² Yesu wa kandugile gu mulundu wa mitshi ya ba olive. ¹ Mu gikhela gi kima, wa yile mu ngila mu inzo ya isambu, athu ejile gwa mwene. Wadi tumbigile enji wa yandigile gu a longa. ³ Alongi a shigo nu afalisaye ejile mu bata mukhetu mu moshi wa kwateya nu gu kita uthambi. A mu hagele ha katshi dia gimvuga gia athu. ⁴ A lezele Yesu egi: " Longi, mukhetu yogu wa katuga mu kwateya mu kita uthambi. ⁵ Mu mikanda ya shigo, Moyize wa tu hwile nswa ha gu shiya athu a phila yiyi. Ikhi udi mu tu leza mukunda nu mwene?" ⁶ A zwelele nganyi ha gu mu tela muheto mukunda nu gu mu funda. Uvi Yesu wa shiugile hoshi mu mavu wa yandigile gu sonega nu munwe. ⁷ Mu phila a khalele mu mu hula, Yesu wa zugile , wa hene a lezele egi: " Muthu yonu mu katshi dienu udi wa konda masumu a yandige gu mu kwemba muthu wa thomo maseso." ⁸ Wa shiugile mu mbala iko ha gu sonega mu mavu nu munwe wenji. ⁹ Tangwa a vile ndaga yene, a yandigile gu katuga hama hene mu moshi mu moshi ha gu yandiga gwa ma mbuta. Gu nyima Yesu wa begele kaka nu mukhetu mwene wa hageye mu katshi diawo. ¹⁰ Wa zugile enji wa mu hudile egi: " Mukhetu eye, Athu a gu fundi adi gwi? Gushi ata muthu go wa gu batudila ndola?" ¹¹ Mukhetu wa vutudile egi : " Fumu ata muthu ndo." Yesu wa mu lezele egi: " N'eme nji ngu shi mu gu batudila ndola go. Ginda gaye; gu kita nji ndo masumu." ¹² Yesu wa lezele nji gimvuga gia athu egi: " Eme nga mwanya wa haha ha mavu; yonu udi mu ngu hata mba gwa wendi go mu phipha uvi mba udi mu jinga mu mwanya wa lujingu." ¹³ Afalisaye a mu lezele egi: " udi mudi tela gimbangi gwaye ha khaye; gimbangi giene gishi gia kielega go." ¹⁴ Yesu wa a vutudile egi: " Ata ngu mudi tela gimbangi giami ha khami, gimbangi giami gidi gia kielega. Ngu mu jiya gwi nga katuga enji gwi ngu muya; uvi enwe mushi mu jiya go guma nga katuga nu guma ngu muya. ¹⁵ Enwe Mudi mu sambesa ha gu talela mwila ; eme ngushi mu sambesa muthu go. ¹⁶ Ata ngu mu sambesa, gu sambesa gwami gudi gwa kielega mukunda ngu shi ha khami go, uvi ngudi nu Tata yonu wa ngu tumile. ¹⁷ Mu shigo jienu, gwa sonegeye egi gimbangi gia athu muyadi gidi gia kielega. ¹⁸ Eme ngu mu ta gimbangi giami ha khami, Tata yonu wa ngu tumile udi mu ta nu mwene gimbangi giami." ¹⁹ A mu lezele egi: " Shaye udi gwi?" Yesu wa vutudile egi: " Mushi mu ngu jiya go, mushi mu jiya nji go nu Shami; gula mudi mu ngu jiya, nga mudi mu jiya nu Shami." ²⁰ Wa zwelele ndaga jiene tangwa a khalele mu longa mu inzo ya isambu phene-phene nu hama ha nu swegeya ima ya funu uvi ata muthu mu moshi gwa mu kwatele go mukunda tangwa dienji dia khalele khanji di lunga go. ²¹ Wa a lezele nji egi: " Ngu