¹ Gu nyima dia ndaga yene, Yesu wa zaugile mu sambwa dia gijiba gia Galileya ginyi gia nu tamegeya nji egi gijiba gia Tiberiade. ² Gimvuga gia athu a vula gia khalele mu mu hata mukunda athu a monele idimbu mwene a khalele mu kita gwa athu a gimbefu. ³ Yesu wa yile gu khanda wa mulundu wadi tumbigile gwene hoshi nu alongogi enji. ⁴ (Pake, sungi ya fete ya bayuda ya khalele phene-phene.) ⁵ Tangwa Yesu a tuphudile meso wa monele gimvuga gia athu a vula a khalele muza gwa mwene, hene a lezele Filipo egi: " Gwi ta jiya muya mu sumba mapha ha gu disa gimvuga gigi ?" ⁶ (Yesu wa zwelele nganyi ha gu phaga Filipo mukunda mwene hakhenji wa khalele mu jiya ndaga ya gu kita.) ⁷ Filipo wa mu vutudile egi : " Khama jiyadi jia falanga jia mbo kuwa go ha gusumba mapha mukunda konso muthu ata gama gabiyo." ⁸ Mu moshi mu katshi dia alongogi, Andre, phangia Simoni Phetelo, wa lezele Yesu egi : ⁹ " Gudi haha mona yala mu moshi udi nu mapha a tano nu giswi jiyadi, uvi keti idi ya fwana mukunda nu gu vula gwa athu?" ¹⁰ Yesu wa zwelele egi : " Lezenu athu adi tumbige hoshi." ( hama hene ha khalele nu mwangu wa vula.) Hene athu adi tumbigile hosi a khalele guvula giteso gia mafunda a tano mu gimvuga. ¹¹ Yesu wa zudile gitshidi gia dipha, gu nyima wa vutudile matondo, mwene wa kaphele gwa athu wanyi a khalele a gudi tumbiga hoshi. Wa kaphele nji nu giswi giteso gi moshi mu phila a kitile enji athu ene a zudile mu phila atshiginile. ¹² Tangwa athu a dile akuta; mwene wa lezele alongogi egi: " Nonenu itshidi ya mapha innyi ya bega mukunda ata gima gile gu tota ndo." ¹³ A nonele a zalesele milongo kumi nu iyadi nu ya itshidi ya mapha, itshidi ya begele gu nyima ya gudia gwa athu akima. ¹⁴ Hene, tangwa athu a monele gidimbu mwene a kitile, a zwelele egi: " Yogu udi yamakhidia mbikudi yonu ufeto za haha ha mavu." ¹⁵ Tangwa Yesu a jiyile egi a feto guza ha gu mu kwata mu gingolo-ngolo ha gu mu haga fumu, mwene wa katugile genji hakhenji, ha guya gu mulundu. ¹⁶ Tangwa gingweze gia bwile, alongogi a bulumugile mu khelelego ya muta wa koma wa mungwa-mungwa. ¹⁷ A ngidile mu wato a zaugile ha sambwa dia muta ha guya gu Kapernaum. (Mu tangwa phipha ya bwile, Yesu gwa khalele khanji eza go mu a sanga.) ¹⁸ Muphephe wa vula we jile mu nyigisa muta. ¹⁹ Tangwa alongogi a ngidile mu wato, ayile mu ginano gia gu leha gwa gi tamina gia giteso gia kilometele makumi muyadi nu mu tano, a monele Yesu muza mu wenda holo dia meya ha guza gu khanda ya wato, hene woma wa a kwatele. ²⁰ Ata nganyi, mwene wa a lezele egi : "Yogo eme ! mu vi go woma." ²¹ A tshiginile gu mu ngidisa mu wato, mu mbala imoshi wato wa yile mu phusana gonzia mavu gu khanda a khalele muya. ²² Mu gilumbu gia hatele, gimvuga gia athu wanyi a begele gu sambwa diko dia muta a monele egi gwa khalele go ata wato uko, kaka unu umoshi enji Yesu gwa ngidile go mu wato nu alongogi, uvi alongogi a yile ene hakhawo. ²³ ( Ata nganyi gwa khalele nu ma wato ako a katugile gu Tiberiade phene-phene nu hama hanyi ene a dile mapha tangwa Yesu