¹ Gwa dile Yesu wa vwa egi afalisaye a vile egi wa khalele mu kita gisalo nu gu botiga alongogi a gu balega Yowani, ² uvi Yesu mwene ha khenji gwa botigile go, uvi ya khalele alongogi enji. ³ Wa katugile gu Yudeya ha gu vutuga gu Galileya. ⁴ Ya khalele nu funu gwa mwene ha gu balegela gu Samaliya. ⁵ Wa kumile mu dimbo di moshi dia Samaliya, jina diienji Shishar, phene-phene nu mavu wanyi Yakobo a hwile mu nenji Yozefi. ⁶ Gunu gwa khalele nu wina dia meya dia Yakhobo. Yesu wa hwidile mukunda nu gu wenda a wendele hene a yile mudi tumbiga phene-phene nu wina diene dia meya. Ya khalele mu tangwa dia sambano. ⁷ Mukhetu wa gu Samaliya we jile ha gu thaga meya hene Yesu a mu lezele egi : "Ngu hwe meya ngu nwe." ⁸ Mukunda alongogi enji a yile gu dimbo ha gu sumba ima ya gudia. ⁹ Hene mukhetu wa gu Samaliya a mu lezele egi :" mukunda nu ikhi eye udi mu yuda, udi mu ngu lomba meya a gunwa, eme mukhetu wa gu Samaliya ?" Mukunda ba yuda a nu di visa go nu enya gu samaliya." ¹⁰ Yesu wa vutudile egi : " Nga udi mu jiya makapho a Nzambi enji nanyi udi mu gu leza egi : " Ngu hwe meya a gunwa " nga eye wa mu lombi, enji nga udi mu gu hwa meya a monyo." ¹¹ Mukhetu wa mu lezele egi : "Longi, ushi nu nzungu go enji wina didi dia leha. Gwi wa jiya gu zula meya a monyo ? ¹² keti udi wa mbuta ya gu balega Shetu Yakhobo yonu wa tu hwile wina enji mwene ha khenji wa nwile meya ene nu anenji nu shitu jienji ?" ¹³ Yesu wa mu vutudile egi :" Yonu, mba unwa meya wawa mba udi mu vwa luhungu, ¹⁴ uvi yonu mba unwa meya wanyi mba ngu mu hwa, mba gwa vi nji luhungu go. Mukunda meya mba ngu mu hwa mba a kituga gwa mwene gito gia muta mba ukhala mu bulumuga mu monyo wa konda suga." ¹⁵ Mukhetu wa mu lezele egi :" Longi,ngu whe meya ene, mukunda mba ngule guvwa nji ndo luhungu, enji mba ngule guza nji ndo ha gu thaga meya wawa." ¹⁶ Yesu wa mu lezele egi :" Nda , tamega mulumi'aye muze n'enji haha. " ¹⁷ Mukhetu wa mu vutudile egi :" Ngu shi nu yala go." Yesu wa mu lezele egi :" Wa zwela mwa bonga, ushi nu yala go;" ¹⁸ wa zudiye gwa mala mu tano, yonu udi n'enji lulu ngagi gwa shi go mulumi'aye, ndaga wa zwela idi ya masonga." ¹⁹ Mukhetu wa mu lezele egi :" Longi ngu mu mona egi udi wa profeta. ²⁰ A shetu a khalele muza mu kumisa ha mulundu wuwu uvi eye udi mu zwela egi gu Yelusalemi guma gwa guya mu kumisa." ²¹ Yesu wa mu lezele egi :" Ngu kwikile, mukwetu eye egi tangwa didi muza mba mu kumisa go Tata ha mulundu wuwu, nga gu Yelusalemi. ²² Mba mudi mu kumisa ndaga jinyi mushi mu jiya go. Tudi mu kumisa ndaga jinyi tudi mu jiya, mukunda gu guluga gu muza gwa ba yuda. ²³ Tangwa didi muza, dia lunga lulu ngagi, mukunda athu a mayilago a nu tshigina gu sambela, mba adi mu sambela Tata mu gi Pheve nu mu masonga, mukunda Tata udi nu funu ya athu a nganyi a gu khala athu enji a isambu. ²⁴ Nzambi udi Pheve, athu adi mu mu sambela a feto gu mu sambela mu gi Pheve nu mu masonga." ²⁵ Mukhetu wa mu lezele egi : "Ngu mu jiya egi Mesiya mba udi muza (yonu wa nu tamegeya egi Kilisto). Tangwa mba eza mba udi mu tu tendudila ima ikima ." ²⁶ Yesu wa mu lezele egi :"Ngudi nga Mesiya, eme ngudi mu solula n'eye." ²⁷ Mu tangwa diene alongogi ejile mu zoga hene. A yitugile ha gumona egi wa khalele mu solula nu mukhetu, uvi ata mu moshi nu gu zwela ndo egi :"ikhi udi mu tshigina ?" nga ndo mukunda nu ikhi udi mu solula nu mukhetu yogu?" ²⁸ Hene mukhetu mwene a bembele nzungu yenji ya meya, wa vutugile mu dimbo wa lezele athu egi :" ²⁹ Izenu mu mone yala mu moshi wa ngu leza ndaga ji kima nga kitile. Mbala iko wa jiya gu khala Kilisto ? ³⁰ A katugile mu dimbo, ejile mu mu sanga hene. ³¹ Tangwa dinyi, alongogi a khalele mu mu phusa nu gu mu leza egi :" Fumu, giza udie." ³² Uvi mwene wa a lezele egi :" Ngudi nu madia a gudia wanyi mushi mu jiya go." ³³ Hene alongogi a zwelele ene nu ene egi :" mbala iko gudi nu muthu wa mu batela ima ya gudia ? ³⁴ Yesu wa a lezele egi :"Madia ami adi gu sala luzolo lwa yonu wa ngu tumile nu gu lungisa isalo yenji. ³⁵ Keti mwa nu zwela go egi :" Gwa bega ngonda ji wana ha gu mona sungi ya gu katula ima?" Eme ngu mu mi leza egi :" Tuphulenu meso mu tale ilanga, mukunda tangwa dia lunga ha gu katula mbuto mu ilanga! ³⁶ Yonu udi mu katula ima mu ilanga mba udi mu zula lufutu nu gu zula mabundu a vula mukunda nu monyo wa mvula nu mvula, mukunda yonu udi mukuna, nu yonu udi mu katula ima mu gilanga mba a khala mu kiese akima. ³⁷ Hene henyanyi hene hadi gingana gigi : "Mu moshi udi mu kuna, muko udi mu katula." ³⁸ Nga mi tumile ha gu katula yinyi mwa kunyile go. Ako a kitile gisalo, enwe mweza mu ngila mu gisalo gia bala. ³⁹ Athu a gu Samaliya a vula a mu dimbo diene a kwikile gwa Yesu mukunda nu gimbangi gia mukhetu ginyi a zwelele egi :" Wa ngu leji ndaga jikima nga kitile." Hene ⁴⁰ athu a gu Samaliya ejile gwa mwene, a mu lombele ha gu bega n'awo ata ilumbu iyadi. ⁴¹ A vula a kwikile nji mukunda nu ndinga yenji. ⁴² A lezele mukhetu mwene egi :"Ta kwikile go mukunda nu ndaga yinyi wa zwelele uvi mukunda ta vi gu matshi etu, enji tudi mu jiya egi yogu ngayi udi mwene mu gulushi wa mavu akima." ⁴³ Gwa balegele ilumbu iyadi, wa katugile ha guya gu Galileya. ⁴⁴ Yesu mwene ha khenji wa zwelele egi gushi go ata profeta wa nu zula lukumu mu dimbo diawo. ⁴⁵ Tangwa a kumile gu Galileya, athu a gu galileya a mu yambele. A monele ndaga jikima a kitile gu Yelusalemi mu tangwa dia fete, mukunda ene nji a khalele gu fete yene. ⁴⁶ Wa katugile gu Kanana gunu a baludile meya mu vinu. Gu Kapernawum gwa khalele, suta di moshi dia fumu munenji wa yala wa khalele mu kata. ⁴⁷ Tangwa a vile egi Yesu wa katuga gu Yudeya ha guza gu Galileya, wa yile gwa Yesu ha gu mu bondila a bulumuge ha gu belula munenji wa khalele phene-phene nu lufwa. ⁴⁸ Yesu wa mu lezele egi :" Mudi mu mona ndaga jia gu yituga jia phila nu phila. Uvi mushi mu kwikila go ." Suta wa mu lezele egi : ⁴⁹ "Longi, giza tangwa munani khanji a fwa go ." ⁵⁰ Yesu wa mu lezele egi :" Nda, munaye udi nu monyo ." Muthu mwene wa kwikile gu ndinga ya zwelele Yesu, wa yile. ⁵¹ Tangwa a khalele mu bulumuga, athu enji a gisalo ejile ha gu mu tagana a mu lezele egi munaye udi nu monyo. ⁵² Wa a hudile egi tangwa khi mona a yandiga guvwa mwa bonga. A mu vutudile egi :" Hamene mu tangwa dia sambwadi, gimbefu gia mu katuga." ⁵³ Hene sha mona a yindudile egi ndaga yene ya salama kaka mu tangwa dinyi Yesu a mu lezele egi :" Munaye udi nu monyo." Hene mwene ha khenji nu inzo yenji a kwikile. ⁵⁴ Ya khalele gilumbu gia giyadi Yesu a kitile gidimbu gia khumbwa tangwa a katugile gu yudeya ha gu vutuga gu Galileya.