¹ Gwa khalele mufalisaye mu moshi jina dienji Nikodemi wa khalele fumu wa ba yuda. ² Muthu mwene wa yile mu phipha gwa Yesu wa mu lezele egi :" Fumu tudi mu jiya egi udi wa longi wa katuga gwa Nzambi, mukunda gushi go ata muthu wa jiya gu lungisa idimbu yiyi udi mu kita, gula Nzambi gwa shi go n'enji." ³ Yesu wa mu vutudile egi :"Mu masonga masonga, gula muthu gwa butugile go mbala iko gwa jiyile go gu mona Gifumu gia Nzambi." ⁴ Nikodemi wa hudile egi :" phila khi muthu wa jiya gubutuga nji gula udi gale mbuta? Keti wa jiya nji gu ngila mu vumo dia ginenji ha gubutuga nji ? " ⁵ Yesu wa mu vutudile egi : "Mu masonga masonga, gula muthu gwa butugile go gu meya nu gu gi Pheve, gwa jiyile go gu ngila mu Gifumu gia Nzambi. ⁶ Yinyi ya butuga gu musunyi idi ya musunyi, yinyi ya butuga gu gipheve idi ya gipheve. ⁷ Gu yituga ndo gu ima nga gu leza egi :" ufete gubutuga mbala iko." ⁸ Muphephe wa nuya gunu wa tshigina. Wa nu vwa makelele uvi wa nu jiya go gwi wa katuga, nga ndo gwi udi muya. Nganyi idi giteso gi moshi gwa yonu wa butuga gwa Pheve." ⁹ Nikodemi wa hudile egi :" phila khi ndaga yene ya jiya gu salama?" ¹⁰ Yesu wa vutudile egi :" udi wa longi wa koma wa gu Isalele, ikwatshi ushi mu bagisa go ndaga jiene ? ¹¹ Mu masonga masonga, tudi mu zwela ndaga jinyi tudi mu jiya, tudi mu ta gimbangi gia ndaga yinyi ta monele. Lulu mushi go mu tshigina mute gimbangi gietu. ¹² Gula nga mi leza ndaga jia haha ha mavu mushi mu kwikila go, phila khi mba mu kwikila gula nga mi leza ndaga jia gosa? ¹³ Gushi go ata muthu wa kandugile gosa, kaka yonu wa bulumugile gosa, udi Muna-Nzambi. ¹⁴ Phila Moyize a zugishile nioga mu temu dia fufuta fufuta, giteso gi moshi nji,Muna muthu mba udi mu zugishiya ¹⁵ mukunda yonu mu kima mba ukwikila gwa mwene, mba udi mu zula monyo wa mvula nu mvula. ¹⁶ Mukunda Nzambi wa tshiginile mavu akima , hene a hanele munenji mu moshi, mukunda yonu mba ukwikila gwa mwene mba a fi go, uvi mba udi mu zula monyo wa mvula nu mvula. ¹⁷ Nzambi gwa tumile go munenji haha ha mavu mukunda nu gu belesa mavu,uvi mukunda mavu a guluge mukunda nu mwene. ¹⁸ Yonu mukima udi mu kwikila gwa mwene mba gwa beleseya go, uvi yonu gwa nu kwikila go udi wa bela, mukunda gwa kwikille go mu jina dia Mona mu moshi wa Nzambi. ¹⁹ Ndaga ya nu benda ndola nu gu sambeseya, idi egi mwanya ufeto za haha ha mavu, uvi athu a tshiginile phipha, a tuna mwanya mukunda isalo yawo ya khalele ya bola. ²⁰ Mukunda yonu udi mu salela masumu udi mu tuna mwanya enji gwa shi go gu mwanya mu phila egi isalo yenji izoleye ha phelo. ²¹ Mu tangwa di kima, yonu udi mu salela masonga, udi muza mu mwanya, nganyi isalo yenji idi mu lungisama nu gu tshiginiya gwa Nzambi mwa bonga." ²² Gu nyima, Yesu nu alongogi enji a yile gu khanda ya mavu a yudeya. Gunu a balegesele tangwa mukunda a khalele mu botiga. ²³ Yowani nji wa khalele mu botiga gu Enoni phene-phene nu salimi mukunda gunu meya a khalele gwene a vula. Athu a khalele muza gwa mwene ha gu zula mbotiga. ²⁴ Mu tangwa diene dinyi Yowani wa khalele khanji a ngila go mu bologo. ²⁵ Gu nyima gwa zogele thembe mu khatshi dia alongogi a Yowani nu mu yuda mu moshi mukunda nu ndaga ya shigo ya gudi wova ha meso a athu. ²⁶ A yile gwa Yowani a mu hudile egi :"Longi, yonu mwa khalele n'enji gu khanda ya nzadi ya yolodani, yonu wa khalele mu haneya gimbangi, tala udi mu botiga, enji athu akima adi muya gwa mwene." ²⁷ Yowani wa vutudile egi :" Gushi nu muthu mu moshi go wa jiya gu zula gima gula gima giene gia mu hwiye go gosa ." ²⁸ Enwe ha khenu mwa jiya guta githemwe ginyi nga zwelele egi :" Ngushi nga Kilisto go;" uvi nga zwelele egi :" Nga tumiye gu twama dienji." ²⁹ Mukhetu yonu wa kwela udi wa yala yonu wa mu kwela uvi futa dia yonu wa kwela udi wa magana hene mu nenga, wa nu mona kiese gia vula ha guvwa dizwi dia yonu wa kwela. yene idi kiese giami gibeni. ³⁰ Mwa bonga mwene a kanduge eme ngu bulumuge. ³¹ Yonu udi muza gosa udi holu dia ima ikima. Yonu udi muza hoshia mavu udi wa ha mavu enji udi mu zwela ndaga jia hoshia mavu. ³² Yonu udi muza gosa udi holu dia ima ikima. Udi mu ta gi themwe gia ima yinyi mwene a monele nu yinyi a vile, uvi gushi go muthu mu tshigina gi themwe gienji. ³³ Yonu gwa shi go mu tshigina gi themwe gienji wa nu bagisa egi Nzambi wa nu zwela ndaga jia kielega. ³⁴ Mukunda yonu Nzambi a tumile wa nu zwela ndaga jia Nzambi, mukunda Nzambi wa nu mu zalesa sha nu Pheve yenji. ³⁵ Tata wa nu tshigina Mona hene a mu hwile ima ikima ha mago enji. ³⁶ Yonu udi mu kwikila gwa Mona udi nu monyo wa mvula nu mvula; yonu wa konda gulemvuga gwa Mona mba gwa zudi go monyo, uvi Nzambi mba udi mu mu vila khabu."