na yilena mɛ yen tan le nɔ, apa mun tanmu bran. ⁴ Mɛ ni n' ja tan le nɔ, apa ɲini na ce na. ⁵ Tɔma ɲama ni wo: E Ci, epa ɲine n' wari nɔ ma.Epa ma jo ce na ɲini ɲɛ ni ɲɛ? ⁶ Yezu zamusɔ ɲe ni wo: Mɛɛ ke ce na, na ni ciɛn, na ni sayɔya. Lo pɔyi koere mɛ Ɲina yan ma, ni o yen kɔrɔ mɛ yan ma. ⁷ Ni apa tari ɲini mɛ, a tari je mɛ Ɲina mun ɲini. Foo bisaso,apa ɲino, a sa nɔ. ⁸ Filipe ɲamɔ na ni wo: E Ci, bɔrɔ Ɲina epa na, na je na gulɔ, ⁹ Yezu zamusɔ o ɲe ni wo: Filipe, zɛ yen mɛ ni apa ce da yan ma, hali zɛ wan ye mɛ ɲini ma? Le sa lara mɛ bɛn, na sa lara mɛ Ɲina mun bɛn. Wan ma ni ɲemi niɲɛ ni ɲɛ ni mɛ bɔrɔ a Ɲina apa na? ¹⁰ wan ye siɔn tan ni mɛ ye a ɲina san ma, ni mɛ Ɲina yen mɛ san wa? Mɛ ni ɲemi jɔn lema apa na, mɛ ta ɲemi naa mɛ se na ba, na ce mɛ Ɲina le yen mɛ san, naa d'o o dari waliya la. ¹¹ A sian mɛ na, ni wo mɛ y'a Ɲina san, ni mɛ Ɲina yen mɛ san, nana a da lanaya na dari waliyala yilena mise. ¹² Canmu Canmu wa mɛ jo ɲamu apa na ni wo: Len sian mɛ na, mɛ ni de dali wali lema la, naya mun je na bɔɲɔn da, an na ji dali wali dariya daa le garan a bɔn naya na, na ce mɛ jaa Ɲina yan. ¹³ Na yɔrɔ, apa ji yii wo yii ziri mɛ yilena, mɛ je na da,yele lenbe ji ce mɛ Ɲina bɛn o Bi Balo ma wo. ¹⁴ Ni apa ni n' ziri yi darɛ mɛ yilena, mɛ ji na nɛn apa na. ¹⁵ Ni mɛ ma ɲɔn apa na, apa je mɛ tôn yala zɛn. ¹⁶ Mɛ j'a Ɲina ziri, o je jɔɛmɛ ci buru nɛy apa na, yile ji daa na ji tamu apa yan lenwere. ¹⁷ Na canmu kunmara ya. Diɲɛ gulɔ o na na ba, na yilena an na nero ba, an na ɲino ba. Apa kɔni ɲinu, na ce o jinɔ ya apa yan, na ni o jinɔn yen apa po won. ¹⁸ Mɛ ja apa jɔn bran kanbiya won ma, mɛ ji ko apa nɔ na. ¹⁹ Dɔni diɲɛ ta ji mɛ na seba, naa apa kɔni sa ji mɛ na. Mɛ sayɔwa, na ce apa mn je sayɔya na. ²⁰ Ni na were la n' yen lenwura apa jo ɲini, apa jo ɲini ni mɛ yen a Ɲina san, ni apa mun yen mɛ yan, ni wo ni mɛ yen apa yan. ²¹ Mɛ tôn na yen le won, ni n'o de na, mɛ ma ɲɔ naa na. Le de mɛ kanu, Mɛ Ɲina je na da kanu, mɛ mun ji na da kanu, a bɔra a se o na. ²² ( Jude, le ka Juda Isikariɔti, ) o ɲamu na ni wo: E Ci, bën yilena n' ji n' se bɔrɔ epa na, bën ce n' bɔrɔ se diɲɛ na ba? ²³ Yezu zamusɔ o ɲe ni wo: Len n' de mɛ kanu, na je mɛ jɔn na ziɛn. Mɛ Ɲina ji na da kanu, mɛ ni mɛ Ɲina ji ko na yan o ko jinɛ na yan. ²⁴ Le tan n' de mɛ kanu ba, na zɛnra mɛ jɔn na ba. Apa ni nugɛ jɔn le mɛ len, na yen lurɔ mɛ yan ma. Mɛ Ɲina le babɔ mɛ, o lurɔ naa yan. ²⁵ Mɛ ɲama so mayaso o jɔn mɛ apa sɛrɛ. ²⁶ Na ce mɛ Ɲina je jɔmɛ ci le babɔ mɛ yilena, Kunmara cana kɔni, na ja apa lakala da karan yi lakala na. Mɛ ɲamu jɔn lema apa na na ja apa haciri cusu naya lakala na. ²⁷ Mɛ je bɛn zura jɔn bra apa yan; mɛ je mɛse bɛn zura nɛy apa na. Diɲɛ la niɔn lesila, mɛ neru apa na bɛba dɛ. Apa haciri ba gɔgɔ ba, a ba pancingle da ba. ²⁸ Apa nɔgɔ ni mɛ ɲama apa na ni wo: Mɛ jaa, naa mɛ je jugu a ko apa nɔna. Ni apa tari ni de mɛ kanu, apa tari bɛlɛ je ɲɔmɔ ni mɛ ni ja a Ɲina san, bën ce mɛ Ɲina garan bɔn mɛ. ²⁹ Mɛ ɲama na apa na bisasou, sani na mayala ji yii, na ce ni na ni ye lenwere, apa da lanaya. ³⁰ Mɛ ja jɔn jaani ɲamɔ apa na seba, bɛn yilena so diɲɛ ɲuci la je ko, pan pɔyi to won mɛ bɛn ma, ³¹ naa so diɲɛ so ko kani o ɲinu ni mɛ Ɲina ma ɲɔ mɛ na, na ni mɛ Ɲina ɲamu tun le mɛ na, mɛ ni de naa. A zuga, e wara e lurɔ te.