muya gami. Mba mudi mu ngu kamba enji mba mudi mu fwa mu masumu enu. Mba mushi muza go hama hanyi ngudi muya. ²² Bayuda adi zwelele ene nu ene egi: " Yonu wa zwedi egi: " Mwa jiyile go guza hama hanyi ngudi muya", keti wa tshigina guya mudi shiya?" ²³ Yesu wa a lezele egi: " Mudi mwa athu a haha ha mavu; eme nga muthu wa gosa. Mudi mwa athu a haha ha mavu; eme ngu shi nga muthu wa haha ha mavu go. ²⁴ Hene ngu mu mi leza egi mba mudi mu fwa mu masumu enu. Mukunda gula mwa kwikile go egi NGUDI YONU UDI, mba mudi mu fwa mu masumu enu." ²⁵ A mu hudile egi: " Udi wa nanyi?" Yesu wa vutudile egi: " Ndaga jinyi nga mi lezele katuga ha luyandigu. ²⁶ Ngudi nu ndaga jia vula jia gu zwela nu gu mi sambesa gu ndaga jidi mu mi talela. Uvi Yonu wa ngu tumile udi nu masonga; enji ndaga jinyi ngudi mu leza athu a ha mavu nga ji vile gwa mwene." ²⁷ A bagisele go egi wa khalele mu a leza ndaga jia Tata. ²⁸ Yesu wa zwelele nji egi: " Tangwa mba mu tuphula Muna Muthu, hene mba mu jiya egi NGUDI NGA MWENE enji nga nu kita go gima gi moshi mu ngindu jiami. Mu phila Shami a ngu longele, idi mu phila yene ngu mu zwela ndaga jiene. ²⁹ Yonu wa ngu tumile udi n'eme, enji gwa ngu bembele go ha khami mukunda ngu mu kita kaka ndaga jinyi jia nu mu hwa kiese." ³⁰ Tangwa Yesu a khalele mu zwela ndaga jiene, athu a vula a kwikile gwa mwene. ³¹ Gu nyima Yesu wa lezele bayuda wanyi a kwikile gwa mwene egi: " Gula mwa kangama mu ndinga yami, mudi gibeni alongogi ami; ³² mba mudi mu jiya masonga enji masonga ene mba adi mu mi katula mu gi higa." ³³ A mu vutudile egi: " Etwe tudi ta ana a Abalayama enji khanji tu khala mu gi higa gia muthu go; mukunda nu ikhi udi mu zwela nganyi egi? Mba mudi mu katuga mu gi higa." ³⁴ Yesu wa a vutudile egi: " Mu masonga, masonga ngu mu mi leza egi, konso muthu yonu wa nu kita masumu udi muhiga wa masumu. ³⁵ Muhiga gwa nu khala go konso tangwa mu inzo; uvi muna fumia gisapha wa nu khala konso tangwa. ³⁶ Hene gula Muna Muthu wa mi katula mu gi higa, mba mu khala nji go ahiga. ³⁷ Ngu mu jiya egi mudi mwa ana a Abalayama; uvi mudi mu tshigina gu ngu shiya mukunda ndinga yami ishi go mu katshi dienu. ³⁸ Ngu mu zwela ndaga jinyi nga monele gwa Shami, enwe nji mudi mu kita ndaga mwa vile gwa a shenu." ³⁹ A vutudile egi: " Shetu udi Abalayama." Yesu wa a lezele egi: " Gula nga mudi mwa ana a Abalayama, nga mudi mu kita ndaga jia Abalayama. ⁴⁰ Lulu ngagi mudi mu kamba ha gu ngu shiya; eme muthu mu moshi nga nu mu mi leza ndaga jia kielega jinyi nga vile gwa Nzambi. Abalayama gwa kitile go ndaga jia nganyi. ⁴¹ Mudi mu kita ndaga jia Shenu." A mu lezele egi : " Tu shi go twa ana a