¹ Ba dari tari yen Bɛtani, o yile Lazarɛ, ko kɔrɔ ba. Bɛtani ko Mriyama ni Marte zere ya. ² Na Mariyama o vini nɔan kasa ɲɔmɔ Yezu baa bɛn o ciro o ɲɔ kuisi na. Lazarɛ le ko kɔrɔ ba, na ke Mariyama ɲi bi balo. ³ O ɲi bi kanlo ce bɛbɛrɛ Yezu na o ɲamɔ na ni wo: E Ci, n' dɔrɔba ci la ko kɔrɔ ba. ⁴ Yezu nɔgɔ na jɔn na lenwere la, ni wo: Lazarɛ lɔrɔ la k'o guan lɔrɔ ba, o dɔ Vamara bonya la yile na, na da yele Vamara bi la ganri na lɔrɔ la yile na. ⁵ Yezu tari n' de Marte na ni o ɲi bi kanlo na ni Lazarɛ an na ma ɲɔ na. ⁶ O nɔgɔ lenwere la ni Lazarɛ ko kɔrɔba o tari yen tan le nɔ o jina bran o da wɛn ɲii bran na. ⁷ Na dapɔn, o ɲamɔ karan bio la na ni wo: E juge e dana Jude jamana la won. ⁸ Karan bio la ɲamɔ na ni wo: Karan ɲuci, o ye jɛri ba, Juifu yala yoyan a na yabu ni bɔa na an na guɛn, wan ji jugu n' dana n' wa bran sema wa? ⁹ Yezu zamisa an na ɲe ni wo: Lɛrɛ foo ni ɲii yen wɛn na won wa? Lo le n' veri wɛn tan, na desere ba ba, na na diɲɛ la pola'a. ¹⁰ Na ce len ni veri yala na, na de sun ba, na na pola ton won ma. ¹¹ Na jɔn na ɲama dapɔn, o ɲama an na na ni wo: E dɔrɔba Lazarɛ n' jɔriya, na ce mɛ ja o sa kɔrɔ. ¹² Karan bio la ɲamɔ na ni wo: Ɲunci, ni wo jɔriya' o ji da cɛniɲɛ. ¹³ Yezu tari n' de jɔn o cimɛ maa na, na ce o karan bio la haciri won, o da jɔn jɔmɛ se ma na. ¹⁴ Na were la Yezu ɲama an na na o poromu ni wo: Ni Lazarɛ cɔa. ¹⁵ Mɛ tari toma, na ɲɔma mɛ na apa yile na, yele apa da lanaya, na ce a kɔan, e wa o nɔ na. ¹⁶ Na na Toma len ni komi ni bɛrnɔ, o ɲamɔ karan bio tɔ ma la na ni wo: A kuan, Epa mu wa yeie e cɔ ni dana. ¹⁷ Yezu yi bran len were la, o mɔ nɔ na Lazarɛ cɔ la da da naasi van la won o zɔw. ¹⁸ Bɛtani na ni zuruzalɛm sɛrsɛ kole culo cɔɔ bɛn ma, ¹⁹ na naa juifu jaani tari wara Marte ni Mariyama ɲi bi balo liya foni ce. ²⁰ Marte nɔgɔ len were ni Yezu ni koe, o lura o wa o ɲɔ zamise, na na Mariyama jinɔ yen o guso won. ²¹ Marte ɲamɔ Yezu na ni wo: Ɲunci ni n'tari ye te, mɛ ɲi bi balo tari ja cɔ ba. ²² Na ce mɛ ɲunɔ hali bisaso, ne n'kuire len yan Vamara yan, o ji na nɛn n' na. ²³ Yezu ɲamɔ na ni wo: Ne n' ɲi bi balo la sa je kɔrɔ. ²⁴ Marte ɲamɔ na ni wo: N' jo, mɛ ɲunu ni wo o sa je kɔrɔ cɔ yala sa kɔra wura were ɲi pusura wura. ²⁵ Yezu ɲamɔ na ni wo: Mɛ ke cɔ yala sa kɔra ci na ni sayɔya, hali n'o cua na je sayɔya na. ²⁶ Le ke sayɔya ni o sian mɛ yan, na ja cɔ fiyeu n' sian na tan wa? ²⁷ O zamusɔ ɲe ni wo:N' jo ,ɲunci, mɛ siɔn tan ni wan ke kirisa'a, Vamara bi balo, le ji ko diɲɛ won. ²⁸ Na jɔn na ɲama dapɔn, Marte da'a sa o wa o ɲi bi Mariyama komu o ɲamɔ na ni wo: Ɲunci yen n'o komi na. ²⁹ Mariyama nɔgɔ na le la, o da kariba o zɔgɔ o lurɔ o wa Yezu nɔ na. ³⁰ Yezu tari ye jɔn zere la won dere ba, na na Marte zamuso ɲɔ tan le nɔ na, o tari yen. ³¹ Juifu le ma yen Mariyama yan