¹ Gu nyima dia ndaga yene, fete ya ba yuda ya khalele mu salama, Yesu wa kandugile gu Yelusalemi. ² Gunu gu Yelusalemi phene-phene nu mufulo wa mameme, gudi nu gijiba gia nu tamegeya mu ndinga ya gi hebelo egi Beteseda enji gidi nu tu mifulo tu tano. ³ Athu a vula wanyi a khalele nu misongo, nu wanyi a fwa meso, nu a malu a gifu, nu wanyi a misongo ya khonzo a khalele mu swama hene mu kinga tangwa meya a mbo nyigana. ⁴ Mukunda wanjio wa Fumu wa khalele mu bulumuga mu tangwa di moshi ha gu nyigisa meya. Muthu mu kima wa khalele mu bulumuga ha thomo tangwa meya a khalele mu nyigana wa khalele mu beluga, ata gimbefu gidi gia phila khi. ⁵ Hene henyanyi ha khalele nu muthu mu moshi wa khalele nu malu a gifu mvula makumi a tatu nu nana. ⁶ Tangwa Yesu a mu monele wa swama hene wa jiyile egi wa sala hene tangwa dia vula, wa mu hudile egi : "Wa tshigina gu beluga ?" ⁷ Muthu wa gimbefu wa vutudile egi :" Longi ngu shi go mu muthu wa jiya ngu ngu mba mu gijiba tangwa meya a mu nyigana mukunda tangwa ngu mu phaga muthu muko udi mu ngu diangela." ⁸ Yesu wa mu lezele egi:" Zuga, zula gitanda giaye wenda ." ⁹ Mu tangwa diene dinyi muthu mwene wa belugile, enji wa zudile gitanda gienji wa wendele. Ya khalele mu gilumbu gia shigo. ¹⁰ Ba yuda a lezele muthu yonu wa belugile egi :" Idi mu gilumbu gia shigo enji wa jiyile go gu tuphula gitanda giaye." ¹¹ Wa vutudile egi: "yonu wa ngu belula wa zwedi egi, " zula gitanda giaye, wenda." ¹² A mu hudile egi :" Nanyi muthu mwene wa gu leji nganyi egi " zula giitanda giaye wenda ?" ¹³ Uvi muthu yonu wa belugile gwa khalele go mu jiya nanyi mukunda Yesu wa katugile hama hene mu giswegi mukunda nu gu vula gwa athu a khalele hene. ¹⁴ Gu nyima, Yesu wa mu sangele mu temphelo wa mu lezele egi : "Tala; wa beluga! gu kita nji ndo masumu, mukunda gima gia bola gile gu gu jila ndo." ¹⁵ Muthu mwene wa yile mu bata sango yene gwa ba yuda egi idi Yesu wa mu belula. ¹⁶ Hene mukunda nu nganyi ba yuda a yandigile gu monesa Yesu phashi mukunda wa kitile ndaga yene mu gilumbu gia shigo. ¹⁷ Yesu wa a lezele egi :" Shami udi mu sala nu lulu ngagi, n'eme nji ngu mu sala." ¹⁸ Mukunda nu nganyi ba yuda a kambele nji phila iko ya gu mu shiya, mukunda ishi go kaka nu gu konda gu jitisa gilumbu gia shigo uvi mukunda wa khalele mu tamega Nzambi egi Shenji, enji mu di monesa egi wa fwanana nu Nzambi. ¹⁹ Yesu wa vutudile egi :"Mu masonga masonga, Mona gwa jiyile go gusala ndaga mwene ha khenji, katula yinyi Tata adi mu kita; mukunda ikima Tata adi mu kita, Mona nji udi mu ikita. ²⁰ Mukunda Tata wa tshigina mona enji wa nu mu bambugisa ndaga jia gu kita, nu gu mu bambugisa ndaga jia koma nu jinyi jiko mukunda mu khale mu katshi dia gu yituga. ²¹ Mukunda, phila Tata a zugishile mvumbi nu gu a hwa monyo wenji, Mona nji udi mu hana monyo gwa yonu adi mu tshigina. ²² Mukunda Tata gwa shi go nzuji wa athu, uvi wa hanele gisalo gia gi nzuji gwa Mona. ²³ Mukunda akima a hane lukumu