a vutudile matondo). ²⁴ Tangwa gimvuga gia athu a monele egi Yesu nu alongogi a khalele go hama hene, a ngidile mu ma wato ha guya gu Kapernaum mu kamba Yesu. ²⁵ Tangwa a mu monele ha sambwa diko dia muta, a mu hudile egi: "Longi, tangwa khi weji gugu?" ²⁶ Yesu wa a vutudile egi nu gu a leza egi: " Mu masonga, masonga, mushi go mu ngu kamba mukunda nu idimbu ya khumbwa inyi mwa monyi uvi mukunda mwa dile mapha enji mwa kutile. ²⁷ Sugisenu ha gu kita gisalo mukunda nu ima ya gudia inyi ya nu fwa, uvi kitenu gisalo mukunda nu ima ya gudia inyi ya nu jinga lujingu lwa mvula nu mvula lunu Muna Muthu mba a mi hwa, mukunda Nzambi Tata mwene ha khenji a hagele gidimbu holo dia muthu yonu a phonele." ²⁸ Hene a mu lezele egi: " Ikhi ta jiya gu sala ha gu kita gisalo gia Nzambi?" ²⁹ Yesu wa a vutudile egi: " Tala gisalo gia Nzambi gidi egi: enwe mu kwikila gwa muthu yonu wa tumiye." ³⁰ Hene a mu lezele egi: " Gidimbu khi wa mbo kita mu phila egi tu mone, tu gu kwikile ? Ndaga khi u kita? ³¹ A shetu a dile madia wanyi a hwiye mu temu dia zala fufuta, mu phila ya sonegeye egi: " Mwene wa a hwile mapha wanyi a katugile gosa ha gudia'." ³² Hene Yesu wa a vutudile egi: " Mu masonga masonga, ya khalele go Moyize wa mi hwile mapha a gosa, uvi ya khalele Shami udi mu mi hwa mapha a kielega wanyi a gosa. ³³ Mukunda mapha a Nzambi adi muthu yonu wa katugile gosa ha guza mu bata monyo gwa thotho ikima." ³⁴ Lulu ngagi wa a lezele Yesu egi: " Fumu, tu hwe mapha ene tangwa dikima." ³⁵ Yesu wa a lezele egi:" Eme nga dipha dia monyo, yonu mu kima udi muza gwa eme mba gwa khala go mu nzala, yonu nji udi mu ngu kwikila mba gwa vi go luhungu. ³⁶ Mu phila nga mi lezele egi: " mwa ngu mona uvi mushi go mu ngu kwikila. ³⁷ Wanyi akima Shami a ngu hwile mba adi muza gwa eme, enji mba ngu bishila go ata phila khi yonu mba uza gwa eme. ³⁸ Mukunda eme nga katugile gosa, ndo mukunda ngu sale luzolo lwami, uvi mukunda nu gu sala luzolo lwa yonu wa ngu tumile. ³⁹ Tala luzolo lwa yonu wa ngu tumile, ngule gu totesa ndo ata mu moshi mu katshi dia wanyi mwene a ngu hwile, uvi mukunda ngu a zugisa gu lufwa mu gilumbu gia suga. ⁴⁰ Mukunda luzolo lwa Tata ludi egi, yonu mu kima wa mona Mona nu gu mu kwikila a zule monyo wa mvula nu mvula, enji mba ngu mu zugise gu lufwa mu gilumbu suga." ⁴¹ Mafumu a bayuda a yandigile gu mu bogutila mu phila mwene a zwelele egi: " Eme nga dipha dinyi dia katugile gosa." A zwelele egi: ⁴² " Keti yogu ishi go Yesu, muna Yozefi, yonu tudi mu jiya shenji nu ginenji?" Phila khi adi mu zwela egi: " Eme nga katugile gosa?" ⁴³ Yesu wa a vutudile egi: " Sugisenu ma boguta mu katshi dienu. ⁴⁴ Gushi go nu muthu wa jiya guza gwa eme gula Tata yonu wa ngu tumile gwa mu bendele go ha guza gwa eme, enji mba ngudi mu mu zugisa gu lufwa mu gilumbu gia suga. ⁴⁵ A sonegele gu mikanda gwa ba profeta egi: " Mba adi mu longeya gwa Nzambi." Konso muthu yonu wa nu vwa malongi a Tata nu gu a tshigina, udi muza gwa eme. ⁴⁶ Gushi go nu muthu wa monale Tata, kaka yonu wa katugile