o guso won leya foni nɔ, na ya nɔ len were la ni wo: O da kariba o zogɔ o lurɔ, an na cungunu dapɔn. O ya na won ni wo nɔ nɔ ja cɔ van la nɔ na o wa za bran. ³² Mariyama yen Yezu nɔ na lenwere la, o zara Yezu ba tan o ɲamɔ na ni wo: ECi ni wan tari yen te, a ɲi bi balo la tari ja cɔ ba ³³ Yezu sa na Mariyama zi were, juifu lema ko yan, o sana nayamu zi were le da, o bɛlɛ bi za fo kɔrnɛ, o sa cɛma. ³⁴ Ni wo: A na yugu ze ya? A na zamusɔ ɲe ni wo: ECi, ko sumu na. ³⁵ Yezu za. ³⁶ Juifu yala ni wo: A sumu na dɛ, o ma ɲɔ na dɛ. ³⁷ Na ce dariya ni wo: Owa le punru narɔ la sa, o gulɔ tamu ni Lazarɛ gulɔ o cɔ ba wa? ³⁸ Yezu bɛlɛ bi za dɔrɔ na, o ye cɔ van la san. cile vaan, ɲe ko pio ni bɔa kumele na. ³⁹ Yezu ni wo: A bire bɔa la. Cɔ la ɲi bi Marte ɲamɔ na ni wo: E Ci, n' ja nɔnu na o kasa lura. Zɛ ko wɛn naasi van la won. ⁴⁰ Yezu ɲamɔ na ni wo: Mɛ yo ɲami na ni wo: ni n' da lanaya, n' je Vamara pan la na? ⁴¹ An na tura bɔa la a brin. Yezu turɔ sa vɔn o ɲamu ni wo: Mɛ Ɲina, mɛ ni n' de mawali ni n' ce n' zara mɛ yan. ⁴² Mɛ ɲunu ni ni n' ciri n' zara mɛ yan lenwere, na ce mɛ ɲamɔ na a ɲikana zama la yilena, na ce an na ɲunu ni wan babɔ mɛ. ⁴³ Na jɔn na ɲama dapɔn, o pasara ni kole murɔ na ni wo: Lazarɛ lurɔ fen na. Cɔ la lura, o baia na ni o nɛ na ko cimɛnɔ ni wɔrɔ na, ɲɔ van ɲi yo sa san. ⁴⁴ Yezu ɲama an na na ni wo: A polo, a jɔn bran o wa. ⁴⁵ Juifu yala lema wa Mariyama guso won an na Yezu dali wali le la an na lakala sian o tan. ⁴⁶ Na ce an na dariya wara Farizɛn yala yan an na ɲamu Yezu maderi yala ɲamu an na na. ⁴⁸ Ni pa n' jɔn bran baso, la janni je siɔn na, Rɔmɛ pan cala naya je ko Vamara zira ja la ɲɛni. ⁴⁹ An na won tën le ni komi kayifɛ, na tari ke pemere bra cala ɲunci na bele la, o ɲamu an na na ni wo: Apa ɲini pɔye. ⁵⁰ Apa yo ɲini ni wo ni o juɛ apa san balo bitën cɔ apa lakala yile na, yele ju yala lakala kuɛn ba ɲɛni ba? ⁵¹ O ye na jɔn na ɲamɔ o se pan wo ba, na ce pemere bra ɲunca na bele la, na ce o ɲamu tôn biya jɔn na ni wo ni Yezu je cɔ Juifu yala ju la yilena. ⁵² Kan na juyala mini ma, nahan Vamara bio la lema san se, o ce naya lakala da yan o da tën na. ⁵³ Hali na wura la, Juifu yala ɲuncala lakala da bɛn san na pa je Yezu gu. ⁵⁴ Na ce Yezu ye kuiri Juifu yala zama la sɛrɛ won seba. O wara gan wulu zere dari ɲisan, na yile Efrayim, o wa n'o kanran bio wa jinɛ bran. ⁵⁵ Juifu yala kɔrɔ bɛn bisa da kuisi, jamana la jaanni wara Zuruzalɛm sani kɔrabɛn bisa la ji yi, na ce a sama sia o mɔni an na pemere bira la na. ⁵⁶ An na tari n' kuiri Yezu yan. O juan mu bran vazira ja mula won, an na ni busi da ni wo: Bën ya apa pon won? Ni o ji ko bisa la won wa, na na o ja ko ba? ⁵⁷ Pɛ ɲuncala na ni Farizɛn yala baba bɛbɛrɛ lala na ni wo lo le ɲini Yezu nɔ, na ɲamu an na na, yile ji ce an na mɔn.