¹ Gu nyima ya ndaga jiene, Yesu wa yile gu Galileya mukunda gwa tshiginile go guya gu Yudeya mukunda bayuda a khalele mu kamba phila ya gu mu shiya? ² Lulu ngagi khinji ya bayuda nu ya thenta ya khalele phene-phene ha gu teya. ³ Hene aphangienji a mu lezele egi: "Katuga hama haha inda gu Yudeya, mukunda alongogi aye a mone nu ene isalo udi mu kita. ⁴ Mukunda gushi go ata muthu mu moshi wa nu kamba gudi jiyisa gu meso a athu wanyi a nu kita ndaga gu giswegi. Gula udi mu kita ndaga jiene, di monese gwa mavu akima. ⁵ Mukunda ata aphangienji a khalele go mu mu kwikila. ⁶ Hene Yesu a a lezele egi: " Tangwa diami khanji di lunga go, uvi tangwa dienu didi phembeni. ⁷ Mavu a jiyile go gu mi yegula, uvi adi mu ngu yegula mukunda ngu mu ta gimbangi giawo egi isalo yawo idi ya bola. ⁸ Enwe, ndenu gu khinji, eme ngu shi go muya gu khinji mukunda tangwa diami khanji di lunga go." ⁹ Gu nyima ya gu a leza ndaga jiene, mwene wa begele gu Galileya. ¹⁰ Uvi tangwa aphangienji a kandugile gu khinji, gu nyima nu mwene wa kandugile gwene, wa yile mu giswegi. ¹¹ Bayuda a khalele mu mu kamba gu khinji nu gu zwela egi: " Mwene udi gwi?" ¹² Gwa zogele thembe ya vula mu katshi dia gimvuga mu ndaga ya khalele mu mu talela. Athu ako a khalele mu zwela egi: " Udi muthu wa bonga." Ako nji a khalele zwela egi: " Ndo, udi mu dimba athu." ¹³ Uvi gwa khalele go nu muthu wa khalele mu zwela ndaga yenji ha phelo mukunda a khalele mu vwa woma wa bayuda. ¹⁴ Mu katshi dia khinji, Yesu wa ngidile mu inzo ya isambu wa yandigile gu longa. ¹⁵ Bayuda a khalele mu yituga; a zwelele egi: " Phila khi Muthu yogu adi mu jiya ndaga jiji ji kima ? Mwene khanji a longuga go." ¹⁶ Yesu wa a vutudile egi: " Malongi wawa ashi go ami, uvi adi a yonu wa ngu tumile. ¹⁷ Gula Muthu wa tshigina gu kita luzolo lwenji, mba udi mu jiya malongi wawa, gula adi mu katuga gwa Nzambi nga ndo ngu mu zwela mukunda nu mabanza ami ha khami. ¹⁸ Yonu udi mu zwela mukunda nu mwene ha khenji udi mu kamba lukumu lwenji ha khenji, uvi yonu udi mu kamba lukumu lwa yonu wa ngu tumile, muthu mwene udi wa kielega enji gwa nu kamba go gununga gwenji. ¹⁹ Moyize gwa mi hwile go shigo ? uvi gu shi go ata muthu wa nu lemvugila shigo yene. Mukunda nu khi mudi mu kamba phila ya gu ngu shiya?" ²⁰ Gimvuga gia athu gia mu vutudile egi: " Udi nu pheve ya bola. Nanyi udi mu kamba ha gu gu shiya?" ²² Yesu wa vutudile nu gu a leza egi: " Nga kiti gidimbu gi moshi enwe mudi mu yituga mukunda nu gidimbu giene. ²¹ Moyize wa mi lezele ha gumba anenu a mala mu mukanda wa phogo ( mukanda wene wa katugile go gwa Moyize uvi wa katugile gwa a khakha) enji mu gilumbu gia gu hwima, enwe mudi mu mba muthu mu mukanda. ²³ Gula muthu mu moshi wa mbiya mu mukanda mu gilumbu gia guhwima mukunda nu gu konda gu shiya shigo ya Moyize, phila khi mudi mu ngu vila khabu mukunda nga belula muthu mu moshi mu gilumbu gia shigo? ²⁴ Mu khadi go mu sambesa ha gu tala kaka gu meso uvi khalenu mu sambesa mu masonga." ²⁵ Athu ako a gu Yelusalemi a zwelele egi: " Keti ishi go yogu adi mu kamba ha gu shiya ? ²⁶ Talenu, udi mu zwela ndaga jikima ha phelo, uvi ene ashi go mu mu leza ata gima. Keti mafumu ashi go mu jiya egi muthu mwene udi ya kielega Kilisto? ²⁷ Uvi etwe tudi mu jiya guma gwa katuga muthu yogu. Uvi tangwa Kilisto mba eza mu vutuga, gushi