gwa Mona mu phila adi mu hana lukumu gwa Tata. Yonu gwa shi go mu hana lukumu gwa Mona udi mu tuna ha gu hana lukumu gwa Tata wa tumile Mona. ²⁴ Mu masonga masonga, yonu mu kima udi mu vwa ndinga yami udi mu kwikila gwa yonu wa ngu tumile udi mu zula monyo wa mvula nu mvula enji mba gwa kwateya go, uvi mba udi mu balega gu lufwa. ²⁵ Mu masonga masonga, ngu mu mi leza egi, tangwa dia kuwa, enji lulu ngagi, mvumbi mba jidi mu vwa ndinga ya Muna Nzambi, mvumbi jinyi mba ji vwa ndinga yene mba jidi mu jinga. ²⁶ Mukunda Tata udi nu monyo gwa mwene ha khenji, nganyi, wa hwile Munenji ha gu khala nu monyo gwa mwene ha khenji ²⁷ enji Tata wa hanele giyega gwa Munenji ha gu sambesa mukunda udi Munenji. ²⁸ Mu yituga go mu ndaga yene. Mukunda tangwa didi muza wanyi a kima adi gu majiamo mba a vwa ndinga yenji mba adi mu zoga, ²⁹ wanyi a kitile gu bonga mba adi mu futumuga gu lujingu , uvi wanyi a kitile gu bola mba adi mu futumuga ha gu sambeseya. ³⁰ Nga jiyile go gu kita gima eme ha khami. Mu phila ngu mu vwa, ngu mu sambesa enji gu sambesa gwami gudi gwa masonga, mukunda nga nu kamba go luzolo lwami uvi luzolo lwa yonu wa ngu tumile. ³¹ Gula nga ta kaka gimbangi gwami, gimbangi giene gi shi go gia masonga. ³² Uvi gudi nu muthu udi mu ta gimbangi giami, nga jiya egi gimbangi adi mu ta mukunda nu eme gidi gia masonga. ³³ Mwa tumile gwa Yowani,enji wa tele gimbangi gia masonga. ³⁴ Lulu ngagi gimbangi ngu mu zula gishi go gia muthu. Ngu mu zwela nganyi mukunda mu guluge. ³⁵ Yowani wa khalele mwinda wa khalele mu lema nu gu sema, enwe mwa vile kiese kaka tangwa di moshi mukunda nu semo yene. ³⁶ Uvi gimbangi ngudi mu ta gidi gia gu balega gu koma nu ginyi gia Yowani, mukunda gisalo gia ngu hwile Tata ha gu lungisa, isalo yene ngudi mu lungisa idi mu ta gimbangi giami gwa Tata yonu wa ngu tumile. ³⁷ Tata wa ngu tumile, mwene ha khenji udi mu ta gimbangi giami. Mwa vile go ndinga yenji nga nu mona phila yenji ata mu tangwa di moshi. ³⁸ Ndinga yenji ishi go mu katshi dienu mukunda mushi mu kwikila go gwa muthu yonu a tumile. ³⁹ Mwa phagele ha gu jiya mikanda ya sonegeye mukunda mwa nu yindula egi mu mikanda yene mba mudi mu zula monyo wa mvula nu mvula, mikanda yene idi mu ta gimbangi giami ⁴⁰ enwe mushi mu tshigina go guza gwa eme mukunda mu zule monyo. ⁴¹ Ngu shi mu zula go khembo gwa athu, ⁴² uvi ngu mu jiya egi mushi nu gu tshigina gwa Nzambi go mu katshi dienu ⁴³ Nge jile mu jina dia Shami, uvi mwa ngu yambele go. ⁴⁴ Phila khi mwa jiya gu kwikila, enwe mwa nu tshigina khunga jia athu, uvi mwa nu kamba go khunga jia nu katuga gwa Nzambi phamba? ⁴⁵ Mu yindula go egi eme mba ngu mu mi funda gu twama dia Tata. Gudi nu muthu muko udi mu mi funda, udi Moyize yonu mwa hagele mutshima. ⁴⁶ Gula mwa nu kwikila gwa Moyize, nga mwa nu jiya nji gu kwikila gwa eme mukunda mwene wa sonegele mukunda nu eme. ⁴⁷ Gula mushi mu kwikila go gu mikanda yene, phila khi mwa jiya gu kwikila gu ndinga yami?"