gwa Tata, mwene wa monale Tata. ⁴⁷ Mu masonga masonga, yonu wa nu kwikila udi nu monyo wa mvula nu mvula. ⁴⁸ Eme nga dipha dia monyo. ⁴⁹ A shenu a dile madia wanyi a vula a hwiye mu katshi dia temu dia zala fufuta uvi a file. ⁵⁰ Didi dipha dia katugile gosa, mukunda muthu mu kima wa mba udia dipha diene mba gwa fi go. ⁵¹ Eme nga dipha dia monyo dia katugile gosa. Gula muthu wa zula dipha diene mudia, mba udi mu jinga tangwa dikima. Dipha dinyi mba ngu hana didi mwila wami mukunda nu monyo wa thotho ya mvimba." ⁵² Bayuda a vile khabu a yandigile gu haga thembe mu katshi diawo nu gu zwela egi: " Phila khi muthu yogu a jiya gu tu hwa mwila wenji?" ⁵³ Hene Yesu a zwelele egi: " Mu masonga masonga ngu mu mi leza egi gula mwa dile go mwila wa Muna Muthu nu gu konda gunwa menga enji, mba mu zudi go monyo mu katshi dienu. ⁵⁴ Yonu mu kima mba udia mwila wami nu gunwa menga ami udi nu monyo wa mvula nu mvula, enji mba ngudi mu mu zugisa gu lufwa mu gilumbu gia suga. ⁵⁵ Mukunda mwila wami udi madia a moshi a kielega, menga ami adi gima gi moshi gia gunwa gia bonga. ⁵⁶ Yonu mba udia mwila wami nu gunwa menga ami udi mu katshi diami, eme mu katshi dienji. ⁵⁷ Mu phila Tata wa monyo wa ngu tumile, enji mu phila ngudi mu jinga mukunda nu Tata, mu phila yene yonu udi mudia mwila wami, mba udi mu jinga nji mukunda nu eme. ⁵⁸ Didi dipha dinyi dia katugile gosa, ishi go mu phila ya dinyi a shetu a dile enji a file. Yonu mba udia dipha diene mba udi mu jinga mu tangwa dikima." ⁵⁹ Yesu wa zwelele ndaga jiene mu katshi dia inzo ya isambu, mu tangwa mwene a khalele mu longa gu Kapernaum. ⁶⁰ Alongogi a vula, tangwa a vile ndaga yene a zwelele egi: " Wawa malongi a phashi, nanyi wa jiya gu a tshigina?" ⁶¹ Yesu mu phila a jiyile mu mutshima wenji egi alongogi a khalele mudi bogutila mukunda nu ndaga yene, mwene wa a lezele egi: " keti ndaga yene ya mi budisa sakuba?" ⁶² Ikhi mba mu kita gula mba mwa mona Muna Muthu mu kanduga gosa gunu mwene a katugile ha thomo? ⁶³ Idi Pheve ya nu hana monyo. Mwila ushi go nu funu ata fioti. Malongi wanyi nga mi longele adi pheve nu monyo. ⁶⁴ Lulu ngagi, idi mu katshi dienu wanyi ako a nu kwikila go." Mukunda Yesu wa jiyile katuga ha luyandigu egi wanyi a dile gu kwikila ndo ene mba a mu yegula. ⁶⁵ Mwene wa zwelele egi: " Idi mukunda nu nganyi nga mi lezele egi gushi go nu muthu wa jiya guza gwa eme gula Shami gwa mu hwile go njila." ⁶⁶ Gu nyima ya ndaga yene, alongogi a vula a yile gawo a tunyile ha gu wenda nenji. ⁶⁷ Yesu wa lezele athumwa kumi nu muyadi egi: " N'enwe mwa tshigina guya genu?" ⁶⁸ Simoni Phetelo wa vutudile egi: " Fumu, gwa nanyi muko ta jiya guya?" Eye udi nu malongi a monyo wa mvula nu mvula, ⁶⁹ etwe ta kwikile enji tudi mu jiya egi eye wa Musantu wa Nzambi. ⁷⁰ Yesu wa a lezele egi: " Keti ishi go eme nga mi phonele kumi nu muyadi, mukunda mu moshi mu katshi dienu udi diabulu?" ⁷¹ Mwene wa khalele mu zwelela Yudasi, muna Simoni Isikaliote, mukunda mwene mu moshi mu katshi dia kumi nu muyadi, wa tshiginile gu yegula Yesu.