butugile mu uthambi; Tudi nu Shetu mu moshi Nzambi." ⁴² Yesu wa a lezele egi: " Gula Nzambi udi Shenu, nga mwa ngu tshigina, mukunda nga zogele enji nga katugile gwa Nzambi; nge jile go mu lozolo lwami, uvi mwene muthu wa ngu tumile. ⁴³ Mukunda nu ikhi mushi mu bagisa go ndinga jiami? Idi mukunda mushi mu tshigina gu ji vwa go. ⁴⁴ Enwe mwa katuga gwa diabulu, mwene shenu, enji mudi mu tshigina gu lungisa ndaga jia nu tshigina shenu. Wa khalele yonu wa nu shiya athu katuga ha luyandigu enji gwa kangamele go mu katshi dia masonga mukunda gwa shi genji go muthu wa masonga. Tangwa adi mu mba mambo, udi mu kita nganyi mu luzolo lwenji mukunda udi mwenya mambo enji udi sha mambo. ⁴⁵ Uvi Enwe, mwa nu ngu kwikila go mukunda nga nu zwela ndaga jia masonga. ⁴⁶ Nanyi mu katshi dienu wa jiya gu leza egi nga nu kita masumu? Gula ngu mu zwela ndaga jia masonga, mukunda nu ikhi mushi mu ngu kwikila go? ⁴⁷ Yonu mukima wa katuga gwa Nzambi wa nu vwa ndaga jia Nzambi; uvi enwe mushi mu vwa go ndaga jia jiene mukunda mwa katugile go gwa Nzambi." ⁴⁸ Bayuda a mu vutudile egi: " Keti tu shi go mu zwela mwa bonga egi udi wa mwenya gu Samaliya enji udi nu diabulu? ⁴⁹ Yesu wa a vutudile egi: " Ngu shi nu diabulu go, uvi ngu mu hwa Shami lukumu, uvi enwe mudi mu ngu vweza. ⁵⁰ Eme nga nu kamba go khembo yami, Uvi gudi nu muthu mu moshi udi mu kamba enji udi mu sambesa. ⁵¹ Mu masonga, masonga, ngu mu mi leza egi, gula muthu udi mu jitisa ndinga yami, mba gwa monyi lufwa ata fioti." ⁵² Bayuda a mu lezele egi: " Lulu ngagi ta jiya egi udi nu diabulu. Abalayama wa file nu ba profeta nji a file; uvi eye udi mu zwela egi: " Gula muthu mu moshi wa jitisa ndinga yami mba gwa phagi go lufwa ata fioti." ⁵³ Eye ushi go wa mbuta wa gu balega shetu Abalayama yonu wa file ishi nganyi go? Ba profeta nji a file. Udi mudi zula wa nanyi?" ⁵⁴ Yesu wa vutudile egi: " Gula ngadi hwa khembo eme ha khami, khembo yene idi ya phamba. Shami yonu mwa nu tamega egi Nzambi wenu mwene muthu wa nu ngu hwa khembo. ⁵⁵ Enwe mwa mu jiyile go, uvi eme ngu mu mu jiya. Gula nga zwelele egi: " Ngu shi mu mu jiya go", nga ngudi nga mwenya mambo ole enwe. Ata idi nganyi, ngu mu mu jiya enji nga nu jitisa ndinga yenji. ⁵⁶ Shenu Abalayama wa nu vwa kiese ha gu mona gilumbu giami; wa monele gilumbu giene hene a vile kiese." ⁵⁷ Bayuda a mu lezele egi: " Eye ushi gale nu mvula makumi a tano go udi mu zwela egi wa monele Abalayama?" ⁵⁸ Yesu wa a vutudile egi: " Mu masonga, masonga, ngu mu mi leza egi gu twama Abalayama a butuge, NGA khalele." ⁵⁹ A nonele maseso mukunda nu gu mu kwemba uvi Yesu wadi swegele enji wa zogele mu inzo ya isambu.