¹ Da nɔrɔ ya ni ɲu kɔra bisa la ji yi, Yezu wara Bɛtani. Yezu kɔrɔ Lazarɛ le sa o lurɔ cɔ yala sɛrɛ, na jinɔ yen bran. ² An na vara yala na jiri yii Yezu na bran. Marte tari n' cirɛ jiriyii la ta an na sɛrɛ. Lazarɛ tari ke na jiriyii la jiiri ci la lo tën. ³ Mariyama tura nuan suma ɲɔmɔ litiri tacirɔ turɔ, naru nuan so so wa, o yiri kɔrɔ kɔrɔnɛ, o vini na Yezu ba bɛn o sinsanu o ɲun kuisi na. Ja po lakala pɔa ni na nuan sunma ɲɔmɔ la na. ⁴ Yezu karan bio la won lo tën, Juda Isikariɔti, len je Yezu ce nɛ won, o ɲamɔ ni wo: ⁵ Bën na so nuan suma ɲɔmɔ yen yegi pee kunma cɔɔ n' cere na pee la ta la gɔ yala yan? ⁶ Juda tari ta ɲimi na la gɔ yala yile na ba, nan o ɲamɔ na le la na ce ɲɔrɔ wa. Pee ciri yii y'o lon. Len tari n' ciri na won, o tari ni turɔ na. ⁷ Na ce Yezu ni wo: jɔn bran. O zɛn na mɛ cɔ burun kan na cilen. ⁸ La gɔ yala yen apa sɛrɛn len were, na ce mɛ ja jinɛ apa sɛrn len wura ba. ⁹ Yuifu yala nɔgɔ ni Yezu yen Bɛtani len were la, na zama jaani wara bran, ka Yezu san nari se mɛni ma, nan na yile na an na Lazarɛ mu. Yezu kɔrɔ le sa o lurɔ cɔ yala sɛrɛ. ¹⁰ Na ce pɛ ɲucala cira an na ɲe na je Lazarɛ gu. ¹¹ Na na o wa yile na juifu yala jaanni wara siɛn Yezu yan. ¹² Na tɔn zara, zama jaanni le ma ko ɲun kɔara bɛn bisa la na, na ya nɔgɔ ni wo Yezu kɔrɔ ciri ya Zuruzalɛm. ¹³ An na tura Tamaru vari yala a wa o ɲɔ zamise, an na ni pasari ni wo: Ni Vamara mawali! Le kɔri ciri E Ci la yilena, Israyɛli Pa balo na juba bi. ¹⁴ Yezu na dindele bi dari o jiru bɛn, dama ko gɔn kitabu la won ɲa len ɲɔ na ni wo: ¹⁵ Siɔn bi kan lo, ba pan cingile da ba! ke n' PA la koere ciri, o jinɔ yen dindele bi bɛn. ¹⁶ O karanbio la yen na ma ɲini o dari were la ba, na na Yezu jɔn lenbe la won len were la, an na haciri cuse na ma la na ni wo na ma la guan kitabu la won o wa ma na, ni wo na ma yala dari yala yile na la la ce co o bɛn na yilena. ¹⁷ Zama len ma tari yen Yezu yan, o kome Lazarɛ na o lurɔ cɔ van la won o kɔrɔ sa o lurɔ cɔ yala sɛrɛ lenwere la, naya ni ɲemi na mayala sɛrɛ. ¹⁸ na ce zama jaanni lura a wa Yezu ɲɔ zamise, na yilena an na ɲunu ni Yezu da ma murɔ darɛ. ¹⁹ Fariziɛn yala ɲamɔ dana ni wo: Apa gula a da pɔyi. Sumu tee, diɲɛ lakala ni ja o da nin yan! ²⁰ La lema wa Zuruzalɛm le je da a ce co bisa were la bɛn, Grɛki dariya tari yen na ya sɛrɛ. ²¹ Filipe le lurɔ Galile Bɛtisayida, an na daba an na san an ɲamu na ni wo: Baala, epa yoyan e na Yezu. ²² Filipe wara na ɲamu Andre na, na dan, an na la ɲii lakala wara na ɲamu Yezu na. ²³ Yezu zamusɔ o ɲe ni wo: Lenbe ji ce lo bibalo bɛn lenwere la, na ye. ²⁴ camu camu mɛ jo ɲamu an na na ni wo: Ni ɲabi ye kɔlɔ tan tala bɛn o cɔ, o je tamɔ o tën na, na na n'o cɔa, o ciri ɲaabi jaani. ²⁵ Lo le ci kunmara ma ɲɔ na, na ci je da bɔnɔ o kunmara won, na ce lo len n'de o kunmara kɔniɲɛ o jɔn so diɲɛ so won na je zɛn sayɔya le zoere ba yilena. ²⁶ Lolen ci yoyan o da wali mɛ na, na cungunu mɛ dan. Na ɲilena