go nu muthu mba u jiya guma adi mu katuga." ²⁸ Hene Yesu a yandigile gu longa mu ndinga ya ngolo mu katshi dia inzo ya isambu egi: " Enwe mudi mu ngu jiya nu gu jiya khungienu akima guma nga katuga. Eme nge jile go mu luzolo lwami, uvi yonu wa ngu tumile udi muthu wa kielega, mushi go mu mu jiya. ²⁹ Eme ngu mu mu jiya mukunda nga katuga gwa mwene enji mwene wa ngu tumile." ³⁰ A yandigile gu kamba phila ya gu mu kwata, uvi gushi go nu muthu wa mu kwatele mukunda tangwa dienji dia lungile go. ³¹ Athu a vula mu katshi dia gimvuga a kwikile gwa mwene a khalele mu zwela egi: " Tangwa Kilisto mba eza, keti mba gwa kiti go idimbu ya vula ya gu balega yiyi idi mu kita muthu yogu?" ³² Ba falisaye a vila gimvuga gia athu a khalele mu boguta mukunda nu ndaga ya khalele mu talela Yesu, hene mafumu a nganga-nzambi nu ba falisaye a tumile masuta ha gu mu kwata. ³³ Hene Yesu a zwelele egi: " Ngudi nenu ga ndambu ga ilumbu, gu nyima nngu feto vutuga gwa yonu wa ngu tumile. ³⁴ Enwe mba mudi mu ngu kamba uvi mba mu ngu monyi go; guma ngudi muya, mba mushi mu kuwa go ha gukuma gwene." ³⁵ Bayuda a yandigile gudi zwelela mu katshi diawo egi: " Gwi mba guya muthu yogu mukunda etwe tule gu khala ndo nu phila ya gu mu mona? Keti udi mu tshigina guya mu katshi dia wanyi a phanzanele gwa ba greki ha guya mu a longa? ³⁶ Ikhi a tshigina gu zwela tangwa adi mu zwela egi: " Enwe mba mudi mu ngu khamba uvi mba mushi mu ngu mona go; hama ngu muya, mba mushi mu kuwa go ha guza hene." ³⁷ Lulu, ha suga, mu gilumbu gia koma gia khinji, Yesu wa zugile wa yandigile gu longa egi: " Gula muthu udi nu luhungu, eze gwa eme a nwe. ³⁸ Yonu udi mu ngu kwikila, mu phila mikanda ya sonegeye idi mu zwela egi, gwa mwene mita ya koma ya meya a monyo mba idi mu zoga." ³⁹ Uvi mwene wa zwelele ndaga yene mukunda nu pheve, inyi mba iza gwa athu wanyi mba a kwikila gwa mwene; pheve yene ya khalele khanji itumiya go mukunda Yesu wa khalele khanji a zula go lukumu. ⁴⁰ Athu ako mu katshi dia gimvuga, tangwa a vile ndaga jiene, a zwelele egi: " Muthu yogu udi gibeni Kilisto." ⁴¹ Uvi ako a zweleleegi: " Keti idi gu Galileya Kilisto a feto zoga? ⁴² Keti mikanda ya sonegeye ishi go mu zwela egi Kilisto mba u zoga mu gikanda gia Davidi, enji gu Betelemi gu dimbo dinyi Davidi a khalele mu jinga?" ⁴³ Hene gudi kapha gwa ngidile mu katshi dia gimvuga mukunda nu mwene. ⁴⁴ Athu ako mu katshi diawo a zudile ngindu jia gu mu kwatesa, uvi ata muthu mu moshi gwa mu kwatele go. ⁴⁵ Tangwa masuta ejile mu vutuga, mafumu a nganga-nzambi nu ba falisaye a a hudile egi: " Mukunda nu ikhi mwadi gu mu bata haha ndo?" ⁴⁶ Masuta a vutudile egi: " Gushi go nu muthu wa zwelale nganyi katuga gu twama." ⁴⁷ Ba falisaye a vutudile egi: " Keti mwa dimbiya n'enwe?" ⁴⁸ Mu katshi dia mafumu nu ba falisaye nanyi wa kwikila gwa mwene? ⁴⁹ Uvi gimvuga gia athu wawa khanji a jiya go shigo adi athu a shinjiye. ⁵⁰ Nikodemi ( mu moshi mu katshi dia ba falisaye we jile mu mu mona gu twama ) wa zwelele egi: ⁵¹ " Keti shigo yetu ya nu sambesa muthu gula khanji mu mu vwa go enji gula khanji ijiya go ndaga mwene a kiti?" ⁵² A mu vutudile egi: " N'eye nji wa muthu wa gu Galileya? kamba wa mbo mona egi ata mbikudi profeta mu moshi gwa lendele go gu Katuga gu Galileya." ⁵³ Gu nyima, konso muthu wa vutugile mu inzo yenji.