mɛ yen tan len nɔ, mɛ wali bi la mɔ je jenɛ bran. Lo len n' de wali mɛ na, mɛ Ɲina je co co bɛn. ²⁷ Mɛ bɛlɛ bi k'o piyɔn bisaso. Me ji ben ɲamu? Mɛ jo ɲamu ni wo, mɛ ɲina, da mɛ kirisi so were pinmɛ so na, na ce mɛ kɔan so were so na ma la yilena. ²⁸ Mɛ Ɲina, ganri n' se yile. Na were jɔn kole dari lura vɔn na o ɲamu ni wo: Mɛ ce co o bɛn, mɛ je co co bɛn sema. ²⁹ Zama lema tari yen, na na nɔgɔ kole, na ya ni wo: Ni jua zingine. Dariya ni wo: Ni Mɛlɛkɛ dari da jɔn ya. ³⁰ Na ce Yezu ɲamɔ an na na ni wo: Na jɔn kole la ye lurɔ mɛ yilena ba, o lurɔ apa yilena. ³¹ Citi la je cirɛ so dunuɲa la bɛn bisaso. So diɲɛ ɲunci je jɔsɔ o lurɔ pola la won bisaso. ³² Mɛ se, ni mɛ tan tura o lurɔ tan na len were la, mɛ je layala lakala pamu o ko mɛ san. ³³ O ɲama na jɔn yala, na na o se n'je cɔ ɲa le ɲɔ na, o bɔru na. ³⁴ zama la zamisɔ o ɲe ni wo: Epa dɔ karan tɔn vari gɔn yala won ni kirisa je tamɔ sayɔya won len zoereba, hayala, wa ma ni ɲɛn ni paan lo bi balo tan je turɔ? Na lo bi balo la wele ya? ³⁵ Yezu ɲamɔ an na na ni wo: Pola yen apa sɛrɛ dere, naan o ja jɛri ba. Pola yen apa yan lenwere, apa vara na were la yele tan benu ba zɔn apa yan ma, na ce len nin veri tan binu la won, na ɲinu wari nɔ ma. ³⁶ Tan pola yen apa yan len were la,apa sian na tan, yile ji da apa je da tan pola bio na. Na jɔn na ɲama dapɔn Yezu wara dan si an na san ³⁷ Hali an na da tomɔso jaani an na sɛle, an na ye lanaya da o bɛn ma, ³⁸ na da yele Tônbi Ezayi ɲamɔ jɔn lela na ɲe pɔsɔrɔ ni wo: E Ci, wele siɛn epa jɔn ɲamɔ la tan? E Ci bɔrɔ o pan la wele na? ³⁹ Na yilena a na ye gɔlɔ a da lanaya ba, na ce Ezayi mu ɲamɔ ni wo: ⁴⁰ Vamara da naa ni narɔ na, o ɲɛna an na haciri, yile ji da an na sa ba tan na ba, an na haciri ba ma ɲini ma, an na ba lamisi o jɛn yan ma, na ni o ba na da cɛniɲɛ ba. ⁴¹ Ezayi ɲama na, na ce o na lenbe o da jɔn o ma won. ⁴² Na lakala na, Juifu yala ɲuncala jaanni sian Yezu tan, na na o gulɔ zangali ba Fariziɛn yala sa cile sua na yilena, yile ji daa o ba jɔsɔ o lurɔ Vamara ja la tɔn na won ba. ⁴³ An na ni sami lala co la o kɔru Vamara ɲi na bɛn. ⁴⁴ Yezu pasara o ɲamu ni wo: Lole ci ni sian mɛ yan, o ye lanaya da mɛ dan san ma, na na o sian mɛ bɛba ci mu na. ⁴⁵ Le san na mɛ bɛn, na ci san na mɛ bɛba ci mu bɛn. ⁴⁶ Mɛ kɔni kuan diɲɛ won dama ni tan pola, yele lo wo lo ni sian mɛ tan na ba tamɔ tan binno won ma. ⁴⁷ Ni lo dari nɔgɔ mɛ jɔn yala, no mure na jɔn na ba, mɛ ja citi cirɛ na bɛn ma , na yilena mɛ ye ko citi cirɛ diɲɛ bɛn ma, mɛ ko yele diɲɛ da cirisi. ⁴⁸ Le siɛnra mɛ tan ma, n'o siɛnra mɛ jɔn ɲamɔ la tan ma, na kiti ciraci yen. Mɛ ɲamu jɔn le la , na n' ji kiti la cirɛ na ci bɛn zɔra wura. ⁴⁹ na yilena mɛ yen jɔn na da mɛ se paan na ba, naan mɛ cana a ɲamu le, mɛ Ɲina le babu mɛ, mɛ na na naan yan. ⁵⁰ Mɛ ɲino ni wo bɛbɛrɛ le lurɔ mɛ Ɲina yan, naan sayɔya le zoere ba. Na ce mɛ ni ɲemi le, mɛ ni ɲemi naa o mɔni mɛ Ɲina bɛbɛrɛ ɲamɔ la na mɛ na.